ភ្នំពេញ ៖ ពាក់ព័ន្ធនឹងសារព័ត៌មានមួយចំនួនចុះផ្សាយថា ប្រជាពលរដ្ឋរស់នៅក្នុងសង្កាត់បឹងកេងកង១ នៅជិតតំបន់ជនជាតិវៀតណាម និងកាណាដា ដែលឆ្លងជំងឺកូវីដ១៩ ឱ្យទៅធ្វើតេស្តរកមេរោគនៅមន្ទីរពេទ្យ ក្រោយពីក្រសួងរកប្រភពដែលចម្លងលើមនុស្សទាំង ២នាក់មិនទាន់ឃើញនោះ លោកជំទាវ ឱ វណ្ណ ឌីន បានចេញប្រកាសច្រាលចោលព័ត៌មានខាងលើនេះ។
អ្នកនាំពាក្យក្រសួងសុខាភិបាល លោកជំទាវ ឱ វណ្ណ ឌីន បានចេញសារប្រាប់អ្នកសារព័ត៌មាន តាមរយៈបណ្តាញសង្គមតេលេក្រាម នៅយប់ថ្ងៃទី១៤ខែមេសាឆ្នាំ២០២០។ លោកជំទាវ បានប្រកាសច្រានចោលព័ត៌មាន ដែលបានចុះផ្សាយថា នៅតំបន់ខ្លះនៃសង្កាត់បឹងកេងកង១ ធ្វើតេស្តរកកូវីដ-១៩។
លោកជំទាវ ឱ វណ្ណ ឌីន បានបញ្ជាក់ថា “ជាព័ត៌មានប្រឌិត មិនពិតទេ បំពុលសង្គម ក្រសួងសុខាភិបាល សូមច្រានចោលទាំងស្រុង ។ សូមកុំជឿ អរគុណ”។
អ្នកនាំពាក្យក្រសួងសុខាភិបាល អំពាវនាវដល់សាធារណជនបានជ្រាបថា រាល់ព័ត៌មានទាំងឡាយណា ដែលមិនមានប្រភព ចេញពីក្រសួងសុខាភិបាល គឺជាព័ត៌មានមិនពិត។
បើតាមការផ្សាយរបស់វេបសាយ VOD កាលពីថ្ងៃទី១៤ ខែមេសា ថា មន្ត្រីជាន់ខ្ពស់ក្រសួងសុខាភិបាល អំពាវនាវទៅប្រជាពលរដ្ឋ រស់នៅក្នុងសង្កាត់បឹងកេងកង១ នៅជិតតំបន់ជនជាតិវៀតណាម និងកាណាដា ដែលឆ្លងជំងឺកូវីដ១៩ ឱ្យទៅធ្វើតេស្តរកមេរោគនៅមន្ទីរពេទ្យ ក្រោយពីក្រសួងរកប្រភពដែលចម្លងលើមនុស្សទាំង ២នាក់មិនទាន់ឃើញនោះ។ អ្នកនាំពាក្យក្រសួងសុខាភិបាល លោក លី សូវ៉ាន់ ប្រាប់វីអូឌីថា គិតមកដល់ថ្ងៃនេះ ក្រសួងមិនទាន់រកឃើញប្រភពដែលចម្លងជំងឺកូវីដ១៩ មកលើស្ត្រីជនជាតិវៀតណាម និងបុរសជនជាតិកាណាដា (ដើមកំណើតចិន)នៅឡើយ។ លោកអំពាវនាវទៅប្រជាពលរដ្ឋរស់នៅទីតាំងដែលជនជាតិវៀតណាម និងបុរសជនជាតិកាណាដា និងពលរដ្ឋដែលនៅទីតាំងផ្សេងៗទៀតដែលសង្ស័យមានឆ្លងជំងឺ ឱ្យទៅធ្វើតេស្តនៅមន្ទីរពេទ្យមិត្តភាពខ្មែរ-សូវៀត និងមណ្ឌលសុខភាពចាក់អង្រែក្រោម៕
ដោយ៖បញ្ញាស័ក្តិ
