ភ្នំពេញ៖ អ្នកផលិតអំបិលក្នុងស្រុក រំពឹងថា អំបិលក្នុងឆ្នាំនេះ អាចនឹងគ្រប់គ្រាន់សម្រាប់ផ្គត់ផ្គង់ប្រើប្រាស់នៅក្នុងស្រុក ដោយសារតែអាកាសធាតុអំណោយផល។
លោក លី សេង អ្នកផលិតអំបិលក្នុងស្រុក និងជាអតីតប្រធានសមាគមផលិតអំបិលកម្ពុជា ដែលត្រូវបានរំលាយហើយនោះ បានឲ្យដឹងថា អំបិលនៅឆ្នាំនេះ អាចនឹងគ្រប់គ្រាន់ សម្រាប់ការផ្គត់ផ្គង់ ប្រើប្រាស់ក្នុងស្រុក។ លោក ថា អ្នកផលិតអំបិល មានប្រហែល ២០០ក្រុម បច្ចុប្បន្ននេះ ដែលមួយក្រុម មានពី ២ ទៅ៣គ្រួសារ បានផលិតអំបិល និងកំពុងកើបអំបិលជាបន្តបន្ទាប់។
លោកមានសង្ឃឹមថា ដោយសារតែអាកាសធាតុអំណោយផលល្អ មិនមានភ្លៀងធ្លាក់ អំបិលនឹងអាចផលិតបានចំនួន ៦ម៉ឺនតោន នៅក្នុងឆ្នាំនេះ។ លោកបន្តថា ឆ្នាំនេះ មានផលល្អប្រសើរច្រើនជាង បើធៀបនឹង ៣ឆ្នាំមុន។ រីឯតម្លៃវិញ អ្នកផលិតអំបិល អាចលក់បានថ្លៃ ចន្លោះពី៥០ ទៅ៥៥ដុល្លារ ក្នុងមួយតោន។
សូមជម្រាបថា អំបិលត្រូវបានផលិតជាសំខាន់នៅខេត្តកំពត និងកែប ជាអំបិលកំពតធម្មជាតិ ដែលផលិតដោយដៃ ជាលក្ខណៈប្រពៃណី នៅក្នុងប្រទេសកម្ពុជា។ ទាក់ទងនឹងការផលិតអំបិលនេះ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានមានប្រសាសន៍ ជំរុញឲ្យអ្នកផលិតអំបិល ធ្វើការផលិតអំបិលឲ្យបានកាន់តែច្រើន ដើម្បីទប់ទល់ការខ្វះខាត នៅក្នុងអំទ្បុងនៃការរាតត្បាត ជំងឺឆ្លង កូវីដ ១៩៕ដោយ : សម្ផស្ស
