បាត់ដំបងៈកសិករម្នាក់ នៅស្រុកមោងឫស្សី បានប្រកបរបរដាំស្មៅមួយប្រភេទ នាំចូលមកពីប្រទេសថៃ ពេលឲ្យសត្វគោស៊ី ទៅមានអត្ថប្រយោជន៍ច្រើន ធំលូតលាស់ល្អ ហើយក៏អាចលក់ធ្វើពូជដល់កសិករដទៃទៀត ទាំងក្នុងតំបន់និងក្រៅតំបន់ អាចរកចូលបានគួរសមផងដែរ។
លោក សុវណ្ណ វ៉ន រស់នៅភូមិកូនក្អែក២ ឃុំរបងមង្គល ស្រុកមោងឫស្សី បានឲ្យដឹងថា ក្រោយពីបរាជ័យក្នុងរបបចិញ្ចឹមសត្វកង្កែប ក៏បានសម្រេចយកពូជស្មៅម្យ៉ាងឈ្មោះ យ៉ាវ៉ានអ៊ីស្រាអែល ដែលទិញយកមកពីប្រទេសថៃ គឺដាំបាន៣ឆ្នាំហើយ ដោយដាំរយៈពេល៣ខែកន្លះ ទើបអាចប្រមូលផលបាន។ ស្មៅនេះ អាចដាំលើដីបានសឹងគ្រប់ប្រភេទ ងាយស្រួលថែរទាំ ហើយក្នុងរដូវប្រាំងនេះ ក្នុងមួយសប្ដាហ៍ត្រូវស្រោចទឹកវាចំនួន ២ដង ទើបមានការលូតលាស់បានល្អ។ ស្មៅនេះ មានអត្ថប្រយោជន៍ច្រើន តាមការស្រាវជ្រាវ វាមានប្រូតេអ៊ីnរហូតដល់២១ភាគរយ បើគោមេស៊ីអាចធ្វើឲ្យមានទឹកដោះច្រើន ហើយក្រៅពីសត្វពាហនៈ អាចស៊ីបាននោះ ក៏អាចកិនឲ្យខ្ទេចលាយជាមួយកន្ទក់ និងពោតឲ្យសត្វមាន់ស៊ី ក៏មានការលូតលាស់បានល្អ និងអាចជួយការពាររោគផ្សេងៗបានច្រើន។
ការដាំស្មៅនេះ មិនចាំបាច់ដាក់ជីគីមីនោះទេ បើមានជីអាចម៍គោ ឬអាចម៍សត្វផ្សេងៗ គឺយកទៅបាច់ក្នុងថ្នាល និងពេលស្រោចទឹក ទៅនឹងលូតលាស់បានល្អ។ បន្ទាប់ពីដាំ៣ខែកន្លះ អាចកាត់លើកដំបូង ដោយកាត់ជាបន្តបន្ទាប់ត្រឹមរយៈពេល ៣០ ទៅ៤០ថ្ងៃប៉ុណ្ណោះ ទើបអាចកាត់បានទៀត។ បើមានគោ ៥ ទៅ៦ក្បាល ដាំលើដីទំហំត្រឹម៤០ម៉ែត្របួនជ្រុង អាចមានស្មៅឲ្យសត្វគោស៊ីបានរហូត ។
លោក សុវណ្ណ វ៉ន បានបញ្ជាក់ថា គ្រោងនឹងពង្រីកការដាំស្មៅនេះបន្ថែមទៀត នៅលើដីស្រែចម្ការ ដែលមានស្រាប់ ហើយក៏មានពូជសម្រាប់លក់ ប្រសិនបើមានកសិករណាចង់ទិញយកទៅដាំបន្ត៕ ដោយ ៖ អ៊ុងសារុំ