ភ្នំពេញ៖ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ និងជាអនុប្រធានគណៈកម្មការជាតិប្រយុទ្ធនឹងជំងឺកូវីដ-១៩ បានធ្វើការណែនាំឲ្យសមត្ថកិច្ច ត្រូវមានអាកប្បកិរិយាត្រឹមត្រូវ ចំពោះប្រជាពលរដ្ឋខ្មែរ
ក្នុងការណែនាំឲ្យពួកគាត់ប្រុងប្រយ័ត្ន និងការពារខ្លួននឹងជំងឺកូវីដ-១៩ ខណៈរហូតដល់ពេលនេះប្រទេសកម្ពុជា មិនទាន់ពលរដ្ឋណាម្នាក់ស្លាប់ដោយជំងឺកូវីដ-១៩នៅឡើយទេ។
សម្ដេចក្រឡាហោម ស ខេង ថា “ការងារនេះមកដល់ពេលនេះ វាមិនបាន១០០%ទេ យើងជឿអ៊ីចឹងពីព្រោះថា នេះបទបញ្ជាមែន ប៉ុន្ដែគឺមិនអនុញ្ញាតឲ្យសមត្ថកិច្ចរបស់យើង ដើម្បីនឹងចាត់វិធានតឹងរ៉ឹងរហូតដល់ថា យកទោស អ្នកមិនបានគោរពទេ។ គ្រាន់ថា អង្វរក អំពាវនាវឲ្យគាត់យល់ ឲ្យចូលរួមតែប៉ុណ្ណឹងទេ ហើយមានអ្នកខ្លះទៅតាមផ្លូវជាតិ មិនបាន ទៅផ្លូវតូចៗ ហើយអ្នកខ្លះទៀតជិះឡាន តែនៅសល់៣០០ម៉ែត្រចុះដើរ ក៏មានដែរ ចុះដើរហើយគាត់ថា ផ្ទះគាត់នៅខាងមុខនេះ យើងធ្វើម៉េច?”។សម្ដេចបន្ថែមថា “ខ្ញុំតែតែងណែនាំផ្ដល់នូវមតិយោបល់ ធ្វើម៉េចអាកប្បកិរិយារបស់មន្ដ្រីរបស់យើង គឺមិនត្រូវធ្វើនាំឲ្យប៉ះពាល់ ឬក៏ឈាន់មានការផ្ទុះសាវ៉ាយ អំពើ ហិង្សា ទាំងនោះទេ”។
ក្នុងពិធីប្រគល់រថយន្ដជូនស្នងការដ្ឋានគរបាលខេត្ត និងប្រគល់សម្ភារមួយចំនួន ដើម្បីការពារជំងឺ កូវីដ-១៩ ជូនអគ្គនាយកដ្ឋានចំណុះក្រសួងមហាផ្ទៃ នៅទីស្ដីការក្រសួងមហាផ្ទៃ នាព្រឹកថ្ងៃទី១៣ ខែមេសា ឆ្នាំ២០២០ សម្ដេចក្រឡាហោម ស ខេង បានមានប្រសាសន៍ អរគុណទៅដល់សមត្ថកិច្ច និងអាជ្ញាធរទាំងអស់ ដែលចូលរួមគាំទ្រគោលការណ៍វិធានការទប់ស្កាត់ជំងឺកូវីដ-១៩ និងបានអរគុណដល់មន្ដ្រីក្រសួងមហាផ្ទៃទាំងអស់ ដែលបានកាត់ប្រាក់ខែផ្ទាល់ខ្លួន ដើម្បីប្រយុទ្ធប្រឆាំងនឹង កូវីដ-១៩នេះផងដែរ។
សម្ដេចមានប្រសាសន៍ថា “មកដល់ពេលនេះជំងឺនេះ (ជំងឺកូវីដ) មិនទាន់ស្រាកស្រាន្ដ នៅលើសកលលោកយើងនេះ ដែលពីមួយថ្ងៃ ទៅមួយថ្ងៃ មានការកើនឡើងយ៉ាងច្រើន ហើយអ្នកស្លាប់ក៏មានកើនឡើង។ ដោយឡែកសម្រាប់កម្ពុជារបស់យើង មកទល់ពេលនេះ មាន១២២កំពុងឆ្លង ហើយបានជាសះស្បើយ៧៧ នៅក្នុងពេទ្យ៤៥ ប៉ុន្ដែមិនមានអ្នកស្លាប់ទេ”។
សម្ដេចក្រឡាហោមបន្ដថា ដូច្នេះមានន័យថា ការយកចិត្តដាក់របស់មន្ដ្រី ក្រសួងសុខាភិបាល ក៏ដូចជាប្រជាពលរដ្ឋគ្រប់រូបធ្វើឲ្យជំងឺកូវីដ-១៩ មិនអាចយកឈ្នះបាន។ សម្ដេចក្រឡាហោមក៏សង្ឃឹមថា នាពេលខាងមុខនេះ នឹងទទួលបានលទ្ធផលល្អកាន់តែប្រសើរ ក្នុងករណីដែលភាគីពាក់ព័ន្ធបានខិតខំប្រឹងប្រែង ទប់ស្កាត់នៅជំងឺនេះផងដែរ ប៉ុន្ដែនិយាយដូច្នេះ ភាគីពាក់ព័ន្ធក៏មិនត្រូវបន្ធូដៃឡើយ ត្រូវតែបន្ដបន្ថែមទៀត ដើម្បីចាត់វិធាន គ្រប់បែបយ៉ាងដែលអាចធ្វើទៅបាន។ សម្ដេចក្រឡាហោម រំលឹកថា នាពេលកន្លងទៅ រាជរដ្ឋាភិបាល ចេញវិធានការ មិនឲ្យធ្វើចរាចរណ៍ ពីខេត្តមួយ ទៅខេត្តមួយ ដើម្បីទប់ស្កាត់ការរីករាលនៃជំងឺកូវីដ-១៩ ដែលកំពុងកើតមានឡើង ហើយបានលើកពេល ថ្ងៃឈប់សម្រាក បុណ្យចូលឆ្នាំខ្មែរ ។
សម្ដេចក្រឡាហោមឧបនាយករដ្ឋមន្ត្រី បានមានប្រសាសន៍ថា មកដល់ពេលនេះ ពិភពលោកមិនទាន់មានភាពធូរស្រាលពីជំងឺកូវីដ១៩នៅឡើយទេ ពីព្រោះតែអត្រាអ្នកឆ្លង និងអ្នកស្លាប់នៅតែស្ថិតក្នុងកំណើនខ្ពស់ជារៀងរាល់ថ្ងៃ។ ប៉ុន្តែសម្រាប់ប្រទេសកម្ពុជា ពេលនេះមិនទាន់មានអ្នកជំងឺណាម្នាក់ស្លាប់នៅឡើយទេ ដោយសារគ្រប់ភាគីពាក់ព័ន្ធនៅកម្ពុជាមានការយកចិត្តទុកដាក់ខ្ពស់ ទាំងរាជរដ្ឋាភិបាល ក្រុមគ្រូពេទ្យ និងប្រជាពលរដ្ឋ ដើម្បីប្រយុទ្ធតទល់នឹងជំងឺកូវីដ១៩នេះ។
យ៉ាងណាក៏ដោយ សម្ដេចក្រឡាហោម ស ខេង បានមានប្រសាសន៍ថា ស្ថានភាពប្រសើរនៃការប្រយុទ្ធប្រឆាំជំងឺកូវីដ១៩នៅកម្ពុជាដូចសព្វថ្ងៃនេះ មិនមែនមានន័យថាយើងទទួលបានជោគជ័យលើសមរភូមិជំងឺកូវីដ១៩នោះឡើយ ពោលគឺទាមទារឱ្យមានការប្រុងប្រយ័ត្នជានិច្ចពីគ្រប់ភាគីពាក់ព័ន្ធទាំង់អស់ ហើយក្នុងនាមរាជរដ្ឋាភិបាលកម្ពុជា សម្ដេចបានមានប្រសាសន៍នឹងថាខិតខំប្រឹងប្រែងប្រយុទ្ធប្រឆាំងនឹងជំងឺនេះគ្រប់ស្ថានភាព ដើម្បីការពារសេចក្ដីសុខសុវត្ថិភាព និងអាយុជីវិតប្រជាពលរដ្ឋ។
សម្ដេចឧបនាយករដ្ឋមន្ត្រីក៏បានថ្លែងការអរគុណ និងកោតសរសើរចំពោះការខិតខំប្រឹងប្រែងរបស់ថ្នាក់ដឹកនាំមន្ត្រីរាជការ កងកម្លាំងចម្រុះ អាជ្ញាធរមូលដ្ឋានគ្រប់លំដាប់ថ្នាក់ ដែលបានខិតខំប្រឹងប្រែងប្រគៀកស្មាគ្នាជួយប្រទេសជាតិ ដោយមានខ្លះបានបរិច្ចាគប្រាក់ខែ តិចឬច្រើនទៅតាមលទ្ធភាព និងការស្ម័គ្រចិត្ត ថ្នាក់ដឹកនាំខ្លះក៏បានបរិច្ចាគសម្រាប់ជួយមន្ត្រីក្នុងក្រសួង និងថ្នាក់ដឹកនាំមន្ត្រីខ្លះទៀត បានជួយគាំទ្រដល់រដ្ឋបាលថ្នាក់ក្រោមជាតិ ពិសេសនៅថ្នាក់មូលដ្ឋាន ដែលនេះគឺជាការបង្ហាញនូវសាមគ្គីភាព។
សម្ដេចក្រឡាហោម ស ខេង ក៏បានថ្លែងកោតសរសើរថ្នាក់ដឹកនាំ និងមន្ត្រីទាំងអស់ ដែលបានសហការរួមគ្នាខិតខំប្រឹងប្រែងបំពេញភារកិច្ចយ៉ាងសកម្មនៅក្នុងបរិបទនៃជំងឺកូវីដ១៩ ដូចជាការទទួលបងប្អួនខ្មែរវិលត្រឡប់ពីក្រៅប្រទេស ពិសេសប្រទេសថៃ ការអនុវត្តវិធានការបិទការធ្វើដំណើរឆ្លងខេត្តតាមបទបញ្ជារបស់រាជរដ្ឋាភិបាល និងការស្រាវជ្រាវ តាមដាន ពិនិត្យសុខភាព និងរៀបចំដាក់ឱ្យដាច់ដោយឡែកសម្រាប់បងប្អូនប្រជាពលរដ្ឋដែលមានការសង្ស័យ ឬទើបវិលត្រឡប់មកពីក្រៅប្រទេស នៅតាមមូលដ្ឋានភូមិឃុំ។
ពាក់ព័ន្ធនឹងជំនួយថវិកា និសម្ភារ ដែលសប្បុរសជននានា បានផ្ដល់ជូនរដ្ឋបាលរាជធានី ខេត្ត សម្រាប់ប្រើប្រាស់ក្នុងបេសកកម្មទប់ស្កាត់ជំងឺកូវីដ១៩ សម្ដេចក្រឡាហោម ស ខេង បានថ្លែងបញ្ជាក់ថារាជរដ្ឋាភិបាល ទុកលទ្ធភាពឱ្យរដ្ឋបាលរាជធានី ខេត្ត ជាអ្នកចាត់ចែងប្រើប្រាស់តាមតម្រូវការជាក់ស្ដែង។ យ៉ាងណាក៏ដោយសម្ដេចបានអំពាវនាវឱ្យថ្នាក់ដឹកនាំរាជធានី ខេត្ត ប្រើប្រាស់ថវិកាទាំងនោះឱ្យចំគោដៅ និងតម្លាភាព ដើម្បីផ្ដល់ភាពកក់ក្ដៅដល់ភាគីម្ចាស់ជំនួយដែលបានលះបង់ថវិកាដើម្បីចូលរួមទប់ស្កាត់ជំងឺកូវីដ១៩។
ពាក់ព័ន្ធនឹងថវិកា និងសម្ភារទប់ស្កាត់ជំងឺកូវីដ១៩ ដែលនៅសល់បន្ទាប់ពីការបែងចែក លើកលែងតែសម្លៀកបំពាក់ការពារជំងឺកូវីដ១៩ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានមានប្រសាសន៍ជម្រាបទៅកាន់អង្គពិធីថាសម្ដេចក្នុងនាមប្រធានក្រុមការងារចុះជួយខេត្តបាត់ដំបង និងខេត្តព្រៃវែង សូមបែងចែកផ្ដល់ជូនបណ្ដាក្រុងស្រុកនៃខេត្តទាំងពីរ និងគោលដៅផ្សេងទៀត សរុបចំនួន៣១គោលដៅ។
សម្ដេចទទួលស្គាល់ថាជំនួយទាំងនេះគឺមិនទាន់គ្រប់គ្រាន់នៅឡើយទេ ប៉ុន្តែនេះគឺជាការបែងចែកដើម្បីរួមចំណែកសម្រាលការលំបាក ហើយថាសម្ភារៈឧបករណ៍ទាំងអស់នេះ ក៏មិនមែនជាមូលដ្ឋានវាយតម្លៃថាយើងនឹងអាចទប់ស្កាត់ជំងឺកូវីដ១៩បានដែរ ពោលគឺសម្ភារៈទាំងអស់នេះ គឺគ្រាន់តែជាផ្នែកមួយនៃការចូលរួបទប់ស្កាត់ និងការពារជំងឺកូវីដ១៩ប៉ុណ្ណោះ ដែលសំខាន់នោះគឺត្រូវតែមានការប្រុងប្រយ័ត្នគ្រប់ពេលវេលា ដោយត្រូវគោរពតាមគោលការណ៍ណែនាំរបស់ក្រសួងសុខាភិបាល រាប់ទាំងការប្រើម៉ាស់ និងលាងដៃជាដើម។
ឆ្លៀតនៅក្នុងឱកាសនោះដែរ សម្ដេចបានបន្តគូសបញ្ជាក់ជាថ្មីទៀតនូវការអនុវត្តគោលនយោបាយភូមិឃុំមានសុវត្ថិភាព ដោយសម្ដេចបានសង្កត់ធ្ងន់ថានៅពេលភូមិឃុំទាំងអស់មានសុវត្ថិភាព គឺមានន័យថាមាតុភូមិរបស់យើងមានសុខសន្តិភាពសុវត្ថិភាព ហើយដើម្បីសម្រេចបានគឺទាមទារជាចាំបាច់នូវការចូលរួមរបស់ពលរដ្ឋ ការលើកកម្ពស់សមត្ថភាពមន្ត្រី និងការបំពាក់ឧបកណ៍សម្ភារ និងបំពេញតម្រូវការថវិកា។
ពាក់ព័ន្ធនឹងការអនុវត្តបទបញ្ជារបស់រាជរដ្ឋាភិបាលសម្រាប់ការបិទបំរាមគោលចរឆ្លងកាត់ខេត្តនឹងខេត្ត លើកលែងតែរវាងរាជធានីភ្នំពេញ និងខេត្តកណ្ដាល សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានថ្លែងផ្ដល់ការលើកចិត្តជូនថ្នាកដឹកនាំខេត្ត អាជ្ញាធរ និងកងកម្លាំងទាំងអស់ សូមបន្តអនុវត្តភារកិច្ចឱ្យបានជោគជ័យ ទាំងតាមបទបញ្ជារបស់រាជរដ្ឋាភិបាល និងការរក្សាសន្តិសុខសណ្ដាប់សាធារណៈ និងសុវត្ថិភាពសង្គម និងបានអំពានាវជាថ្មីទៀតសូមបងប្អូនប្រជាពលរដ្ឋគោរពតាមវិធានការរបស់រាជរដ្ឋាភិបាល ដើម្បីទប់ស្កាត់ការឆ្លងជំងឺកូវីដ១៩ ៕