មេដឹកនាំកូរ៉េខាងជើង គីម ជុងអ៊ុន បានធ្វើការរុះរើដ៏ធំនៅក្នុងគណៈកម្មការកិច្ចការរដ្ឋ ដោយធ្វើការផ្លាស់ប្តូរសមាជិកជាង ១ភាគ ៣។ នេះបើតាមប្រព័ន្ធផ្សព្វផ្សាយផ្លូវការនៅថ្ងៃចន្ទនេះ។
គីម ជុងអ៊ុន គឺជាប្រធានគណៈកម្មការកិច្ចការរដ្ឋ (SAC) ដែលជាស្ថានប័នដែលអាចធ្វើការសម្រេចចិត្តដ៏មានឥទ្ធិពលបំផុតរបស់កូរ៉េខាងជើង។
មេដឹកនាំរូបនោះបានធ្វើការផ្លាស់ប្តូរសមាជិកចំនួន ៥នាក់ក្នុងចំណោមសមាជិក ១៣នាក់នៃគណៈកម្មការ ហើយវាត្រូវបានធ្វើឡើងនៅក្នុងសន្និបាតប្រជាជនជាន់ខ្ពស់កូរ៉េខាងជើងកាលពីថ្ងៃអាទិត្យម្សិលមិញនេះ។
បើតាមរូបភាពរបស់កាសែត Rodong Sinmun បានបង្ហាញថា សមាជិកសភារាប់រយនាក់បានធ្វើការអង្គុយជិតគ្នា ដោយមិនមានពាក់ម៉ាស ឬឧបករណ៍ការពារឆ្លងអ្វីឡើយ។
ការប្រជុំរបស់គណៈកម្មការកិច្ចការរដ្ឋកើតឡើងតែមួយថ្ងៃប៉ុណ្ណោះ ក្រោយពេល គីម ជុងអ៊ុន បានស្នើឲ្យមានវិធានការរដ្ឋតឹងរ៉ឹងបន្ថែមទៀត ដើម្បីការពារប្រជាជនខ្លួនពីការឆ្លងវីរុសកូរ៉ូណា។
សូមបញ្ជាក់ថា កូរ៉េខាងជើងបាននិយាយថា ខ្លួនបានធ្វើតេស្តមនុស្សយ៉ាងតិច ៧០០នាក់ និងបានដាក់មនុស្សច្រើនជាង ៥០០នាក់អោយនៅដាច់ដោយឡែក ប៉ុន្តែមិនមានការឆ្លងវីរុសកូរ៉ូណាឡើយ។ នេះបើតាមការបញ្ជាក់របស់អង្គការសុខភាពពិភពលោកប្រាប់ទីភ្នាក់ងារសារពត៌មាន Reuters កាលពីសប្តាហ៍មុន។
ប្រទេសផ្តាច់ការមួយនេះ បានចាត់វិធានការយ៉ាងលឿនដើម្បីការពារកុំឲ្យមានការឆ្លងវីរុសកូរ៉ូណាដោយប្រទេសខ្លួន ដោយបានធ្វើការបិទការធ្វើដំណើរទាំងអស់ជាមួយនឹងប្រទេសជិតខាង ដូចជារុស្សី និងចិន និងបានផ្អាកការធ្វើដំណើរទេសចរណ៍អន្តរជាតិទាំងអស់ ព្រមទាំងបានដាក់មនុស្សរាប់ពាន់នាក់ឲ្យនៅដាច់ដោយឡែក រួមទាំងមន្ត្រីការទូតផងដែរ៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia