ពោធិ៍សាត់ៈ ឯកឧត្តម ម៉ៅ ធនិន អភិបាលខេត្តពោធិ៍សាត់ បានមានប្រសាសន៍ថា គ្រោងឱ្យមន្ត្រីជំនាញរបស់រដ្ឋបាលខេត្ត សិក្សាដំឡើងកាមេរ៉ាសុវត្ថិភាព នៅតាមបណ្តាភ្លើងស្តុប ក្នុងក្រុងពោធិ៍សាត់ ដើម្បីថតយកទិន្នន័យ នៃការធ្វើចរាចរណ៍ របស់ប្រជាពលរដ្ឋ និងរួមចំណែកលើកកម្ពស់សន្តិសុខ សុវត្ថិភាពសង្គមទាំងមូល។
ឯកឧត្តម ម៉ៅ ធនិន បានឱ្យដឹងថា កាមេរ៉ាសុវត្ថិភាព នឹងត្រូវដំឡើងនៅតាមបង្គោលភ្លើងស្តុបទាំង៤កន្លែង ក្នុងក្រុងពោធិ៍សាត់ ហើយគ្រប់សកម្មភាពទាំងអស់ ត្រូវ Connect ភ្ជាប់ទៅការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាលខេត្ត និង iPad ផ្ទាល់របស់ឯកឧត្តម ដោយរក្សាទុក ក្នុងអំឡុងពេល១ខែ ទើបលុបចេញម្តង។ កាមេរ៉ាសុវត្ថិភាព បានកម្មង់ទិញបង្ហោលភ្លើងបំភ្លឺផ្លូវប្រភេទ Smart LED Light ចំនួន៧០០បង្គោល ដើម្បីដាក់បំភ្លឺលើផ្លូវសំខាន់ៗតាមទីសាធារណៈ ក្នុងក្រុងពោធិ៍សាត់ និងឈានឆ្ពោះទៅរៀបចំដំឡើងជាផ្លូវការ នាពេលខាងមុខ។ បញ្ហាដែលធំបំផុត គឺការផ្ទុះឡើងនៃជំងឺកូវីដ១៩ បច្ចុប្បន្នកូនក្មួយពលករ ដែលវិលត្រឡប់ពីក្រៅប្រទេស គិតចាប់ពីថ្ងៃទី១៨ ខែមីនា ដល់ថ្ងៃទី១១ ខែមេសា ឆ្នាំ២០២០ មានចំនួន២១៨៥នាក់ (ក្នុងនោះស្រី៩៨៥នាក់) ។ ពួកគេត្រូវបានតាមដាននិងពិនិត្យសុខភាព នៅមណ្ឌលសុខភាពមូលដ្ឋានរៀងៗខ្លួន។ ចំពោះពលករ ដែលទើបមកពីប្រទេសថៃ យើងបានរៀបចំចាំទទួល និងដឹកជញ្ជូនពួកគេ តាមរថយន្តយោធា មកកាន់មជ្ឈមណ្ឌលបណ្តុះបណ្តាលវិជ្ជាជីវៈរលាំង ក្នុងភូមិអន្លង់មាន ឃុំស្នាមព្រះ ស្រុកបាកាន ដោយដាក់ឱ្យនៅដាច់ដោយឡែក រយៈពេល១៤ថ្ងៃ ព្រមទាំងបានរៀបចំក្រុមគ្រូពេទ្យប្រចាំការ ត្រួតពិនិត្យសុខភាព កន្លែងស្នាក់នៅ មានទឹក មានភ្លើងនិងស្បៀងអាហារគ្រប់គ្រាន់។
នៅថ្ងៃទី១១ ខែមេសា ឆ្នាំ២០២០ ក្រុមការងាររាជរដ្ឋាភិបាល ចុះជួយមូលដ្ឋាន និងរដ្ឋបាលខេត្តពោធិ៍សាត់ បាននាំយកអំណោយជាអង្ករ និងម៉ាស ទៅចែកជូនដល់ខ្នងផ្ទះ បងប្អូនប្រជាពលរដ្ឋ ដែលខ្វះខាតជាក់ស្តែង បន្ទាប់ពីរងផលប៉ះពាល់សេដ្ឋកិច្ចគ្រួសារ ដោយការផ្ទុះឡើងនៃជំងឺកូវីដ១៩ ។ នេះគឺជាការគិតគូរ និងយកចិត្តទុក្ខដាក់ ពីសម្តេចតេជោ ហ៊ុន សែន ប្រមុខរាជរដ្ឋាភិបាលនៃកម្ពុជា ដែលបានខ្នះខ្នែង រិះរកគ្រប់មធ្យោបាយ ធ្វើយ៉ាងណា ជួយទប់ស្កាត់មិនឱ្យពលរដ្ឋឆ្លងជំងឺកូវីដ១៩ និងមិនឱ្យប្រជាពលរដ្ឋណាម្នាក់ ដាច់ស្បៀងអាហារជាដាច់ខាត៕ ដោយ ៖ អ៊ុងសារុំ
