ភ្នំពេញ៖ នគរបាលបានចាប់ខ្លួនសង្ស័យម្នាក់ជាឪពុក ដែលរងការចោទប្រកាន់ថា ចាប់រំលោភកូនស្រីខ្លួនឯង បានសម្រេច២ដងមកហើយ។ បន្ទាប់ពីសមត្ថកិច្ចចាប់ខ្លួន មកឃុំខ្លួននៅក្នុងប៉ុស្តិ៍នគរបាលស្ទឹងមានជ័យ២ ដើម្បីសួរចម្លើយ ជនសង្ស័យបានសម្លាប់ខ្លួនឯង ដើម្បីគេចពីការដាក់ទោសទណ្ឌ។
ហេតុការណ៍នេះ បង្កឲ្យមានការភ្ញាក់ផ្អើលកាលពីវេលាម៉ោង៧ព្រឹកថ្ងៃទី១៤ ខែមេសា ឆ្នាំ២០២០នេះ នៅក្នុងប៉ុស្តិ៍នគរបាលស្ទឹងមានជ័យ២ ខណ្ឌមានជ័យ រាជធានីភ្នំពេញ។
ជនសង្ស័យខាងលើ ត្រូវបានសមត្ថកិច្ចប៉ុស្តិ៍នគរបាលរដ្ឋបាលស្ទឹងមានជ័យ២ ធ្វើការឃាត់ខ្លួននៅថ្ងៃទី១២ ខែមេសា ឆ្នាំ២០២០ តាមពាក្យបណ្តឹងរបស់ប្រធានអង្គការស្គុត។ កូនស្រីបង្កើតរបស់ជនសង្ស័យ បានរៀបរាប់ប្រាប់បុគ្គលិករបស់អង្គការស្គុតថា ឪពុករបស់ខ្លួន បានចាប់រំលោភនាង បានសម្រេច២ដងមកហើយ។
សមត្ថកិច្ចបានសួរនាំជនសង្ស័យ បានសារភាពថា រូបគេពិតជាបានធ្វើសកម្មភាពចាប់រំលោភកូនស្រីរបស់ខ្លួនពិតប្រាកដមែន។ បន្ទាប់ពីបានសារភាពចម្លើយរួចរាល់ សមត្ថកិច្ចនគរបាលប៉ុស្តិ៍ស្ទឹងមានជ័យ២ ក៏បានកសាងសំណុំរឿងចាត់ការតាមនីតិវិធី។ ប៉ុន្តែដោយសារជនសង្ស័យមានការខ្មាសអៀន នឹងទង្វើររបស់ខ្លួន ដែលធ្វើទៅលើកូនស្រីបង្កើតរបស់ខ្លួនបែបនេះ ទើបជនសង្ស័យបានសម្រេចចិត្តសម្លាប់ខ្លួនក្នុងបន្ទប់ឃុំឃាំងតែម្តង ៕
ដោយ៖បញ្ញាស័ក្តិ