ភ្នំពេញ៖ នៅដើមខែមេសានេះ ក្រុមប្រឹក្សាអភិវឌ្ឍន៍កម្ពុជា (CDC) បានចេញវិញ្ញាបនបត្រ ចុះបញ្ជីចុងក្រោយដល់គម្រោងវិនិយោគចំនួន ១៥ ដែលមានទឹកប្រាក់សរុប ២២៥,៥ លានដុល្លារ ដោយរំពឹងថា នឹងបង្កើតការងារជូនពលរដ្ឋបានចំនួន ៧.៦២០ កន្លែង។
បើយោងតាម CDC គម្រោងនេះ គ្របដណ្តប់លើវិស័យជាច្រើន ដូចជា វិស័យកាត់ដេរសម្លៀកបំពាក់ ផ្លាស្ទិច ដែក ម្សៅ និងដំឡូងមីកែច្នៃ ផលិតនិងដំឡើងបន្ទះសូឡា កសិដ្ឋានចេក សណ្ឋាគារលំដាប់ផ្កាយ៣ និងមន្ទីរពេទ្យជាដើម។ គម្រោងវិនិយោគ មន្ទីរពេទ្យរបស់ ក្រុមហ៊ុន Sing-Specialists Medical Centre ដែលមានគ្រែពេទ្យចំនួន ៥០ ស្ថិតនៅលើផ្លូវលេខ ៨១ ក្នុងសង្កាត់បឹងរាំង ១០ ក្នុងខណ្ឌដូនពេញ រាជធានីភ្នំពេញ គ្រោងចាយថវិកា ៩៦,១ លានដុល្លារ។ គម្រោងវិនិយោគសណ្ឋាគារលំដាប់ផ្កាយ៣ របស់ក្រុមហ៊ុន Xigangyihao International Investment ដែលមាន ៧១០ បន្ទប់ ស្ថិតនៅក្នុងភូមិសង្កាត់លេខ៣ ក្នុងក្រុងព្រះសីហនុខេត្ត ព្រះសីហនុ គ្រោងចាយទឹកប្រាក់ ៥៩,២ លានដុល្លារ ។ ចំណែកឯគម្រោងវិនិយោគ រោងចក្រកែច្នៃដែករបស់ក្រុមហ៊ុន Hong De Sheng នៅក្នុងភូមិត្រពាំងក្រសាំង ឃុំត្រពាំងក្រសាំង ក្នុងស្រុកឧដុង្គ ខេត្តកំពង់ស្ពឺ គ្រោងទឹកប្រាក់ ១៦,៧ លានដុល្លារ។
ជាមួយគ្នានេះ គម្រោងផ្សេងៗទៀត រួមមាន គម្រោងចម្ការចេក ១២,៣ លានដុល្លាររបស់ក្រុមហ៊ុន Yql (Cambodia) Investment ស្ថិតនៅក្នុងភូមិបឹងកេត ឃុំបឹងកេត ស្រុកស្ទឹងត្រង់ ខេត្តកំពង់ចាម រោងចក្រកែច្នៃដំឡូងមី ១០,៤ លានដុល្លារ របស់ក្រុមហ៊ុន Shine Hanuman Trading នៅភូមិភ្នំបេង ឃុំបឹង ស្រុកម៉ាឡៃ ខេត្តបន្ទាយមានជ័យ និងរោងចក្រផលិតនិងដំឡើងបន្ទះសូឡា Jintek Cells Technology ដែលមានទឹកប្រាក់ ៧,៧ លានដុល្លារ ស្ថិតនៅភូមិព្រៃសាឡា សង្កាត់ព្រៃកាឡា ២ ក្នុងខណ្ឌពោធិ៍សែនជ័យ រាជធានីភ្នំពេញ។
គួរបញ្ជាក់ថា នៅក្នុងរយៈពេល ៣ ខែដំបូង នៃឆ្នាំ២០២០នេះ ក្រុមប្រឹក្សាអភិវឌ្ឍន៍កម្ពុជា CDC បានយល់ព្រមលើគម្រោងចំនួន ៤០ ដែលមានតម្លៃ ៩០០ លានដុល្លារ ។ គម្រោងទាំងនេះ គ្របដណ្តប់លើវិស័យ ជាច្រើន ដូចជា វិស័យសណ្ឋាគារ ផ្សារទំនើប ផ្នែកសម្លៀកបំពាក់ ស្បែកជើង និងផលិតផលធ្វើដំណើរគ្រឿងសង្ហារិម ឧបករណ៍ផ្ទះបាយ និងឧបករណ៍អគ្គិសនីជាដើម៕ដោយ៖សម្ផស្ស
