ភ្នំពេញ៖ ជនសង្ស័យ២នាក់ ព្រមទាំងវត្ថុតាងសារធាតុញៀនប្រភេទមេតំហ្វេតាមីនទម្ងន់ ជាង១គីឡូក្រាម ត្រូវសមត្ថកិច្ចជំនាញមន្ទីរប្រឆាំងគ្រឿងញៀន នៅថ្ងៃទី១២ខែមេសា ឆ្នាំ២០២០ កសាងសំណុំរឿង បញ្ជូន ទៅសាលាដំបូងរាជធានីភ្នំពេញ។
មន្ទីរប្រឆាំងគ្រឿងញៀន បានបញ្ជាក់ថា អនុវត្តតាមបញ្ជា ឯកឧត្តម នាយឧត្ដមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ ក្រោមការដឹកនាំផ្ទាល់ពីនាយឧត្ដមសេនីយ៍ ម៉ក់ ជីតូ អគ្គស្នងការរងនគបាលជាតិ និងលោក ឧត្តមសេនីយ៍ឯក ឡឹក វណ្ណៈ នាយកមន្ទីរប្រឆាំងគ្រឿងញៀន ដែលដឹកនាំកម្លាំងចុះប្រតិបត្តិការផ្ទាល់ ដោយលោកឧត្តមសេនីយ៍ទោ ឃឹង សារ៉ាត់ នាយករងមន្ទីរប្រឆាំងគ្រឿងញៀន (ក៤) ដោយមានការសម្របសម្រួល ពីលោក សឿន មុនីរ័ត្ន ព្រះរាជអាជ្ញារងសាលាដំបូងរាជធានីភ្នំពេញ។ បង្ក្រាបករណីជូញដូរគ្រឿងញៀននៅថ្ងៃទី ៨ ខែមេសា ឆ្នាំ២០២០ វេលាម៉ោង ១៩និង៣៥នាទី នៅចំណុចភូមិចំការរដ្ឋ ឃុំវល្លិស ស្រុកសំរោង ខេត្តកំពង់ស្ពឺ ចាប់ខ្លួនជនសង្ស័យ ២នាក់ ឈ្មោះ ឆៃ សំណាង ភេទប្រុស អាយុ២៣ឆ្នាំ ជនជាតិខ្មែរ និងឈ្មោះ ស៊ឹម សុខជន ភេទប្រុស អាយុ២៧ឆ្នាំ ជនជាតិខ្មែរ ។
ក្នុងប្រតិបត្តិការនោះ សមត្ថកិច្ចចាប់យកវត្ថុតាង៖ សារធាតុញៀនប្រភេទមេតំហ្វេតាមីនទម្ងន់ ១២៩២,០៤ក្រាម ជញ្ជីងសម្រាប់ថ្លឹង ២គ្រឿង និង សម្ភារវេចខ្ចប់មួយចំនួន។ បច្ចុប្បន្ន ជនសង្ស័យ ព្រមទាំងវត្ថុតាង សមត្ថកិច្ចជំនាញយើង បានកសាងសំណុំរឿង បញ្ជូន ទៅសាលាដំបូងរាជធានីភ្នំពេញ ៕ដោយ៖កូឡាប
