ជំងឺ Covid-19 បាននិងកំពុងធ្វើឲ្យមនុស្សនៅលើពិភពលោក រស់នៅជាមួយសភាពភ័យខ្លាចនៅឡើយ ក្នុងនោះបានធ្វើឲ្យមនុស្សជាទីស្រឡាញ់ត្រូវឃ្លាតឆ្ងាយពីគ្នា គឺឃ្លាតទាំងចិត្តមិនបានប៉ង ប៉ុន្តែអ្វីៗមិនអាចឃាត់បានឡើយ ។
ពិតណាស់ ស្របពេលដែលអ្នកជំងឺត្រូវបានដាក់ឲ្យនៅដាច់ដោយឡែក ឆ្ងាយពីសាច់ញាតិទាំងអស់ នោះក្រុមគ្រូពេទ្យក៏ត្រូវបង្ខំចិត្តឃ្លាតឆ្ងាយពីគ្រួសារ ដើម្បីបំពេញតាមវិជ្ជាជីវៈជាគ្រូពេទ្យ ដែលត្រូវតែជួយសង្គ្រោះ ដោយមិនអាចទុកអ្នកជំងឺណាម្នាក់ចោលឡើយ បើទោះជាត្រូវប្រឈមនឹងហានិភ័យពីជំងឺដ៏កាចសាហាវនេះយ៉ាងណាក៏ដោយ។
ដោយបានឆ្លងកាត់បទពិសោធន៍ដ៏លំបាក អស់មួយរយៈពេលដ៏ធំ ជាពិសេសការឃ្លាតឆ្ងាយនេះ ដែលបានធ្វើឲ្យក្រុមគ្រួសារមានការនឹករលឹកពីសុខទុក្ខជាខ្លាំងនោះ លោកវេជ្ជបណ្ឌិតជួរមុខម្នាក់ ក៏តាក់តែងជាបទចម្រៀងមនោសញ្ចេតនាដ៏កម្សត់ ដែលមានចំណងជើងថា៖ “ឃ្លាតបងព្រោះ Covid-19” ។
បទចម្រៀងដ៏កម្សត់ដែលកំពុងទទួលបានការចាប់អារម្មណ៍យ៉ាងខ្លាំងនេះ គឺមានអត្ថន័យលាតត្រដាងពីមនោសញ្ចេតរបស់ភរិយានៅឯផ្ទះ ចំពោះស្វាមីជាគ្រូពេទ្យ ដែលបាននិងកំពុងយកអាយុជីវិតទៅប្រថុយជាមួយជំងឺដ៏កំណាចនេះ ប៉ុន្តែ ត្រូវកាត់ចិត្តទាំងបង្ខំ ព្រោះតែអាយុជីវិតមនុស្ស និងក៏ដូចបម្រើជូនប្រទេសជាតិទាំងមូល ។
តាមទំព័រហ្វេសប៊ុក “ក្រសួងសុខាភិបាលនៃព្រះរាជាណាចក្រកម្ពុជា” បទចម្រៀងខាងលើនេះ ត្រូវបាននិពន្ធដោយលោកវេជ្ជបណ្ឌិត នូ ចន្ទ្រា គ្រូពេទ្យជួរមុខកំពុងពិនិត្យព្យាបាលអ្នកជំងឺកូវីដ-១៩ ចល័តគ្នានៅមណ្ឌលសុខភាពចាក់អង្រែក្រោម ។ ហើយបទដែលយកលំនាំតាមបទ “ដួងច័ន្ទប្រឹងរះ” នេះផងដែរ បកស្រាយដោយ លោកស្រី ស៊ុយ សីម៉ា ជាអ្នកគ្រូពេទ្យឆ្មប ធ្វើការប្រចាំនៅ មណ្ឌលសុខភាពចាក់អង្រែក្រោមនៅក្នុងក្រុមគ្រូពេទ្យជួរមុខប្រយុទ្ធប្រឆាំងជំងឺកូវីដ-១៩៕ ដោយ៖ លឹម ហុង
