ភ្នំពេញ៖ សម្ដេចពិជ័យសេនា ទៀ បាញ់ បានថ្លែងថា ក្នុងគ្រាអាសន្ន ដូចករណីការរីករាលដាល នៃមេរោគ COVID-19 យើងនឹងឃើញយ៉ាងច្បាស់ថា អ្នកណាជាអ្នកស្នេហាជាតិពិតប្រាកដ ។ សម្តេចបន្តថា អត្រាចម្លងមេរោគ COVID-19 នៅកម្ពុជាមានកម្រិតទាប ហើយករណីព្យាបាលឱ្យជាសះស្បើយ មានចំនួនច្រើនយ៉ាងណាក៏ដោយ សូមបងប្អូនប្រជាពលរដ្ឋទាំងអស់ បន្តថែទាំសុខភាពឱ្យបានល្អ។
សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានសរសេរសារ នៅលើហ្វេសប៊ុក ថ្ងៃទី១២ ខែមេសា ឆ្នាំ២០២០នេះថា “បើទោះជាអត្រាចម្លងមេរោគ COVID-19 នៅកម្ពុជាមានកម្រិតទាប ហើយករណីព្យាបាលឱ្យជាសះស្បើយ មានចំនួនច្រើនយ៉ាងណាក៏ដោយ សូមបងប្អូនប្រជាពលរដ្ឋទាំងអស់ បន្តថែទាំសុខភាពឱ្យបានល្អ និងអនុវត្តឱ្យបានម៉ឺងម៉ាត់នូវវិធានការនានា ដែលក្រសួងសុខាភិបាលបានណែនាំ។”
សម្ដេចពិជ័យសេនា បានមានប្រសាសន៍ថា “ក្នុងគ្រាអាសន្ន ដូចករណីការរីករាលដាល នៃមេរោគ COVID-19 យើងនឹងឃើញយ៉ាងច្បាស់ថា អ្នកណាជាអ្នកស្នេហាជាតិពិតប្រាកដ ព្រមលះបង់កម្លាំងកាយចិត្តដោយមិនខ្លាចនឿយហត់ ដើម្បីការពារ និងសង្គ្រោះអាយុជីវិតប្រជាពលរដ្ឋរបស់យើង”៕ដោយ៖កូឡាប
