រាជធានីភ្នំពេញ៖ ក្នុងគំនិតច្នៃប្រឌិតរបស់ក្រុមអ្នកស្រាវជ្រាវ ពាក់ព័ន្ធនឹងសិក្សាពីការប្រើប្រាស់បច្ចេកវិទ្យាថ្មីៗបន្ថែមទៀត ក្រសួងប្រៃសណីយ៍ នឹងដាក់ឱ្យដំណើការកម្មវិធីទូរស័ព្ទចំនួន ២ និងម៉ាស៊ីនជំនួយផ្លូវដង្ហើមចំនួន ១ ប្រភេទ ដើម្បីជាជំនួយបន្ថែម ក្នុងការចូលរួមប្រយុទ្ធប្រឆាំង នឹងការរីករាលដាលនៃជំងឺកូវីដ ១៩។
នារសៀលថ្ងៃចន្ទ ទី១៣ ខែមេសា ឆ្នាំ២០២០ នៅទីស្តីការក្រសួង ឯកឧត្តម ជា វ៉ាន់ដេត រដ្ឋមន្ត្រីក្រសួងប្រៃសណីយ៍និងទូរគមនាគមន៍ បានទទួលជួបពិភាក្សាការងារជាមួយក្រុមអ្នកស្រាវជ្រាវ និងវិទ្យាស្ថានជាតិប្រៃសណីយ៍ ទូរគមនាគមន៍ បច្ចេកវិទ្យា គមនាគមន៍ និងព័ត៌មាន ហៅកាត់ថា និបទីក (NIPTICT)។
ឯកឧត្តមរដ្ឋមន្ត្រី ជា វ៉ាន់ដេត បានថ្លែងថា កិច្ចប្រជុំនេះ ធ្វើឡើងក្នុងគោលបំណងពិនិត្យ និងដាក់ឱ្យដំណើការកម្មវិធីទូរស័ព្ទចំនួន ២ និងម៉ាស៊ីនជំនួយផ្លូវដង្ហើមចំនួន ១ ប្រភេទ ដើម្បីជាជំនួយបន្ថែមក្នុងការចូលរួមប្រយុទ្ធប្រឆាំងនឹងការរីករាលដាលនៃជំងឺកូវីដ ១៩ ដូចជា៖ (១) កម្មវិធី OpenTraceKH ប្រើសម្រាប់ស្វែងរកបុគ្គល ដែលធ្លាប់មានទំនាក់ទំនង ជាមួយអ្នករកឃើញថាមានជំងឺកូវីដ១៩។ កម្មវិធីនេះអាចតាមដានទំនាក់ទំនងក្នុងសហគមន៍ដោយប្រើ Bluetooth ជាគោល ហើយធ្វើការកត់ត្រាបុគ្គល ដែលធ្លាប់មានទំនាក់ទំនងជាមួយគ្នា។ (២) កម្មវិធីទូរស័ព្ទ (Self Quarantine)ដើម្បីកំណត់ និងរាយការណ៍ពីស្ថានភាពសុខភាព របស់បុគ្គល ដែលត្រូវដាក់ឱ្យនៅដាច់ដោយឡែកពីគេ ឬសម្រាប់គ្រប់គ្រងអ្នកជំងឺ។ (៣) ម៉ាស៊ីនជំនួយផ្លូវដង្ហើម ផ្គត់ផ្គង់អ៊ុកស៊ីហ្សែនខ្នាតតូច អាចប្រើជាជំនួយ ដល់ការដកដង្ហើម របស់អ្នកជំងឺ ជាពិសេសសម្រាប់មន្ទីរពេទ្យនៅជនបទ ឬទីតាំងគ្មានអ៊ុកស៊ីហ្សែនគ្រប់គ្រាន់។
ឯកឧត្ដមរដ្ឋមន្ត្រី បានចាត់ក្រុមអ្នកជំនាញ ឱ្យបន្តការងារជាមួយក្រសួងសុខាភិបាល ដើម្បីបន្តនីតិវិធីដាក់ឱ្យដំណើការ កម្មវិធីខាងលើ ក្នុងពេលឆាប់ៗខាងមុខ។
ក្នុងឱកាសនោះ ឯកឧត្តមរដ្ឋមន្ត្រី ជា វ៉ាន់ដេត បានសម្តែងនូវការកោតសរសើរ ចំពោះគំនិតច្នៃប្រឌិត របស់ក្រុមអ្នកស្រាវជ្រាវ និងថ្លែងអំណរគុណដល់មន្ត្រីទាំងអស់ ដែលបានចូលរួមយ៉ាងសកម្ម ជាមួយរាជរដ្ឋាភិបាល ក្នុងការប្រយុទ្ធប្រឆាំងនឹងជំងឺកូវីដ ១៩៕
ដោយ៖កូឡាប