ខេត្តស្វាយរៀង៖ លោកជំទាវ ដួង វណ្ណា អ្នកតំណាងរាស្ត្រមណ្ឌលស្វាយរៀង បានថ្លែងថា យើងត្រូវចូលរួមយ៉ាងសកម្មប្រយុទ្ធប្រឆាំងនឹងជំងឺកូវីដ បន្តទៀត តាមការដឹកនាំរបស់រាជរដ្ឋាភិបាល និងការណែនាំរបស់ក្រសួងសុខាភិបាល គឺត្រូវរស់នៅអនាម័យខ្ជាប់ខ្ជួន លាងដៃនឹងសាប៊ូ ឬអាល់កុល រក្សាគម្លាតឲ្យបានសមស្រប ពាក់ម៉ាស ជាពិសេសជៀសវាងការប្រមូលផ្តុំគ្នាមានមនុស្សច្រើន ។
លោកជំទាវ ដួង វណ្ណា បានថ្លែងបែបនេះ នៅព្រឹកថ្ងៃទី១៣ ខែមេសា ឆ្នាំ២០២០ ពេលចុះជួបជាមួយអាជ្ញាធរភូមិ-ឃុំ ប្រជាការពា និងកងកម្លាំងទាំងបី ដើម្បីធ្វើយុទ្ធនាការផ្សព្វផ្សាយពីវិធីកាត់បន្ថយហានិភ័យ ពីការឆ្លងជំងឺកូវីដ-១៩ ក្នុងស្រុកស្វាយជ្រំ នៅឃុំចំឡង ៧៥នាក់ ឃុំពោធិរាជ ១១៥នាក់ ដើម្បីឲ្យពួកគាត់ផ្សព្វផ្សាយបន្ត ដល់ប្រជាពលរដ្ឋ និងបងប្អូនដែលចំណាកស្រុក ទើបត្រឡប់មកពីធ្វើការនៅក្រៅប្រទេស ។
លោកជំទាវ ដួង វណ្ណា បាននាំមកនូវប្រសាសន៍ផ្តាំផ្ញើ សាកសួរសុខទុក្ខពីសំណាក់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដល់បងប្អូនទាំងអស់ ដោយក្តីនឹករលឹក សូមកុំមានការព្រួយបារម្មណ៍ត្រូវគិតគូពីសុខភាព ហើយបងប្អូនដែលទើបត្រឡប់មកពីក្រៅប្រទេស ត្រូវនៅដាច់ដោយឡែកពីគេរយៈពេល ១៤ថ្ងៃ កុំឱ្យជួបជុំហូបចុកគ្រឿងស្រវឹងក្នុងពិធីផ្សេងៗ ។
លោកជំទាវ ក៏បានលើកឡើងពីគ្រោះថ្នាក់ នៃជំងឺកូវីដ-១៩ ដែលមកដល់បច្ចុប្បន្ន បានរីករាលដាល ស្ទើរគ្រប់ប្រទេសលើសកលលោក បើទោះបីប្រទេសកម្ពុជា មិនទាន់ធ្ងន់ធ្ងរនៅឡើយ ហើយមានអ្នកជាសះស្បើយខ្លះក្តី តែមិនទាន់មានសញ្ញាណាមួយ ស្រាកស្រាន្តនៅឡើយ ។ ហេតុនេះ យើងត្រូវចូលរួមយ៉ាងសកម្ម ប្រយុទ្ធប្រឆាំងនឹងជំងឺកូវីដ បន្តទៀត តាមការដឹកនាំរបស់រាជរដ្ឋាភិបាល និងការណែនាំរបស់ក្រសួងសុខាភិបាល គឺត្រូវរស់នៅអនាម័យខ្ជាប់ខ្ជួនលាងដៃនឹងសាប៊ូ ឬអាល់កុល រក្សាគម្លាតឲ្យបានសមស្រប ពាក់ម៉ាស ជាពិសេសជៀសវាងការប្រមូលផ្តុំគ្នាមានមនុស្សច្រើន ។
លោកជំទាវ បានបន្តទៀតថា យើងត្រូវរក្សាប្រក្រតីភាព ការរស់នៅប្រចាំថ្ងៃ ត្រូវចេះជួយយកអាសាគ្នា ការពារសុខភាពផ្ទាល់ខ្លួន និងគ្រួសារ សុខភាពសាធារណៈ ដើម្បីបង្ការទប់ស្កាត់ដាច់ខាត មិនឱ្យជំងឺនេះឆ្លងរីករាលដាល នៅក្នុងសហគមន៍ ជាពិសេសជាក់ស្តែងចលនា បងប្អូនកម្មករ-ពលករ ចំណាកស្រុកក្នុង និងក្រៅប្រទេសដែលទើបត្រឡប់ មកស្រុកកំណើតរបស់ខ្លួនវិញ៕ដោយ៖ វ៉ៃកូ
