ខេត្តព្រះសីហនុ ៖ ពាក់ព័ន្ធនឹងដំណោះស្រាយការផ្គត់ផ្គង់ទឹកស្អាត ជូនប្រជាពលរដ្ឋនៅស្រុកព្រៃនប់ ខេត្តព្រះសីហនុ ឯកឧត្តមគួច ចំរើន បានព្រមានរុះរើទីតាំផលិតទឹកស្អាតរបស់ក្រុមហ៊ុន ទូច សុទ្ធី លែងឱ្យធ្វើអាជីវកម្ម ប្រសិនណាឆ្នាំក្រោយ នៅតែមានបញ្ហាខ្វះខាតដដែលៗដូច្នេះទៀត បើទោះជាមានអាជ្ញាប័ណ្ណពីក្រសួងក៏ដោយ។
ឯកឧត្ដម គួច ចំរើន អភិបាល នៃគណ:អភិបាលខេត្តព្រះសីហនុ បានចេញការព្រមានផ្ទាល់មាត់បែបនេះ នៅព្រឹកថ្ងៃទី១៤ ខែមេសា ឆ្នាំ២០២០ ក្នុងពេលដែលឯកឧត្តម បានដឹកនាំមន្ទីរជំនាញពាក់ព័ន្ធចុះពិនិត្យទីតាំផលិតទឹកស្អាតរបស់ក្រុមហ៊ុន ទូច សុទ្ធី ស្ថិតក្នុងភូមិសំរុងក្រោម ឃុំសំរុង ស្រុកព្រៃនប់ ដែលក្រុមហ៊ុននេះផលិតទឹកស្អាតផ្គត់ផ្គង់សម្រាប់ប្រជាជនប្រើប្រាស់ចំនួន ២ឃុំ គឺឃុំវាលរេញ និងឃុំសំរុង ស្រុកព្រៃនប់។
ក្រោយពីការជួបពិភាក្សា ឯកឧត្តម អភិបាលខេត្ត បានបន្តចុះពិនិត្យមើលស្ថានភាពទឹកនៅតាមផ្ទះប្រជាពលរដ្ឋ និងចុះពិនិត្យអាងស្តុកទឹកផងដែរ ខណៈគ្រឿងចក្រកំពុងបន្តកាយស្តាររាល់ថ្ងៃ។ ឯកឧត្តម បានណែនាំក្រុមហ៊ុនផលិតទឹកស្អាត ពង្រីកអាងទឹកឱ្យបានធំ និងជ្រៅជាងមុន ដើម្បីរក្សាទឹកបានច្រើន ធានាការប្រើប្រាស់គ្រប់គ្រាន់ ព្រមទាំងបានណែនាំឱ្យក្រុមហ៊ុន ត្រូវសហការជាមួយមន្ទីរអភិវឌ្ឍន៍ជនបទ មន្ទីរសិប្បកម្ម និងឧស្សាហកម្ម និងមន្ទីរធនធាន និងឧតុនិយមទឹកផងដែរ ដើម្បីធ្វើកិច្ចការនេះឱ្យទទួលបានប្រសិទ្ធិផល។ ទន្ទឹមនេះឯកឧត្តម ក៏បានព្រមានរុះរើលែងឱ្យធ្វើអាជីវកម្ម ប្រសិនណាឆ្នាំក្រោយ នៅតែមានបញ្ហាខ្វះខាតដដែលៗដូច្នេះទៀត បើទោះជាមានអាជ្ញាប័ណ្ណពីក្រសួងក៏ដោយ។
អភិបាលខេត្តក៏នៅបន្តជំរុញក្រុមហ៊ុនផលិតទឹកស្អាតនេះ ឲ្យមានស្មារតីយកចិត្តទុកដាក់ខ្ពស់ក្នុងការផ្គត់ផ្គង់ទឹកស្អាតជូនពលរដ្ឋចំនួន២ឃុំ គឺឃុំសំរុងនិងឃុំវាលរេញដែលជាឃុំប្រជុំជន ហើយមិនត្រូវខ្វះការផ្គត់ផ្គង់ដូចឆ្នាំនេះតទៀតទេ។
សូមបញ្ជាក់នៅស្រុកព្រៃនប់ មានក្រុមហ៊ុនផលិតទឹកស្អាតលក់ចំនួន២ ទី១ នៅមូលដ្ឋានឃុំព្រៃនប់ និងទី២ នៅទីប្រជុំជនឃុំវាលរេញ ដែលកំពុងប្រឈមកង្វះទឹកស្អាតប្រើ។
លោក ខូវ ថានិត មេឃុំវាលរេញ ឲ្យដឹងថា ប្រជាជនក្នុងឃុំរបស់គាត់ បានជួបបញ្ហាខ្វះទឹកស្អាតប្រើតាំងពីសប្តាហ៍ទី១ ខែមីនា ឆ្នាំ២០២០មកម្ល៉េះ។ លោកប្រាប់ថា រឿងនេះកន្លងមក អភិបាលខេត្តព្រះសីហនុ ធ្លាប់បានចុះសម្របសម្រួល ដោយតម្រូវឲ្យក្រុមហ៊ុនទាំងពីរនេះ ចែករំលែកទឹកឲ្យប្រជាជនបានប្រើប្រាស់សិន។
ក្រោយពីការជួបពិភាក្សា លោកអភិបាលខេត្តបានបន្តចុះពិនិត្យមើលស្ថានភាពទឹកនៅតាមផ្ទះប្រជាពលរដ្ឋមួយចំនួនដែលបានប្រើប្រាស់ទឹកស្អាត និងចុះពិនិត្យអាងស្តុកទឹកផងដែរដែលមានទីតាំងនៅចំណុចក្បែវត្តថ្មដា ស្ថិតក្នុងភូមិសំរុងក្រោមឃុំសំរុង ស្រុកព្រៃនប់ខេត្តព្រះសីហនុ ខណៈគ្រឿងចក្រកំពុងបន្តកាយស្តារស្រះដែលជាអាងស្តុបទឹករាល់ថ្ងៃ។
សូមបញ្ជាក់ថា បញ្ហាកង្វះទឹកប្រើប្រាស់នៅប្រជុំជនវាលរេញគិតមកទល់ពេលនេះមានរយៈពេលប្រមាណជាជាងមួយខែមកហើយគឺចាប់ពីថ្ងៃទី១១ មីនា ឆ្នាំ២០២០ ហើយកន្លងមកនេះ ក៏មានកិច្ចប្រជុំរកដំណោះស្រាយក្រោមការដឹកនាំពីលោកអភិបាលខេត្តម្ដងរួចមកហើយតែហាក់នៅមិនទាន់មានប្រសិទ្ធភាព រហូតដល់ថ្ងៃនេះដើម្បីជាតម្រូវការចាំបាច់របស់ពលរដ្ឋ ឯកឧត្តមអភិបាលខេត្តបានបើកកិច្ចពិភាក្សាជាលើកទី២ និងចុះតាមដានអនុវត្តផ្ទាល់ទាំងលំនៅដ្ឋាន របស់ប្រជាពលរដ្ឋដែលប្រើប្រាស់ទឹកស្អាតនេះ ទាំងទីតាំងស្តុក អាងទឹក ដើម្បីស្វែងយល់ឲ្យបានដិតដល់៕ដោយ៖បញ្ញាស័ក្តិ
