ភ្នំពេញ៖ ក្នុងកិច្ចប្រជុំកំពូលអាស៊ានពិសេស ស្ដីពីជំងឺ Covid-19 តាមរយៈប្រព័ន្ធវីដេអូ (Video Conference) នៅព្រឹកថ្ងៃទី១៤ ខែមេសា ឆ្នាំ២០២០នេះ សម្ដេចតេជោ ហ៊ុន សែន នាយករដ្ឋមន្រី្តនៃកម្ពុជា បានមានប្រសាសន៍ថា អាស៊ានត្រូវគិតគូរជាយុទ្ធសាស្ត្រ ក្នុងការស្តារ និងងើបឡើងវិញនូវកំណើនសេដ្ឋកិច្ច បន្ទាប់ពីវិបត្តិជំងឺឆ្លងកូវីដ១៩ ត្រូវបានបញ្ចប់។
សម្ដេចតេជោ ហ៊ុន សែន បានមានប្រសាសន៍បន្តថា កម្ពុជាយល់ថា អាស៊ានត្រូវពន្លឿនការអនុវត្តផែនការ និងយន្តការនានា ដែលមានស្រាប់ឲ្យបានលឿន ក៏ដូចជាជំរុញការធ្វើសមាហរណកម្មសេដ្ឋកិច្ចតំបន់ លុបបំបាត់របាំងមិនមែនពន្ធ និងបង្កើនសម្រួលពាណិជ្ជកម្ម។
បន្ថែមលើសពីនេះ សម្តេចតេជោ បានគូសបញ្ជាក់ថា អាស៊ានក៏ត្រូវជំរុញការអនុវត្តគំនិតផ្តួចផ្តើមនានា សម្រាប់សមាហរណកម្មអាស៊ាន ដោយផ្តោតលើ៣ចំណុច ទី១ ការលើកកម្ពស់សហគ្រាសមីក្រូ តូច និងមធ្យម (MSMEs) និងបង្កើតធុរកិច្ចថ្មីផ្អែកលើនុវាវត្តន៍បច្ចេកវិទ្យា (Start-Up) ទី២ ការលើកកម្ពស់កិច្ចសហការរវាងវិស័យឯកជន និងសាធារណៈ ក្នុងក្របខ័ណ្ឌសេដ្ឋកិច្ចឌីជីថល និងទី៣ ការអភិវឌ្ឍធនធានមនុស្ស និងជំនាញវិជ្ជាជីវៈឌីជីថល។
សូមជម្រាបថា ក្នុងកិច្ចប្រជុំកំពូលអាស៊ានពិសេស ស្ដីពីជំងឺ Covid-19 បានសង្កត់ធ្ង់លើការរីករាលដាលនៃជំងឺឆ្លងកូវីដ១៩ ដែលបានកំពុងបង្កផលប៉ះពាល់ កាន់តែខ្លាំងដល់ការអភិវឌ្ឍន៍ អាស៊ានជារួម ដោយមិនគ្រាន់តែលើប្រព័ន្ធសុខាភិបាលប៉ុណ្ណោះទេ ប៉ុន្តែក៏បានប៉ះពាល់ដល់វិស័យទេសចរណ៍ ពាណិជ្ជកម្ម ហិរញ្ញវត្ថុ ឧស្សាហកម្ម ក៏ដូចជាជីវភាពរស់នៅរបស់ប្រជាជនទូទៅផងដែរ៕ដោយ៖សម្ផស្ស
