ពិតណាស់ហើយ គ្មានអ្វីរំភើបចិត្តជាជាងបានក្រឡេកទៅមើលរូបថតចាស់ៗ ដែលជាអនុស្សាវរីយ៍ ត្រូវបានរក្សាទុកអស់ជាច្រើនឆ្នាំមកហើយនោះទេ ។ តួយ៉ាង គូស្នេហ៍តាយាយដ៏ផ្អែមល្ហែមមួយគូ បានធ្វើឲ្យគ្រប់គ្នាកោតសរសើរជាខ្លាំង បន្ទាប់ពីបានឃើញពួកគាត់បង្កើត (ចម្លងតាម) ឡើងវិញ នូវរូបថតអនុស្សាវរីយ៍ដែលពួកគាត់បានថតស្វ៊ីតៗនឹងគ្នា កាលពីជាង៥០ឆ្នាំមុន ។
កាលពីឆ្នាំ២០១៧ គូស្នេហ៍យាយតាទាំងពីរ ដែលជាអតីតសុទ្ធតែមានរូបឆោមស្រស់សង្ហាដូចគ្នា បានសួរទៅជាងថតរូបម្នាក់ ថាតើគាត់អាចជួយពួកគាត់បង្កើតឡើងវិញ នូវរូបភាពចម្លងតាមកាលពីមុនបានទេ? ។ នៅពេលនោះ ជាងថតពិតជាមានការពិបាក ប៉ុន្តែ ក្រោយមក បានប្រាប់ទៅពួកគាត់វិញថាអាចធ្វើបាន ។
ពិតជារឿងចៃដន្យ និងស្ទើរតែមិនគួរឲ្យជឿ ខណៈដែលជាងថតដែលមានឈ្មោះថា Chen បាននឹកឃើញដល់ម៉ូដែលម៉ូតូ១គ្រឿងរបស់គាត់ និងបានជួលឲ្យតាយាយ ដើម្បីបំពេញតាមបំណងប្រាថ្នារបស់ពួកគាត់ ។
ប៉ុន្តែ ពួកគាត់មានការលំបាក ព្រោះថា គាត់នៅពេលនោះ កំពុងរស់នៅក្នុងទីក្រុងតូរ៉ុនតូ ប្រទេសកាដាណា ដោយមិនអាចធ្វើវាបាននៅតៃប៉ិ ។ ហេតុនេះ ពួកគាត់ត្រូវរង់ចាំពេលវេលា២ឆ្នាំ ទៅកាន់ទីកន្លែងដែលពួកគាត់បានសាងអនុស្សាវីយ៍ជាមួយគ្នា ។ ទោះយ៉ាងណា នៅទីបំផុត ពួកគាត់បានទៅកាន់តៃប៉ិ និងអាចសម្រេចបំណងនេះបាននៅឯឧទ្យាន Tianmu ។
ពួកគាត់បានប្រាប់ឲ្យដឹងថា ពួកគាត់បានជួបគ្នា ខណៈលោកយាយមានអាយុ ១៦ ឆ្នាំ និងលោកតាអាយុ ១៧ ឆ្នាំ នៅក្នុងឆ្នាំ១៩៦៥ ។ រូបថតអនុស្សាវរីយ៍ស្នេហ៍គ្រាដំបូងរបស់ពួកគាត់ទាំងពីរ កាលពីជាង ៥២ ឆ្នាំ មុន ត្រូវបានថតដោយអ្នកដំណើរ ដែលពួកគាត់ស្នើសុំឲ្យជួយ ៕
ប្រែសម្រួល៖ លឹម ហុង (ប្រភព៖ happening-news)