ភ្នំពេញ៖ មានជនបំពុលសង្គម បានសរសេរព័ត៌មានបង្ហោះក្នុងបណ្តាញសង្គមថា “ហ៊ុន ម៉ាណែត ត្រូវបានយួនចាប់ខ្លួន នៅថ្ងៃទី២៣ខែមីនា ឆ្នាំ២០២០ នៅវេលាម៉ោង១២ថ្ងៃត្រង់ នៅពេលធ្វើសមយុទ្ធ ហើយនាំយកទៅឃុំខ្លួននៅព្រៃនគរ” ។ ពាក់ព័ន្ធនឹងករណីខាងលើនេះ ឧត្តមសេនីយ៍ឯក ហ៊ុន ម៉ាណែត បានសរសេរសារនៅហ្វេសប៊ុកផ្លូវការ Hun Manet នៅថ្ងៃទី១៤ ខែមេសា ឆ្នាំ០២០២នេះថា “ជាក់ស្តែងថ្ងៃនេះ ខ្ញុំកំពុងធ្វើការនៅការិយាល័យរបស់ខ្ញុំ នៅទីបញ្ជាការដ្ឋានកងទ័ពជើងគោកតែម្តង។ រូបខ្ញុំ ក៏ដូចជានាយទាហានផ្សេងទៀត បានបន្តការងារជាធម្មតា”។
បើតាមឧត្តមសេនីយ៍ឯក ហ៊ុន ម៉ាណែត ៖ …”ខ្ញុំបានឃើញព័ត៌មាននេះ បង្ហោះប៉ុន្មានថ្ងៃមកហើយ ប៉ុន្តែខ្ញុំមិនចាប់អារម្មណ៍ ក្នុងការឆ្លើយតបទៅវិញទេ ព្រោះវាមិនមែនជាកិច្ចការសំខាន់។ អ្វីដែលជាកិច្ចការសំខាន់ចំពោះមុខ ហើយដែលខ្ញុំបានជាប់រវល់ បំពេញកិច្ចការនាពេលនេះ គឺការចូលជាមួយស្ថាប័ន និងអាជ្ញាធរពាក់ព័ន្ធ ក៏ដូចជាប្រជាពលរដ្ឋខ្មែរ រាប់លាននាក់ ដើម្បីរួមដៃគ្នា ជួយបង្ការ និងទប់ស្កាត់ ការរីករាលដាលនៃជំងឺកូវីដ១៩…”។
ឧត្តមសេនីយ៍ឯក ហ៊ុន ម៉ាណែត បានមានប្រសាសន៍បន្ថែមទៀតថា …”ទោះបីខ្ញុំមិនខ្វល់ជាមួយព័ត៌មានក្លែងក្លាយនេះក៏ដោយ ប៉ុន្តែខ្ញុំសូមជូនយោបល់ ទៅអស់លោកដែល តែងតែប្រឌិតរឿងមិនចេះចប់ សូមឲ្យយល់ពីកាលៈទេសៈខ្លះផង។ ពេលនេះ ជាពេលដែលប្រទេសជាតិ និងប្រជាជនខ្មែរទាំងមូល ត្រូវរួមសាមគ្គីគ្នា ដើម្បីបង្ការ និងទប់ស្កាត់ ជាមួយជំងឺដ៏កាចសាហាវ ដែលបានប៉ះពាល់ ដល់ប្រជាជនខ្មែរទាំងក្នុង និងក្រៅប្រទេស ក៏ដូចជា ប្រជាពលរដ្ឋ នៅលើសកលលោក មិនមែនជាពេលដែលត្រូវរកវិធីញុះញង់ បំបែកបំបាក់គ្នានោះទេ។ ជាក់ស្តែងថ្ងៃនេះ ខ្ញុំកំពុងធ្វើការនៅការិយាល័យរបស់ខ្ញុំ នៅទីបញ្ជាការដ្ឋានកងទ័ពជើងគោកតែម្តង។ រូបខ្ញុំ ក៏ដូចជានាយទាហានផ្សេងទៀត បានបន្តការងារជាធម្មតា ទោះបីស្ថិត ក្នុងឱកាសបុណ្យចូលឆ្នាំថ្មីក៏ដោយ ហើយក៏កំពុងត្រៀមលក្ខណៈ ដើម្បីចូលរួមសង្គ្រោះប្រជាពលរដ្ឋ ក្នុងហេតុការណ៍ចាំបាច់ណាមួយ”។
សូមបញ្ជាក់ថា ផេកហ្វេសប៊ុកមួយមានឈ្មោះថា Kantana Mich បានសរសេរសារថា ព័ត៌មានផ្ទៃក្នុង ហ៊ុន ម៉ាណែត ត្រូវបានយួនចាប់ខ្លួននៅថ្ងៃទី២៣ខែមីនា ឆ្នាំ២០២០ នៅវេលាម៉ោង១២ថ្ងៃត្រង់ នៅពេលធ្វើសមយុទ្ធហើយនាំយកទៅឃុំខ្លួននៅព្រៃនគរ ក្នុងសណ្ឋាគារកម្ពស់៦ជាន់៕ដោយ៖កូឡាប