ក្រសួងយុត្តិធម៌អាមេរិច បានប្រកាសនៅថ្ងៃអង្គារថា ខ្លួនបានផ្ញើលុយចំនួន ៣០០លានដុល្លាដែលត្រូវបានលួចក្នុងរឿងអាស្រូវ របស់ក្រុមហ៊ុនអភិវឌ្ឍន៍ម៉ាឡេស៊ី (1MDB) ទៅឲ្យរដ្ឋាភិបាលម៉ាឡេស៊ីវិញ។ លុយទាំងនោះត្រូវបានលាង តាមរយៈប្រព័ន្ធហិរញ្ញវត្ថុសកលលោក។
ដោយបូកបញ្ជូលលុយមួយចំនួនដែលផ្តល់ទៅឲ្យម៉ាឡេស៊ីវិញ កាលពីជិតមួយឆ្នាំមុន ក្រសួងការយុត្តិធម៌អាមេរិចនិយាយថា ឥឡូវនេះ ខ្លួនបានបញ្ជូនលុយ ឬជួយប្រទេសម៉ាឡេស៊ី ឲ្យយកប្រាក់ត្រឡប់មកវិញបានច្រើនជាង ១ពាន់លានដុល្លារ និងទ្រព្យសម្បត្តិមួយចំនួន ដែលបាត់បង់ក្នុងអំពើឧក្រិដ្ឋកម្ម។
“ការបញ្ជូនថវិការទាំងនេះទៅឲ្យប្រជាជនម៉ាឡេស៊ីវិញ គឺជាលទ្ធផលនៃកិច្ចប្រឹងប្រែង របស់ព្រះរាជអាជ្ញា និងភ្នាក់ងារសហព័ន្ធ ក្នុងការការពារពួកលួចជាតិ និងបក្សពួកពួកគេ ពីការប្រើប្រាស់សហរដ្ឋអាមេរិចជាទីតាំង ដែលពួកគេអាចរីករាយនឹងទ្រព្យសម្បត្តិក្លែងក្លាយពួកគេ”។ នេះបើតាមការបញ្ជាក់របស់ក្រសួងយុត្តិធម៌អាមេរិច ក្នុងសេចក្តីប្រកាស។
សេចក្តីប្រកាសបញ្ជាក់ទៀតថា “ចំនួនទឹកប្រាក់ដែលលួចពីប្រជាជនម៉ាឡេស៊ី គឺច្រើនគួរឲ្យភ្ញាក់ផ្អើល ហើយពួកយើងត្រូវតែធ្វើកិច្ចការដោយមិនបង្អង់ដៃ ដើម្បីយកទ្រព្យទាំងនោះមកវិញ ដែលវាគួរតែត្រូវបានប្រើជាប្រយោជន៍សំរាប់ប្រជាជនម៉ាឡេស៊ី”។
សូមបញ្ជាក់ថា ទឹកប្រាក់ខាងលើគឺជាផ្នែកមួយនៃទឹកប្រាក់ ច្រើនជាង ៤,៥ពាន់លានដុល្លា ដែលក្រុមស៊ើបអង្កេតអាមេរិចបាននិយាយថា លុយនោះត្រូវបានគេលួច ពីក្រុមហ៊ុនវិនិយោគដែលគ្រប់គ្រងដោយរដ្ឋ ហើយការស៊ើបអង្កេតមានការផ្តល់ចម្លើយពី អតីតនាយករដ្ឋមន្ត្រីម៉ាឡេស៊ី Najib Razak ដែលត្រូវបានគេកាត់ទោសពីបទពុករលួយ ព្រមទាំងបក្ខពួក៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia
