ភ្នំពេញ៖ រដ្ឋមន្ត្រីក្រសួងអប់រំ អំពាវនាវដល់ធនាគារជាតិនៃកម្ពុជា ជួយធ្វើអន្តរាគមន៍ជាមួយធនាគារពាណិជ្ជ និងគ្រឹះស្ថានហិរញ្ញវត្ថុ ដែលបានផ្តល់ប្រាក់កម្ចី ដល់គ្រឹះស្ថានសិក្សាមួយចំនួន សូមឲ្យពិចារណាបញ្ចុះអត្រាការប្រាក់ និងពន្យារការទូទាត់សំណង ទៅតាមលទ្ធភាព ដើម្បីដោះបន្ទុកមួយចំនួន ដែលរងផលប៉ះពាល់ពីជំងឺកូវីដ១៩។
ឯកឧត្តមបណ្ឌិតសភាចារ្យ ហង់ ជួនណារ៉ុន រដ្ឋមន្ត្រីក្រសួងអប់រំយុវជននិងកីឡា បានចេញសេចក្តីណែនាំ ស្តីពីការលើកម្ពស់ការបង្រៀន និងរៀនពីចម្ងាយ ឬតាមប្រព័ន្ធអេឡិចត្រូនិក ដោយគ្រឹះស្ថានសិក្សាឯកជនគ្រប់កម្រិត។
ឯកឧត្តមរដ្ឋមន្ត្រី បានថ្លែងថា ក្នុងអំឡុងពេលនៃការរីករាលដាលនៃជំងឺកូវីដ១៩នេះ ក្រសួងអប់រំយុវជននិងកីឡា សូមលើកទឹកចិត្តឲ្យគ្រឹះស្ថានសិក្សាឯកជន លើកកម្ពស់ការបង្រៀន និងរៀនតាមប្រព័ន្ធសិក្សាពីចម្ងាយ ឬប្រព័ន្ធអេឡិចត្រូនិក ដើម្បីផ្តល់ឱកាសឲ្យសិស្សានុសិស្ស អាចបន្តការសិក្សា និងកាត់បន្ថយហានិភ័យ ដែលសិស្ស និស្សិត អាចនឹងប្រឈមមុខនៅពេលដែលគេទៅជួបជុំនៅដែលមានហានិភ័យ ក្នុងគោលដៅចូលរួមចំណែកជាមួយរាជរដ្ឋាភិបាលកម្ពុជា ក្នុងការបង្ការនិងទប់ស្កាត់ការឆ្លង និងរីករាលដាល់នៃជំងឺកូវីដ១៩។
ឯកឧត្តម បានស្នើដល់គ្រឹះស្ថានសិក្សាត្រូវធានាស្តង់ដារសុខភាព និងសុខុមាលភាពរបស់បុគ្គលិ និងសិស្សានុសិស្ស ដោយមិនត្រូវមានការចាប់បង្ខំ និងត្រូវរៀបចំកាលវិភាគការងារ ដែលជួយដល់បុគ្គលិក និងសិស្សានុសិស្ស កំពុងស្ថិតនៅក្នុងស្ថានភាពដែលមិនធម្មតានេះ។
“ក្រសួងអប់រំយុវជននិងកីឡា សូមអំពាវនាវដល់ម្ចាស់ទីតាំងដីដែលត្រូវបានជួលសម្រាប់ដំណើរការគ្រឹះស្ថានសិក្សាមួយចំនួន ឲ្យបញ្ចុះតម្លៃឈ្នួលតាមភាពជាក់ស្តែង ដើម្បីដោះបន្ទុកមួយចំនួនដែលរងផលប៉ះពាល់ពីជំងឺកូវីដ១៩ និងរកដំណោះស្រាយឈ្នះឈ្នះសម្រាប់ទាំងអស់គ្នា។ ក្រសួង ក៏សូមអំពាវនាវដល់ធនាគារជាតិនៃកម្ពុជា សូមធ្វើអន្តរាគមន៍ជាមួយធនាគារពាណិជ្ជ និងគ្រឹះស្ថានហិរញ្ញវត្ថុទាំងអស់ ដែលបានផ្តល់ប្រាក់កម្ចីដល់គ្រឹះស្ថានសិក្សាមួយចំនួន សូមឲ្យពិចារណាបញ្ចុះអត្រាការប្រាក់ និងពន្យារការទូទាត់សំណងទៅតាមលទ្ធភាព ដើម្បីដោះបន្ទុកមួយចំនួនដែលរងផលប៉ះពាល់ពីជំងឺកូវីដ១៩” ឯកឧត្តមរដ្ឋមន្ត្រីបញ្ជាក់ដូច្នេះ៕ ដោយ៖កូឡាប