ខេត្តកណ្ដាល ៖ សមត្ថកិច្ចនគរបាលស្រុកអង្គស្នួល បានចាប់ខ្លួនបុរសម្នាក់ ដែលលួចផ្ទះគេ បណ្តាលឲ្យឆេះអស់៣ខ្នង មកអធិការដ្ឋាននគរបាលស្រុក។ ហេតុការណ៍នេះកើតឡើង កាលពីរំលងអធ្រាត្រ នៅថ្ងៃពុធ ទី១៥ ខែមេសា ឆ្នាំ២០២០ នៅចំណុចភូមិកៅ ឃុំបែកចាន ស្រុកអង្គស្នួល ខេត្តកណ្ដាល។ ផ្ទះដែលឆេះនេះ ម្ចាស់ទុកចោល២ខែមកហើយ មិនមានមនុស្សរស់នៅទេ។
ករណីអគ្គិភ័យឆេះផ្ទះប្រជាពលរដ្ឋចំនួន ៣ ខ្នង ទំហំ ២៥ម៉ែត្រគុណ៥០ម៉ែត្រ ធ្វើអំពីជញ្ជាំងថ្ម ដំបូងប្រក់ស័ង្កសី ម្ចាស់ផ្ទះមិនទាន់ស្គាល់អត្តសញ្ញាណ (ផ្ទះទុកចោល ចាក់សោ រយៈពេល ២ ខែ មកហើយ) បណ្តាលឲ្យ សម្ភារៈខូចខាតរួមមាន ឆេះផ្ទះល្វែងចំនួន ៣ ខ្នង ឆេះអស់ ៥០% និងសម្ភារៈក្នុងផ្ទះមួយចំនួនទៀត ។
នគរបាលស្រុកអង្គស្នួល បានបញ្ជាក់ពីមូលហេតុថា ដោយសារមុខសញ្ញាឈ្មោះ គា ភេទ ប្រុស អាយុ ៣៥ ឆ្នាំ ជាអ្នកដុត ។
ដោយមានការបញ្ជាផ្ទាល់ពីលោកអធិការ ស្រុកអង្គស្នួល កម្លាំងអន្តរាគមន៍របស់អធិការដ្ឋាននគរបាលស្រុកអង្គស្នួល បានចេញប្រតិបត្ដិការណ៍សហការជាមួយកម្លាំងប៉ុស្ដិ៍បែកចាន ប្រជាការពារ និងប្រជាពលរដ្ឋ ៦៨ នាក់ បានជួយពន្លត់ភ្លើងឆេះ នៅចំណុចខាងលើ ដោយប្រើរថយន្តពន្លត់អគ្គិភ័យ របស់ស្នងការដ្ឋាននគរបាលខេត្តចំនួន ២ គ្រឿង រថយន្តរបស់អធិការដ្ឋាន ខណ្ឌពោធិ៍សែនជ័យចំនួន ២ គ្រឿង រថយន្តអង្គភាព៩១១ ចំនួន ១ គ្រឿង សរុប ៥ គ្រឿង ប្រើប្រាស់ទឹកអស់ចំនួន ៨ រថយន្ត ស្មើនឹង ៤០ ម៉ែត្រគូប ទើបរលត់ជាស្ថាពរនៅវេលាម៉ោង ១:០០ នាទី រំលងអធ្រាត្រ ។
សូមបញ្ជាក់ ក្រោយពេលឆេះផ្ទះ ឈ្មោះគា នេះ ពេលសម្ថកិច្ចមកដល់ បានឃើញដើរចេញពីកន្លែងកើតហេតុ ទើបសមត្ថកិច្ចឃាត់ខ្លួន មកអធិការដ្ឋាននគរបាលស្រុកតែម្ដង ៕ដោយ៖បញ្ញាស័ក្តិ
