ខេត្តស្វាយរៀងៈ បុរស២នាក់ បានរងរបួសទាំងសងខាង ខណៈដែលមានបុរសម្នាក់ បានយកផាវអុជ ហើយបោះចូលទៅក្នុងផ្ទះអ្នកដទៃ បង្កឱ្យមានអំពើហឹង្សាកើតឡើង កាលពីវេលាម៉ោង១៨និង៥០នាទី ថ្ងៃទី១២ ខែមេសា ឆ្នាំ២០២០ នៅភូមិត្រពាំងដៀលើ ឃុំច្រេស ស្រុកចន្ទ្រា ខេត្តស្វាយរៀង។
សមត្ថកិច្ចបានឱ្យដឹងថាៈ ករណីហិង្សាដោយចេតនាមួយ កើតឡើងរវាងជនសង្ស័យឈ្មោះខាន់ ស៊ីដន ភេទប្រុស អាយុ ២៥ឆ្នាំ មាន ឆ្នាំមុខរបរកម្មកររោងចក្រ និងជនសង្ស័យឈ្មោះ យឿន សង្ហាន់ ភេទប្រុស អាយុ ២៥ ឆ្នាំមុខរបរកម្មកររោងចក្រ បានប្រវាយប្រតប់គ្នា នឹងកាំបិតបណ្តាលឲ្យរងរបួសទាំងសងខាង គឺឈ្មោះយឿន សង្ហាន់ របួសដៃស្តាំ ដេរ៤ថ្នេរ និង សង្ស័យបាក់កដៃខាងឆ្វេង រីឯឈ្មោះខាន់ ស៊ីដន របួសមាត់ដេរចំនួន៥ថ្នេរ និងរបួសលើទ្រូងដាច់ប្រវែង១សង់ទីម៉ែត្រ។
មូលហេតុ គឺដោយឈ្មោះ យឿន សង្ហាន់ ដុតផាវបោះចូលទៅរកផ្ទះរបស់ឈ្មោះខាន់ ស៊ីដន ទើបកើតជារឿងឈ្លោះប្រកែក និងប្រតប់ប្រវាយគ្នា។
ប្រភពដដែលបានបន្តថា បច្ចុប្បន្នជនសង្ស័យទាំងពីរនាក់ ត្រូវបានសមត្ថកិច្ចប៉ុស្តិ៍នគរបាលរដ្ឋបាលច្រេស ឃាត់ខ្លួនបញ្ជូនទៅព្យាបាល នៅមណ្ឌលសុខភាពឃុំច្រេស ដោយដាក់កម្លាំងយាម រង់ចាំស្ថានភាពមុខរបួសធូរស្រាល ទើបបញ្ជូនមកការិយាល័យជំនាញចាត់ការតាមច្បាប់៕ដោយ វ៉ៃកូ
