ភ្នំពេញ៖ ក្រុមហ៊ុន អ អិម អេ (ខេមបូឌា) ម.ក និងក្រុមហ៊ុន អេសប៊ីអាយ រ៉ូយ៉ាល់ ស៊ីឃ្យួរឹធី បានបញ្ចាក់ថា កាលបរិច្ចេទបរិវិសកម្មសម្រាប់ការបោះផ្សាយ លក់សញ្ញាប័ណ្ណសាជីវកម្ម ជាសាធារណៈ របស់ក្រុមហ៊ុន អ អិម អេ (ខេមបូឌា) ម.កបានប្រពឹត្តទៅប្រកបដោយជោគជ័យ។
កាលបរិច្ចេទបរិវិសកម្មចាប់ពីថ្ងៃទី៦ ដល់ថ្ងៃទី៨ ខែមេសា ឆ្នាំ២០២០ ដោយមានសញ្ញាប័ណ្ណសាជីវកម្មសរុបចំនួន ៨០០.០០០ សញ្ញាប័ណ្ណ ត្រូវបានបញ្ជាទិញ និងបែងចែកជូនវិនិយោគិន ចំនួន ៣ ស្ថាប័ន។ លទ្ធផលនៃការធ្វើបរិវិសកម្មនេះ បានទទួលការអនុញ្ញាតរួចមកហើយ ពីគណៈកម្មការមូលបត្រកម្ពុជា (គ.ម.ក)។
ក្រុមហ៊ុន អ អិម អេ (ខេមបូឌា) ម.ក និង ក្រុមហ៊ុន អេសប៊ី-អាយ ស៊ីឃ្យួរឹធី ថ្លែងអំណរគុណ ដល់ការគាំទ្រ នៅគ្រប់ដំណាក់កាលពី ក្រសួងសេដ្ឋកិច្ច និងហិរញ្ញវត្ថុ គណៈកម្មការមូលបត្រកម្ពុជា ក្រុមហ៊ុនផ្សារមូលបត្រកម្ពុជា និងទីប្រឹក្សាសញ្ញាប័ណ្ណសាជីវកម្ម អ អិម អេ ខេមបូឌា ទាំងអស់ ដើម្បីសម្រេចបានលទ្ធផលជោគជ័យ ដូចថ្ងៃនេះ ហើយសង្ឈឹមយ៉ាងមុតមាំ នូវការគាំទ្របន្ថែមទៀត នៅពេលអនាគត។
ថ្ងៃចុះបញ្ជីផ្លូវការរបស់សញ្ញាប័ណ្ណសាជីវកម្មនេះ ត្រូវបានរំពឹងទុកនៅថ្ងៃទី២៩ ខែមេសា ឆ្នាំ២០២០ ខាងមុខនេះ។ សញ្ញាប័ណ្ណសាជីវកម្មរបស់ ក្រុមហ៊ុន អ អិម អេ (ខេមបូឌា) ម.ក នឹងក្លាយជាសញ្ញាប័ណ្ណសាជីវកម្ម ដែលមានការធានាដោយ ស្ថាប័ន CGIF ដំបូងបំផុត របស់ក្រុមហ៊ុនឯកជន ដែលបានបោះផ្សាយលក់ នៅទីផ្សារមូលបត្រ ក្នុងព្រះរាជាណាចក្រកម្ពុជា៕ដោយ៖សម្ផស្ស
