ភ្នំពេញ៖ តំបន់សេដ្ឋកិច្ចពិសេសភ្នំពេញ (PPSEZ) ជាច្រើនឆ្នាំមកនេះ រក្សាបាននូវកំណើនជាប្រចាំ នៃសកម្មភាពពាណិជ្ជកម្ម។ ក្រុមហ៊ុននេះ(PPSEZ) មានកំណើនឈរនៅចំណាត់ថ្នាក់ទី ២ ដោយមានចំណែកជាង ២០ភាគរយ នៃតម្លៃពាណិជ្ជកម្មសរុប ក្នុងតំបន់សេដ្ឋកិច្ចពិសេស ដែលមានប្រតិបត្តិការទាំង ១៨ នៅក្នុងប្រទេសកម្ពុជានៅឆ្នាំ ២០១៩។
លោក Hiroshi Uematsu នាយកគ្រប់គ្រង PPSEZ បានឲ្យដឹងថា រហូតមកដល់ពេលនេះ មានរោងចក្រជាច្រើន នៅតំបន់សេដ្ឋកិច្ចពិសេសភ្នំពេញ PPSEZ នៅតែកំពុងប្រតិបត្តិការ បើទោះបីជាមានការរីករាលដាលនៃជំងឺឆ្លងកូវីដ ១៩ ក៏ដោយ។ ប៉ុន្តែទោះបីជាយ៉ាងណា ប្រសិនបើការរីករាលដាលនេះ នៅតែបន្តអូសបន្លាយរយៈពេលយូរ នឹងមានរោងចក្រមួយចំនួន បិទទ្វារមិនខាន។
ជាមួយគ្នានេះ ការនាំចេញរបស់តំបន់សេដ្ឋកិច្ចពិសេសភ្នំពេញ (PPSEZ) ក្នុងឆ្នាំ២០១៩ មានតម្លៃជាង ១.១៣៩ លានដុល្លារ កើនឡើងប្រមាណ ១៤ ភាគរយ។ កំណើននៃប្រតិបត្តិការអាជីវកម្មនេះ ដោយសារមានកិច្ចសហប្រតិបត្តិការដ៏ល្អ របស់អាជ្ញាធរមូលដ្ឋាន ដែលបានជួយសម្រួលនីតិវិធីនាំចេញ។ ជាពិសេសកិច្ចសហប្រតិបត្តិការ ពីការិយាល័យច្រកចេញចូលតែមួយ និងកិច្ចខិតខំប្រឹងប្រែងក្នុងការផ្ដល់សេវាល្អ និងការជួយសម្រួល ពីការិយាល័យគយនៅតំបន់សេដ្ឋកិច្ចពិសេសភ្នំពេញ។ ការកែលម្អ និងអភិវឌ្ឍសេវា និងការជួយសម្រួលនេះ បានជួយឲ្យក្រុមវិនិយោគិន ដែលមានស្រាប់ មានអារម្មណ៍ធូរស្រាល ហើយក្រុមអ្នកវិនិយោគថ្មីៗ នឹងកាន់តែមកបណ្តាក់ទុនចូលរួមច្រើននៅកម្ពុជា។
សូមជម្រាបថា តាមរយៈតំបន់សេដ្ឋកិច្ចពិសេស (SEZ) ដែលមានក្រុមហ៊ុនចំនួន ៤៦៥ បានប្រតិបត្តិការនៅ៥៤ កន្លែងក្នុងប្រទេសកម្ពុជា បានផ្ដល់ការងារជាង ១០ម៉ឺននាក់៕ដោយ៖ សម្ផស្ស