កណ្តាល៖ នគរបាលស្រុកមុខកំពូល បានរាយការណ៍ពីករណីប៉ុនប៉ងឃាតកម្ម ដែលបង្កឡើងដោយយុវឈាមរាវម្នាក់ កាន់ពូថៅទាំងសភាពស្រវឹងស្រាជោកជាំ ឡើងទៅលើផ្ទះ កាប់ជនរងគ្រោះម្នាក់ដែលមានអាយុជាង៦០ឆ្នាំ បណ្តាលឲ្យរបួសធ្ងន់។ បន្ទាប់ពីកើតហេតុ សមត្ថកិច្ចបានចុះចាប់ខ្លួនជនបង្ក ដើម្បីកសាងសំណុំរឿងបញ្ជូនទៅតុលាការ។
សូមបញ្ជាក់ថា ករណីប៉ុនប៉ងឃាតកម្មនេះ បានកើតហេតុថ្ងៃទី៩ ខែមេសា ឆ្នាំ២០២០ វេលាម៉ោង១៥.០០នាទីចំណុចលើផ្ទះជនរងគ្រោះ ភូមិវត្តថ្មី ឃុំព្រែកដំបង ស្រុកមុខកំពូល ខេត្តកណ្តាល។
ជនរងគ្រោះឈ្មោះ យី ផល្លី ភេទប្រុស អាយុ៦៨ឆ្នាំ ជនជាតិខ្មែរមុខរបរ នៅផ្ទះមានទីលំនៅសព្វថ្ងៃភូមិ-ឃុំកើតហេតុ (រងរបួសចំលើក្បាលផ្នែកខាងមុខ ១កន្លែង របួសគុម្ពត្រចៀកខាងឆ្វេង១កន្លែង និងជង្គង់ខាងស្ដាំ១កន្លែង)។ ចំណែកជនសង្ស័យដែលសមត្ថកិច្ចឃាត់ខ្លួនឈ្មោះ អុល សំអ៊ាន់ ភេទប្រុស អាយុ២៧ឆ្នាំជនជាតិខ្មែរមុខរបរ មិនពិតប្រាកដ មានទីលំនៅសព្វថ្ងៃភូមិ-ឃុំកើតហេតុ វត្ថុតាងចាប់យកពូថៅដងឈើ ១ ។
នគរបាលស្រុកមុខកំពូល បានរៀបរាប់ពីសភាពនៃរឿងហេតុនេះថា មុនពេលកើតហេតុ ជនរងគ្រោះបានទៅលាងឆ្នាំង ដើម្បីដាក់ដាំបាយ ស្រាប់តែពេលនោះ ជនសង្ស័យឈ្មោះអុល សំអ៊ាន់ បានដើរឡើងទៅលើផ្ទះរបស់ជនរងគ្រោះ ក្នុងភាពស្រវឹងស្រា ដោយកាន់ពូថៅជាប់នៅនឹងដៃភ្លាមនោះ ជនសង្ស័យបានកាប់ទៅលើជនរងគ្រោះ ចំនួន៣ ពូថៅ ត្រូវចំលើក្បាលផ្នែកខាងមុខ១ពូថៅ ត្រូវចំគុម្ពត្រចៀកខាងឆ្វេង១ពូថៅ និងត្រូវចំជង្គង់ខាងស្ដាំ១ ពូថៅ បណ្ដាលឲ្យរយះ ហូរឈាម បន្ទាប់មកជនសង្ស័យ ក៏ដើរទៅដេកនៅលើអង្រឹងក្រោមផ្ទះរបស់ជនរងគ្រោះ ។ លុះដល់វេលាម៉ោង១៧.០០នាទីឈ្មោះ យី យន ដែលត្រូវជាសាច់ញាតិជនសង្ស័យ បានមកប្តឹងសមត្ថកិច្ចប៉ុស្តិ៍នគរបាលរដ្ឋបាលព្រែកដំបង ភ្លាមនោះកម្លាំងប៉ុស្តិ៍នគរបាលរដ្ឋបាលព្រែកដំបង បានចុះទៅដល់កន្លែងកើតហេតុ ហើយបានឃាត់ខ្លួនជនសង្ស័យ យកមកប៉ុស្តិ៍ដើម្បីធ្វើការសាកសួរ ។ នៅចំពោះមុខសមត្ថកិច្ច ជនសង្ស័យ បានឆ្លើយសារភាពថា ខ្លួនពិតជាបានយកពូថៅទៅកាប់លើជនរងគ្រោះពិតប្រាកដមែន ។
បច្ចុប្បន្នជនសង្ស័យត្រូវបាន ឃាត់ខ្លួន នៅអធិការដ្ឋាននគរបាលស្រុកមុខកំពូល ដើម្បីកសាងសំណុំរឿង ចាត់ការតាមនីតិវិធី៕ ដោយ៖កូឡាប
