បាត់ដំបង៖ ចោរកំប៉ិកកំប៉ុកនេះ សូម្បីតែរទេះនិងម៉ាស៊ីនកិនទឹកអំពៅ ក៏លួចដែរ គឺថាចោរមួយក្រុមនេះ ចេញលួច ប៉ះអ្វីយកហ្នឹងតែម្តង កុំឲ្យស៊យ ព្រោះថាទើបនឹងចេញលួចថ្មីថ្មោង។ ជនសង្ស័យចំនួន២នាក់ ដែលចេញធ្វើសកម្មភាពលួច និងឆក់កាបូបបានចំនួន៣លើក ត្រូវសមត្ថកិច្ចចាប់ខ្លួនបាន ហើយនៅថ្ងៃទី១៤ខែមេសានេះ កម្លាំងការិយាល័យជំនាញ កំពុងតែធ្វើការកសាងសំណុំរឿង ដើម្បីបញ្ជូនទៅសាលាដំបូងខេត្តបាត់ដំបងចាត់ការតាមនីតិវិធី។
កម្លាំងការិយាល័យនគរបាលព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តបាត់ដំបង បានឲ្យដឹងថា ដោយអនុវត្តតាមការណែនាំបញ្ជាផ្ទាល់ពីឯកឧត្តម ឧត្តមសេនីយ៍ទោ អ៊ុច សុខុន ស្នងការ នៃស្នងការដ្ឋាននគរបាលខេត្តបាត់ដំបង ក៏ដូចជាលោក ឧត្តមសេនីយ៍ត្រី ជេត វណ្ណនី ស្នងការរងផែនការងារនគរបាលព្រហ្មទណ្ឌ និង មានការសម្របសម្រួលទៅលើនីតិវិធីពី លោក នួន សានព្រះរាជអាជ្ញាអមសាលាដំបូងខេត្តបាត់ដំបង នៅថ្ងៃទី ១៣ ខែមេសា ឆ្នាំ ២០២០ វេលាម៉ោង ៩និង១៥ នាទី នៅចំណុចភូមិសូភី១ សង្កាត់រតនៈ ក្រុងបាត់ដំបង ខេត្តបាត់ដំបង ។
លោកវរសេនីយ៍ទោ ឈឿង គឹមសុង នាយការិយាល័យនគរបាលព្រហ្មទណ្ឌកម្រិតស្រាល បានដឹកនាំកម្លាំង ក្រុមអន្តរាគមន៍បង្ការ បង្ក្រាប សហការជាមួយកម្លាំងជំនាញចុះប្រតិបត្តិការ បង្ក្រាបករណី លួចមានស្ថានទម្ងន់ទោស ( ឆក់កាបូប ) មួយករណី និងបានធ្វើការនាំខ្លួនជនសង្ស័យចំនួន ២នាក់ ១.ឈ្មោះ អ៊ឹម រដ្ឋា ហៅ តយ ភេទប្រុស អាយុ ៣៧ ឆ្នាំ មានទីលំនៅមិនពិតប្រាកដ ។ ២.ឈ្មោះ លី សុភ័ក្រ ភេទប្រុស អាយុ ២៩ ឆ្នាំមានទីលំនៅភូមិសុភី១ សង្កាត់រតនៈ ក្រុងបាត់ដំបង ខេត្តបាត់ដំបង។
តាមចម្លើយសារភាពរបស់ជនសង្ស័យទាំង ២ នាក់ខាងលើ បានឆ្លើយសារភាពថា ៖ ខ្លួនបានធ្វើសកម្មភាពលួចចំនួន ៣ លើក គឺ- លើកទី១ ខ្លួនបានធ្វើសកម្មភាព ( ឆក់កាបូប ) នៅចំណុចភូមិព្រែកខ្ពប ឃុំព្រែកខ្ពប ស្រុកឯកភ្នំខេត្តបាត់ដំបង កាលពីថ្ងៃទី៤ ខែមេសាឆ្នាំ ២០២០ វេលាម៉ោងប្រហែល ៥ ទៀបភ្លឺ បានលុយចំនួន ៤០ ម៉ឺនរៀល និងទូរស័ព្ទដៃម៉ាកអូប៉ូមួយគ្រឿង ។ – លើកទី ២ ខ្លួនបានធ្វើសកម្មភាព ( ឆក់កាបូប ) នៅចំណុចទួលប៉ោយចារ ភូមិជ្រៃថ្មី ឃុំជ្រៃ ស្រុកថ្មគោល ខេត្តបាត់ដំបង កាលពីថ្ងៃទី ៦ ខែមេសាឆ្នាំ ២០២០ វេលាម៉ោងប្រហែល ១១និង៣០ នាទី បានលុយចំនួន ៧ ម៉ឺនរៀល និងអត្តសញ្ញាណប័ណ្ណចំនួន ២ សន្លឹក ។ – លើកទី ៣ ខ្លួនបានធ្វើសកម្មភាព ( លួចរទេះដឹកម៉ាស៊ីនកិនទឹកអំពៅ ) នៅចំណុចភូមិស្លក្រាម ឃុំវត្តតាមិម ស្រុកសង្កែ ខេត្តបាត់ដំបង នៅថ្ងៃទី១៣ ខែមេសា ឆ្នាំ ២០២០ វេលាម៉ោងប្រហែល ៣ ទៀបភ្លឺ ។ វត្ថុតាងដកហូតរួមមាន ៖ រទេះដឹកម៉ាស៊ីនកិនទឹកអំពៅចំនួន ១ កាបូបពណ៌ខ្មៅដែលជនសង្ស័យធ្វើសកម្មភាពឆក់បាន។
បច្ចុប្បន្នជនសង្ស័យរួមទាំងវត្ថុតាងខាងលើ ការិយាល័យជំនាញ កំពុងតែធ្វើការកសាងសំណុំរឿង ដើម្បីបញ្ជូនទៅសាលាដំបូងខេត្តបាត់ដំបងចាត់ការតាមនីតិវិធី ៕ដោយ៖បញ្ញាស័ក្តិ
