កោះកុង៖ ផ្ទះមួយខ្នង ត្រូវបានអគ្គិភ័យឆាបឆេះទាំងស្រុង ពេលដែលម្ចាស់ផ្ទះចេញទៅកាប់ព្រៃ ដោយទុកកូនតូចៗនៅចាំផ្ទះ ។ ហេតុការភ្ញាក់ផ្អើលមួយនេះ បានកើតឡើងកាលពីវេលាម៉ោងជាង៤ល្ងាច នាថ្ងៃទី១២ ខែមេសា ឆ្នាំ២០២០ ស្ថិតក្នុងភូមិស្ទឹងវែងសង្កាត់ស្ទឹងវែង ក្រុងខេមរភូមិន្ទ ខេត្តកោះកុង។
បើតាមការបញ្ជាក់ពីកូនស្រីម្ចាស់ផ្ទះថា មុនដំបូង នាងបានឃើញភ្លើងឆាបឆេះ ចេញពីខាងក្រោយទូរទស្សន៍ រួចក៏រត់ទៅប្រាប់បងៗឲ្យជួយហៅម្តាយ ឪពុកមកពន្លត់ភ្លើង ។
លោកស្រី សំ សិរី ជាម្ចាស់ផ្ទះ អាយុ៤៣ឆ្នាំ បានឲ្យដឹងថា អគ្គិភ័យបានបំផ្លិចបំផ្លាញអស់ផ្ទះមួយខ្នង ទំហំ៦ម៉ែត្រគុណ១៣ម៉ែត្រ ប្រក់សង្ក័សី ជញ្ជាំងក្តា កង់១គ្រឿង ទូរស័ព្ទម៉ាកសាមសុង២គ្រឿង លុយដុល្លារជាង១ពាន់ដុល្លារ ខ្សែដៃមាស១ខ្សែ ទម្ងន់៥ជី ប្លង់ដីឡូត៍ចំនួន៦ប្លង់ និងសម្ភារៈក្នុងផ្ទះមួយចំនួនថែមទៀត ។
សមត្ថកិច្ចបានឲ្យដឹងដែរថា ចំពោះកិច្ចអន្តរាគមន៍ពន្លត់អគ្គិភ័យខាងលើ កម្លាំងអគ្គិភ័យស្នងការដ្ឋាននគរបាលខេត្តកោះកុងបានប្រើប្រាស់អស់ទឹកចំនួន៤ឡាន ទើបអាចគ្រប់គ្រងស្ថានការបានទាំងស្រុង ដោយមិនបង្កឲ្យមានការរាលដាលទៅដល់ផ្ទះអ្នកជិតខាង។ អគ្គិភ័យនេះ មិនបង្កឲ្យអ្នកណាម្នាក់ គ្រោះថ្នាក់នោះឡើយ ។ ចំពោះមូលហេតុគឺប្រហែលជាបណ្តាលមកពីការឆ្លងចរន្តអគ្គិសនី ស្របពេលដែលម្ចាស់មិននៅផ្ទះមិននៅផង ទើបបណ្តាលឲ្យមានការឆាបឆេះខ្លាំងមិនអាចគ្រប់គ្រងស្ថានការណ៍បាន ៕ដោយ៖បញ្ញាស័ក្តិ
