ភ្នំពេញ៖ ក្រុមហ៊ុន Cambodia Airways នឹងពង្រីកធុរកិច្ចរបស់ខ្លួន និងវិនិយោគទុនបន្ថែមទៀត ដើម្បីចូលរួម អភិវឌ្ឍប្រទេសកម្ពុជា បន្ទាប់ជំងឺផ្លូវដង្ហើម COVID19 បញ្ចប់ នាពេលខាងមុខ។
លោក ឈិន បូ ( Mr. Chen Bo – Chairman of Cambodia Airways) ប្រធានក្រុមប្រឹក្សាភិបាល បានថ្លែងថា ពេលនេះជាពេលលំបាក សម្រាប់គ្រប់ប្រទេសទាំងអស់ ដោយសារជំងឺឆ្លងផ្លូវដង្ហើមថ្មី និងគ្រប់ជើងហោះហើរទាំងអស់ របស់ក្រុមហ៊ុន ត្រូវបានផ្អាកបណ្តោះអាសន្នសិន គឺមានតែដឹកជញ្ជូនទំនិញប៉ុណ្ណោះ ។
លោកសង្ឃឹមថា ជំងឺផ្លូវដង្ហើម COVID19 នឹងបាត់នាពេលឆាប់ៗខាងមុខ និងសង្ឃឹមថា សម្ភារខាងលើ អាចឱ្យរដ្ឋលេខាធិការដ្ឋាន ប្រើប្រាស់សម្រាប់ពេលចាំបាច់។
ម្យ៉ាងទៀត លោកបានសន្យាថា ក្នុងពេលឆាប់ខាងមុខ ពេលដែលស្ថានភាពជំងឺ COVID19 បាត់ ក្រុមហ៊ុន Cambodia Airways នឹងពង្រីកធុរកិច្ចរបស់ខ្លួន និងវិនិយោគទុនបន្ថែមទៀត ដើម្បីចូលរួមអភិវឌ្ឍប្រទេសកម្ពុជា ។
លោក ម៉ៅ ហាវណ្ណាល់ រដ្ឋមន្ត្រី ទទួលបន្ទុក រដ្ឋលេខាធិការដ្ឋានអាកាសចរស៊ីវិល បានថ្លែងថា ទំនាក់ទំនងកម្ពុជា-ចិន ជាទំនាក់ទំនងពិសេស និងជាប្រពៃណី ដែលមានជាយូរលង់ណាស់មកហើយ និងមានទំនាក់ទំនងអភិវឌ្ឍគ្រប់ជ្រុងជ្រោយ ក្រោមការដឹកនាំដោយ សម្តេចអគ្គមហាសេនាបតី តេជោ ហ៊ុន សែន នាយករដ្ឋមន្ត្រីនៃកម្ពុជា ក្រោមពាក្យស្លោក កម្ពុជា-ចិន មិត្តភាពដែកថែក។ ជាពិសេស នាពេលថ្មី ក្នុងគ្រាលំបាកសម្តេច តេជោ ហ៊ុន សែន បាន ធ្វើទស្សនកិច្ចនៅប្រទេស ចិនដោយបានជួបជាមួយ ប្រធានធិបតី លោក Xi Jinping និងនាយករដ្ឋមន្ត្រី លោក Li keqiang ដោយបានទទួលនូវការគាំទ្រ ពីថ្នាក់ដឹកនាំ និងប្រជាជនចិន ចំនួន៣ ចំណុច ដែលស្នើដោយសម្តេច សម្រាប់ការអភិវឌ្ឍកម្ពុជាគឺ ១- រក្សានូវការវិនិយោគ របស់វិនិយោគិនចិនបើទោះបី មានការដក EBA របស់សហគមន៏អឺរ៉ុបក៏ដោយ ២ – បង្កើនការវិនិយោគបន្ថែមទៀត របស់ប្រទេសចិន នៅកម្ពុជា ៣-គាំទ្រនូវការបន្តវិនិយោគបន្ថែមទៀត និងអំពាវនាវឱ្យក្រុមហ៊ុនវិនិយោគល្អៗ ទៅកាន់ក្រុងព្រះសីហនុ ។
លោក ម៉ៅ ហាវណ្ណាល់ រដ្ឋមន្ត្រី ទទួលបន្ទុក រដ្ឋលេខាធិការដ្ឋានអាកាសចរស៊ីវិល បានថ្លែងអំណរគុណ ក្រុមហ៊ុន Cambodia Airways ដឹកនាំដោយ ប្រធានក្រុមប្រឹក្សាភិបាល លោក ឈិន បូ ដែលយក សម្ភារសម្រាប់ការបង្ការ និងទប់ស្កាត់ការរីករាលដាល ជំងឺកូវីដ១៩ ដល់រដ្ឋលេខាធិការដ្ឋានអាកាសចរស៊ីវិល និងជាការបង្ហាញ នូវសមានចិត្តដ៏ល្អ នៅក្នុងគ្រាដ៏លំបាកនេះ ហើយក៏ការការបង្ហាញនូវទំនាក់ទំនង និងកិច្ចសហប្រតិបត្តិការល្អរវាង ក្រុមហ៊ុន Cambodia Airways និងរដ្ឋលេខាធិការដ្ឋានអាកាសចរស៊ីវិល៕ដោយ៖សម្ផស្ស