ព្រះសីហនុ៖ ឯកឧត្ដមបណ្ឌិត ម៉ុង ឫទ្ធី ប្រធានក្រុមហ៊ុនម៉ុង ឫទ្ធីគ្រុប បានឲ្យដឹងថា ចាប់ពីម៉ោង៨ព្រឹក រហូតដល់ម៉ោង១រសៀលថ្ងៃសៅរ៍ទី១១ ខែមេសា ឆ្នាំ២០២០ ឯកឧត្ដមវេង សុខុន រដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទ បានដឹកនាំគណៈប្រតិភូក្រោមឱវាទ ក្នុងនោះផងដែរ ក៏មានឯកឧត្ដមអភិបាលរងខេត្តព្រះសីហនុ ថ្នាក់ដឹកនាំក្រោមឱវាទរបស់ក្រុមហ៊ុនម៉ុង ឫទ្ធីគ្រុប បានចូលរួម បំពេញទស្សនកិច្ចសិក្សាស្វែងយល់ទៅលើដំណើការ អភិវឌ្ឍន៍វិស័យកសិកម្ម កសិឧស្សាហកម្មមួយផ្នែកតូចរបស់ក្រុមហ៊ុនម៉ុង ឫទ្ធីគ្រុបចាប់ពីឆ្នាំ1995-2020=25ឆ្នាំបានកន្លងផុតទៅហើយជាលទ្ធផលបានតែប៉ុណ្ណឹងទេ ដើម្បីចូលរួមចំណែកជាមួយរាជរដ្ឋាភិបាលកម្ពុជា ក្នុងការជួយកាត់បន្ថយភាពក្រីក្ររបស់ប្រជាជនយើង និងដើម្បីអភិវឌ្ឍន៍នៅទីជនបទ ឲ្យបានពិតប្រាកដដូចមានក្នុងវីដេអូខ្លីនេះស្រាប់ សុំអភ័យទោសផងដែលបើមានការឆ្គាំឆ្គងណាមួយព្រោះអីអ្នកថត និងផលិតវីដេអូនេះជាអ្នកបើកបររថយន្ដជូនខ្ញុំទេ គាត់មិនមានអាជីបផ្នែកនេះទេ ។
ចំណែកក្រសួងកសិកម្ម បានចេញប្រកាសព័ត៌មានផងដែរថា តាមការអំពាវនាវដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ឱ្យប្រជាពលរដ្ឋត្រូវខិតខំធ្វើការដាំដុះ ជំរុញផលិតកម្មកសិកម្មរួមមាន៖ការចិញ្ចឹមជ្រូក មាន់ ទា ត្រី និងដាំបន្លែ ដើម្បីបង្កើនបរិមាណផ្គត់ផ្គង់ឱ្យតម្រូវការក្នុងស្រុក ហើយឆ្លៀតយកឱកាសនេះបង្កើតជាកាលានុវត្តភាពសម្រាប់វិស័យកសិកម្ម ខណៈបិទការនាំចូលពីខាងក្រៅដើម្បីចូលរួមបង្ការ និងទប់ស្កាត់ការរីករាលដាលជំងឺឆ្លងសកលកូវីដ-១៩។
ដើម្បីចូលរួមបង្កើតកាលានុវត្តភាពសម្រាប់វិស័យកសិកម្ម នៅព្រឹកថ្ងៃសៅរ៍ទី១១ ខែមេសា ឆ្នាំ២០២០ ឯកឧត្តមបណ្ឌិត ម៉ុង ឫទ្ធី ក្នុងនាមឯកឧត្តមជាប្រធានគណៈកម្មាធិការទី៣ នៃព្រឹទ្ធសភា សហប្រធានក្រុមការងារជាមួយវិស័យឯកជន (ក្រុមការងារផ្នែកកសិកម្ម កសិ-ឧស្សាហកម្ម ក្រុម “ក”) និងជាស្ថាបនិកក្រុមហ៊ុនម៉ុង ឫទ្ធីគ្រុប បានរៀបចំកម្មវិធីអញ្ជើញឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ទៅធ្វើទស្សនកិច្ចនៅតំបន់អភិវឌ្ឍន៍កសិ-ឧស្សាហកម្មកែវផុស ក្នុងភូមិកែវផុស ឃុំកែវផុស ស្រុកស្ទឹងហាវ ខេត្តព្រះសីហនុ។
គោលបំណងសំខាន់ៗនៃដំណើរទស្សនកិច្ចនេះគឺទី១- ពិនិត្យ និងតាមដានពីវឌ្ឍនភាពនៃវិស័យកសិ-ឧស្សាហកម្ម លើគ្រប់ខ្សែច្រវាក់ផលិតកម្ម (រោងចក្រផលិតចំណីសត្វអឹមភិក កសិដ្ឋានចិញ្ចឹមជ្រូកតាកឹង កសិដ្ឋានពាណិជ្ជកម្មទី៤ ចំការដូងប្រេង និងរោងចក្រកែច្នៃទី១ អន្លង់ក្រពើ) និងទី២- ធ្វើការពិភាក្សារួមគ្នាក្នុងនាមរាជរដ្ឋាភិបាល និងវិស័យឯកជន ក្នុងឆន្ទរួមគឺធ្វើយ៉ាងណាបង្កើនផលិតភាពផលិតកម្មកសិកម្ម ធានាសន្តិសុខស្បៀងក្នុងកាលៈទេសៈ ដែលប្រទេសយើងកំពុងតែមានវិបត្តិបណ្តាលមកពីជំងឺឆ្លងសកលកូវីដ-១៩។
ឯកឧត្តមរដ្ឋមន្ត្រី និងឯកឧត្តមបណ្ឌិតម៉ុង ឫទ្ធី បានអញ្ជើញចុះពិនិត្យ ហើយទទួលបានព័ត៌មានដូចខាងក្រោម៖
១- រោងចក្រ អាចផលិតចំណីសត្វគ្រប់ប្រភេទបានប្រមាណ ៦ពាន់តោនក្នុងមួយខែផ្គត់ផ្គងឱ្យកសិដ្ឋាន និងដៃគូរសហការចិញ្ចឹម ដោយប្រើប្រាស់វត្ថុធាតុដើមក្នុងស្រុកក្នុង ១ខែមាន៖ ពោត ៣០០០តោន កន្ទក់ និងកន្ទក់ស្រូវសាឡី ៧០០តោន កាកស្រាបៀរ ៤០០តោន និងដំឡូង១០០០តោន។ ក្រៅពីនេះ រោងចក្រក៏បាននាំចូលវត្ថុធាតុដើម ដើម្បីបំពេញឱ្យតម្រូវការខ្វះខាត។ បច្ចុប្បន្ន វត្ថុធាតុក្នុងស្រុកមានគ្រប់គ្រាន់សម្រាប់ផ្គត់ផ្គង់ឱ្យរោងចក្រ ហើយតម្លៃអាចទទួលយកបានទាំងអ្នកផលិត និងអ្នកប្រើប្រាស់។
២- កសិដ្ឋានចិញ្ចឹមជ្រូកតាកឹង៖ កសិដ្ឋានមានមេ-បាពូជចំនួន ៩ពាន់ក្បាល ក្នុង១ឆ្នាំអាចលក់កូនជ្រូកពូជជូនសហគមន៍បាន ៦០០០ក្បាល និងកូនជ្រូកសាច់ ៨០០០ក្បាល ហើយក្នុង១ខែអាចផ្គត់ផ្គង់ជ្រូកសាច់ឱ្យទីផ្សារបាន ១៤ពាន់ក្បាល អនាគតគ្រោងបង្កើនចំនួនផ្គត់ផ្គង់ជ្រូកសាច់ឱ្យទីផ្សារ ១០០០ក្បាលលក្នុងមួយថ្ងៃ។ បច្ចុប្បន្ន កសិដ្ឋានប្រើភ្លើងផលិតចេញពីលាមកជ្រូក (Biogas) អាចជួយកាត់បន្ថយថ្លៃដើមបានយ៉ាងល្អប្រសើរ។
៣- កសិដ្ឋានចិញ្ចឹមជ្រូកសាច់លើផ្ទៃដី ១០០ហិកតា បំពាក់ដោយឧបករណ៍ទំនើប ស្វ័យប្រវត្តិ ប្រព័ន្ធការពារសុវត្ថិភាព។ល។ កសិដ្ឋាននេះ មានផែនការផលិតជ្រូកសាច់ឱ្យបាន ១០០០ក្បាល ក្នុងមួយថ្ងៃ សម្រាប់ផ្គត់ផ្គង់ឱ្យទីផ្សារក្នុងស្រុក។
សរុបសេចក្តីមកដំណើរបេសកកម្ម របស់ឯកឧត្តមរដ្ឋមន្ត្រី ទទួលបានអត្ថប្រយោជន៍សំខាន់ៗជាច្រើន ហើយអត្ថប្រយោជន៍ទាំងអស់នេះ គឺជាសារដ៏សំខាន់ ដែលឯកឧត្តមទាំងពីរចង់ផ្ញើជូនទៅដល់អ្នកបរិភោគ អ្នកផលិត និងវិនិយោគិន គួរត្រឹះរិះពិចារណាច្បាម យកឱកាសមាសនេះ ដើម្បីរួមគ្នាធានាឱ្យបាននូវសន្តិសុខស្បៀង ក្នុងកាលៈទេសៈដែលប្រទេសជាតិកំពុងជួបនូវវិបត្តិជំងឺ ឆ្លងសកលកូវីដ-១៩ ហើយខ្លឹមសារសំខាន់ៗ ទាំងនោះមានដូចខាងក្រោម៖
– ក្រុមហ៊ុនផលិតចំណីសត្វ ត្រូវខិតខំប្រើប្រាស់វត្ថុធាតុដើម ក្នុងស្រុកឱ្យអស់លទ្ធភាព ប្រយោជន៍ ជំរុញផលិតកម្មក្នុងស្រុក ធានាបរិមាណផ្គត់ផ្គង់ ស្តង់ដារ និងគុណភាពតាមតម្រូវការទីផ្សារ។ឆ្លៀតយកឱកាសនេះ បង្កើតកាលានុវត្តភាពឱ្យវិស័យកសិកម្ម កសិ-ឧស្សាហកម្ម បង្កើតការងារនៅមូលដ្ឋាន និងបង្កើនប្រាក់ចំណូល។
– អំពាវនាវឱ្យក្រុមហ៊ុនចិញ្ចឹមសត្វ និងផលិតចំណីសត្វ ត្រូវសហការគ្នាបង្កើនផលិតភាពផលិតកម្ម រួមគ្នាធានាឱ្យបាននូវសន្តិសុខស្បៀង ទាំងពេលបច្ចុប្បន្ន ក៏ដូចជាពេលអនាគត និងជាពិសេសដើម្បីស្រូបយកកម្លាំងពលកម្ម ក្នុងស្រុកឱ្យអស់លទ្ធភាព។
– លើកទឹកចិត្តដល់ការវិនិយោគលើវិស័យកសិកម្ម ក្នុងស្រុកជាលក្ខណ:កសិដ្ឋានទំនើប បំពេញឱ្យ ខ្សែសង្វាក់ផលិតកម្ម (ចិញ្ចឹម ផលិតចំណី ផលិតវត្ថុធាតុដើម រោងចក្រកែច្នៃ ប្រើលាមកសត្វជាថាមពលផ្គត់ផ្គង់ឱ្យកសិដ្ឋាន និងផលិតជីកំប៉ុស្តិ) កាត់បន្ថយការនាំចូល។
– ក្រុមហ៊ុនចិញ្ចឹមសត្វ ផលិតចំណីសត្វ ក្រុមហ៊ុន ឬអាជីវករលក់ ចែកចាយសាច់សត្វ ស៊ុត ផលិតផលមានដើមកំណើតពីសត្វ លក់ចែកចាយធាតុចូលកសិកម្មផ្សេងៗទៀត មិនត្រូវឆ្លៀត ឱកាសតម្លើងថ្លៃផលិតផល ដែលនាំឱ្យប៉ះពាល់ដល់ជីវភាពអ្នកបរិភោគ។
– អ្នកបរិភោគមិនគួរបារម្ភអំពីការខ្វះខាតស្បៀង ក្រសួងសូមបញ្ជាក់ថា រាជរដ្ឋាភិបាលបានបម្រុងស្បៀងទុកគ្រប់គ្រាន់ (អង្ករ ត្រី សាច់ និងបន្លែ) សម្រាប់ផ្គត់ផ្គង់ឱ្យតម្រូវការរបស់អ្នកបរិភោគ។
ឆ្លៀតយកឱកាសនេះ ឯកឧត្តមបណ្ឌិតម៉ុង ឫទ្ធី បានថ្លែងអំណរគុណ និងវាយតម្លៃខ្ពស់ចំពោះដំណើរទស្សនកិច្ច របស់ឯកឧត្តមរដ្ឋមន្ត្រី និងសហការី ហើយកាន់តែពិសេសនោះគឺនេះជាលើកទី១ ដែលឯកឧត្តមរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានអញ្ជើញមកធ្វើទស្សន កិច្ចនៅតំបន់កសិ-ឧស្សាហកម្មម៉ុង ឫទ្ធីកែវផុស បន្ទាប់ពី ២៦ឆ្នាំនៃការចាប់បដិសន្ធិ។ ក្នុងនាមឯកឧត្តមជាសហប្រធានក្រុម “ក” ឯកឧត្តមបណ្ឌិតថា នឹងបន្តសហការពេញលេញ ជាមួយក្រសួងកសិកម្ម រុក្ខាប្រមាញ់ និងនេសាទដើម្បីចូលរួមបង្កើតកាលានុវត្តភាព សម្រាប់វិស័យកសិកម្ម និងកសិ-ឧស្សាហកម្មទាំងពេលបច្ចុប្បន្ន និងពេលអនាគត។
ក្នុងខណៈនេះ ឯកឧត្តមរដ្ឋមន្ត្រី បានថ្លែងអំណរគុណចំពោះពេលវេលា និងការបដិសណ្ឋារកិច្ច របស់ឯកឧត្តមបណ្ឌិត និងសហការី និងវាយតម្លៃខ្ពស់ចំពោះកិច្ចខិតខំប្រឹងប្រែង ប្រកបដោយឧត្តមគតិចូលរួមអភិវឌ្ឍវិស័យកសិកម្ម ក្នុងទិសដៅចែករំលែក និងទទួលខុសត្រូវរួមគ្នា ដើម្បីធានានូវសន្តិសុខស្បៀង កំណើន សេដ្ឋកិច្ច បង្កើតការងារ ចំណូលគ្រួសារ និងកាត់បន្ថយភាពក្រីក្រ។
សូមជម្រាបផងដែរថា តាមរបាយការណ៍របស់ក្រុមហ៊ុនស៊ីភីកម្ពុជា បានបញ្ជាក់ថា បច្ចុប្បន្នក្រុមហ៊ុន អាចផ្គត់ផ្គង់ប្រចាំថ្ងៃបាន៖ មាន់ ១៥១តោន ជ្រូកសាច់ ២.៥០០ក្បាល និងផលិតចំណីសត្វគ្រប់ប្រភេទបាន ១.៣៧០តោន៕ដោយ៖កូឡាប