តាកែវ ៖ រដ្ឋមន្ត្រីក្រសួងកសិកម្ម បានស្នើឲ្យរោងម៉ាស៊ីនកិនស្រូវទូទាំងខេត្តតាកែវ ជួយទិញប្រមូលស្រូវ ពីប្រជាកសិករ យកមកស្តុកទុកឱ្យអស់លទ្ធភាព ដើម្បីជួយដោះស្រាយទីផ្សារស្រូវរបស់ពួកគាត់ និងជួយធានានូវបរិមាណស្តុកស្រូវ ដើម្បីធានាសុវត្ថិភាពស្បៀងសម្រាប់រយៈពេលវែង ជាពិសេសក្រុមហ៊ុន ត្រូវអនុវត្តតាមបទបញ្ជារបស់រដ្ឋាភិបាល ហាមនាំចេញអង្ករស។
នាព្រឹកថ្ងៃចន្ទទី១៣ ខែមេសា ឆ្នាំ២០ ២០ ដែលជាថ្ងៃទី១ នៃថ្ងៃចូលឆ្នាំថ្មីប្រពៃណីជាតិខ្មែរ ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ រួមដំណើរជាមួយដោយឯកឧត្តម អ៊ូច ភា អភិបាលនៃគណអភិបាលខេត្តតាកែវ ឯកឧត្តម ងិន ឆាយ ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយក នៃអគ្គនាយកដ្ឋានកសិកម្ម សហការី និងប្រធានមន្ទីរកសិកម្ម រុក្ខាប្រមាញ់ និងនេសាទ បានមកពិនិត្យខ្សែសង្វាក់ផលិតកម្ម (ឡសម្ងួត ឃ្លាំងស្តុក ម៉ាស៊ីនកិន វេចខ្ចប់ និងមន្ទីរ ពិសោធន៍) ក្នុងរោងម៉ាស៊ីនកិនស្រូវហ្គោដិនដូនកែវ នៅសង្កាត់រកាក្រៅ ក្រុងដូនកែវ។
លោក ថៃ វីឡុង អ្នកគ្រប់គ្រងទូទៅរោងម៉ាស៊ីន បានរាយការណ៍ជូនឯកឧត្តមរដ្ឋមន្ត្រីថា ក្នុងឆ្នាំ២០១៩ ក្រុមហ៊ុនប្រមូលទិញស្រូវ គ្រប់ប្រភេទបានចំនួន ៩៦.៣៨៦តោន និងឆ្នាំ២០២០ នេះបាន ៦៥.៣៧៥ តោន។ ដោយឡែក ក្នុងឆ្នាំ២០១៩ នាំចេញបាន ៤០.១៧៥តោន និង ៣ខែដើមឆ្នាំ២០២០ នាំចេញបាន ២៤.៤២៨តោន ភាគច្រើនទៅកាន់ប្រទេសចិន។ បច្ចុប្បន្ន មានឡសម្ងួតចំនួន ៣ អាចសម្ងួតស្រូវបាន ៥៥០តោនក្នុង ១ថ្ងៃ និងមានស្រូវស្តុកទុកចំនួន ៧ពាន់តោន រង់ចាំកិន និងនាំចេញតាមការបញ្ជាទិញ ពីខាងក្រៅ។ ទន្ទឹមនឹងនេះ ក្រុមហ៊ុនក៏នៅជួបមានជួបបញ្ហាប្រឈម នឹងការប្រគួតប្រជែង ជាមួយប្រទេសជិតខាង ទាក់ទងទៅនឹងតម្លៃភ្លើង និងការដឹកជញ្ជូន ដែលនៅមានតម្លៃខ្ពស់នៅឡើយ ។
ក្នុងឱកាសនោះដែរ ឯកឧត្តមរដ្ឋមន្ត្រី បានសម្តែងការជឿជាក់លើរោងម៉ាស៊ីនថា នឹងបន្តចូលរួមសហការ ឲ្យបានល្អ ដើម្បីជួយជំរុញការនាំចេញមាសស ឲ្យទទួលបានជោគជ័យ តាមគោលដៅរំពឹងទុក និងជាពិសេសចូលរួមសហការ អនុវត្តបទបញ្ជារបស់រាជរដ្ឋាភិបាល ហាមនាំចេញអង្ករស បានពេញលេញ។ មួយវិញទៀត រោងម៉ាស៊ីនកិនស្រូវ ទូទាំងខេត្តតាកែវ ត្រូវជួយទិញប្រមូលស្រូវ ពីប្រជាកសិករ យកមកស្តុកទុកឱ្យអស់លទ្ធភាព ដើម្បីជួយដោះស្រាយទីផ្សារ ស្រូវរបស់ពួកគាត់ និងជួយធានានូវបរិមាណស្តុកស្រូវ ដើម្បីធានាសុវត្ថិភាពស្បៀងសម្រាប់រយ:ពេលវែង។
តាមរបាយការណ៍របស់អគ្គនាយកដ្ឋានកសិកម្ម បានឱ្យដឹងថា ក្នុងឆ្នាំ២០១៩ កន្លងមកមានចំនួនជាង ១០,៨៨ លានតោន ក្នុងនេះសម្រាប់ស្រូវវស្សាទទួលបានបរិមាណផលសរុបចំនួន ៨ ២៦៩ ៣៣៣តោន និងស្រូវ ប្រាំង ២ ៦១៦ ២៤១តោន។ ដោយឡែក ខេត្តតាកែវ បរិមាណស្រូវសរុបទាំងវស្សា និងប្រាំងចំនួន ១ ២០៨ ៦៤០តោន ហើយមកទល់ពេលនេះគឺនៅសល់ផ្ទៃដីស្រែប្រាំងចំនួន ៤ពាន់ហ.តទៀត មិនទាន់បានប្រមូលផល គិតជាបរិមាណស្រូវប្រមាណ ១៦ពាន់តោនទៀត៕ ដោយ៖កូឡាប
