ប្រទេសចិនបានប្រកាសថា មានអ្នកឆ្លងវីរុសកូរ៉ូណាថ្មីចំនួន ១០៨នាក់បន្ថែមទៀតកាលពីថ្ងៃអាទិត្យ មានការកើនឡើងជាង ១០ករណី បើធៀបទៅនឹងថ្ងៃសៅរ៍ ដែលមានអ្នកឆ្លងថ្មីចំនួន ៩៩នាក់។
វាគឺជាតួលេខឆ្លងថ្មីពីក្រៅប្រទេសដ៏ច្រើនបំផុតក្នុងប្រទេសចិន ក្នុងរយៈពេល ៥សប្តាហ៍ បន្ទាប់មានមានប្រជាជនចិនជាច្រើនបានត្រឡប់ចូលប្រទេសវិញ។
គណៈកម្មការសុខាភិបាលជាតិចិន បាននិយាយនៅក្នុងសេចក្តីប្រកាសថ្ងៃចន្ទនេះថា ក្នុងចំណោមករណីឆ្លងទាំងអស់ មាន ៩៨ករណីឆ្លងមកពីប្រភពខាងក្រៅ។
ជាមួយគ្នានេះដែរ មានអ្នកជំងឺ ២នាក់បានស្លាប់នៅក្នុងខេត្តហូបេ កាលពីថ្ងៃអាទិត្យម្សិលមិញនេះ។
សូមបញ្ជាក់ថា ការនាំចូលវីរុសកូរ៉ូណ ឬ COVID-19 ពីក្រៅប្រទេសបានបន្តកើនឡើងក្នុងប្រទេស ដោយសារតែប្រជាជនចិនជាច្រើនបានធ្វើដំណើរវិលត្រឡប់ចូលក្នុងប្រទេសវិញ។
រហូតមកដល់ពេលនេះ តួលេខនៃអ្នកឆ្លងសរុបនៅចិនហក់ឡើងដល់ ៨២.១៦០នាក់ ចំណែកអ្នកស្លាប់កើនឡើងដល់ ៣.៣៤១នាក់៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia
