ភ្នំពេញ៖ លោកជំទាវ ឱ វណ្ណឌីន អ្នកនាំពាក្យនិងជារដ្ឋលេខាធិការក្រសួងសុខាភិបាល បានថ្លែងថា រហូតម៉ោង ៨ព្រឹក ថ្ងៃទី ១៤ មេសា ២០២០ យើងពុំរកឃើញអ្នកជំងឺ COVID-19 ករណីថ្មី ជាសរុបប្រទេសយើងមានចំនួន ១២២ករណី ដដែល និង ១៤ករណីជាសះស្បើយ សរុប ៩១នាក់។ លោកជំទាវ បានបញ្ជាក់ថា នៅប្រទេសកម្ពុជាពុំទាន់មានអ្នកស្លាប់ដោយសារជំងឺដ៏កាចសាហាវនេះទេ ។
លោកជំទាវ បានថ្លែងបន្តថា យើងរកឃើញភ័ស្តុតាងបញ្ជាក់ថា មានការឆ្លងក្នុងសហគមន៍តែនៅទំហំតូច (ព្រោះអ្នកជំងឺរកឃើញថ្មីៗនេះ រហូតពេលនេះពុំរកឃើញប្រភពចម្លង) ដូច្នេះសូមបងប្អូនបន្តប្រយ័ត្នជាប់ជានិច្ច ដោយធ្វើអនាម័យ នៅឃ្លាតឆ្ងាយពីគ្នា មិនចេញក្រៅផ្ទះបើមិនចាំបាច់ ។
បើតាមសេចក្តីប្រកាសរបស់ក្រសួងសុខាភិបាល ថា នៅថ្ងៃទី១៤ ខែមេសា ឆ្នាំ២០២០នេះ អ្នកជំងឺកូវីដ១៩ បានជាសះស្បើយរហូតដល់ ១៤នាក់ថ្មីទៀត ធ្វើឲ្យចំនួនអ្នកជាសះស្បើយកើនឡើងរហូតដល់៩១នាក់ ហើយពិសេសបំផុតគ្មានអ្នកឆ្លងជំងឺកូវីដថ្មីទេ។ ចំណែកអ្នកកំពុងសម្រាកព្យាបាលជំងឺកូវីដធ្លាក់ចុះមកត្រឹមចំនួន៣១នាក់ នៃអ្នកឆ្លងសរុប១២២នាក់។
ករណីជាសះស្បើយមាន១៤នាក់រួមមាន៖ បុរសជនជាតិបារាំង ៣នាក់ គឺអាយុ៦៦ឆ្នាំ អាយុ៦១ឆ្នាំ និងអាយុ៥៨ឆ្នាំ។ ស្ត្រីជនជាតិបារាំង ៧នាក់ គឺអាយុ៥៩ឆ្នាំ អាយុ៦៦ឆ្នាំ អាយុ៦០ឆ្នាំ អាយុ៦០ឆ្នាំ អាយុ៦៩ឆ្នាំ អាយុ៦០ឆ្នាំ និងអាយុ៥៩ឆ្នាំ។ បុរសនិងស្ត្រី ទាំង១០នាក់ខាងលើ ជាអ្នកទេសចរបារាំង មកលេងក្រុងព្រះសីហនុ បានព្យាបាលជាសះស្បើយ ដោយទទួលបានលទ្ធផលតេស្តអវិជ្ជមានវីរុសកូវីដ១៩ ចំនួន២លើក ត្រូវបានដាក់នៅដាច់ដោយឡែក តាមបន្ទប់នៅសណ្ឋាគារ ក្នុងក្រុងព្រះសីហនុ រង់ចាំជើងហើរវិលត្រឡប់ទៅប្រទេសបារាំងវិញ។ បុរសជនជាតិឥណ្ឌូណេស៊ី២នាក់ គឺអាយុ៤១ឆ្នាំ និងអាយុ៤៤ឆ្នាំ បានទទួលការព្យាបាលជាសះស្បើយ ដោយទទួលបានលទ្ធផលតេស្តអវិជ្ជមានវីរុសកូវីដ១៩ ចំនួន២លើក ត្រូវបានអនុញ្ញាតឱ្យចេញពីមន្ទីរពេទ្យខេត្តសៀមរាប។ បុរសជនជាតិខ្មែរ២នាក់ គឺអាយុ៣៣ឆ្នាំ ជាអ្នកមគ្គុទ្ទេសក៍ទេសចរ ក្រុមទេសចរបារាំងនៅក្រុងព្រះសីហនុ និង អាយុ៣៩ឆ្នាំ មានអាសយដ្ឋាន សង្កាត់ទួលទំពូង១ ខណ្ឌចំការមន រាជធានីភ្នំពេញ បានជាសះស្បើយ ដោយទទួលបានលទ្ធផលតេស្តអវិជ្ជមានវីរុសកូវីដ១៩ ចំនួន ២លើក ត្រូវបានអនុញ្ញាតឱ្យចេញពីមណ្ឌលសុខភាពចាក់អង្រែក្រោម រាជធានីភ្នំពេញ៕ដោយ៖បញ្ញាស័ក្តិ
