តាកែវ៖ ដោយគោរពទៅតាមគោលការណែនាំ របស់រាជរដ្ឋាភិបាល លើការលើកពេលឈប់សម្រាប់ ក្នុងថ្ងៃបុណ្យចូលឆ្នាំប្រពៃណីជាតិខ្មែរ ដែលតែងតែប្រារព្ធធ្វើឡើង ជារៀងរាល់ឆ្នាំ នៅក្នុងអំឡុងពាក់កណ្តាលខែមេសានេះ យើងឃើញថា បងប្អូនប្រជាពលរដ្ឋ ក៏ដូចជាមន្ត្រីរាជការ កម្មកររោងចក្រ នៅក្នុងខេត្តតាកែវ បានចូលរួមយ៉ាងសកម្ម ជាមួយនឹងរដ្ឋាបាល ក្នុងការអនុវត្តទៅលើគោលការណ៍ណែនាំនានា របស់សម្តេចតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងគោលបំណងតែមួយ គឺរួមគ្នាប្រយុទ្ធប្រឆាំង នឹងជំងឺរលាកសួតប្រភេទថ្មីហៅថា កូវីដ១៩ ។
មានប្រសាសន៍លើកឡើងបែបនេះ គឺក្នុងពេលដែលឯកឧត្តម អ៊ូច ភា អភិបាលខេត្តតាកែវ បានចុះពិនិត្យនៅអង្គភាពច្រកចេញចូលតែមួយ នាថ្ងៃទី១៥ ខែមេសា ឆ្នាំ២០២០ ។ ឯកអភិបាលខេត្តបានបន្តថា មន្ត្រីរាជការទាំងអស់នៅ ទូទាំងខេត្តតាកែវ មាន៩ស្រុក និងក្រុងមួយ នៅតែបន្តផ្តល់សេវាសាធារណៈជូនពលរដ្ឋ រីឯប្រជាពលរដ្ឋវិញ គឺនៅតែបន្តមកទទួលសេវាសាធារណៈនានា ពីមន្ត្រីរាជការបស់យើងជាធម្មតា គឺមិនមានអ្នកណាឈប់សម្រាក ពីការងារនៅក្នុងថ្ងៃចូលឆ្នាំនេះឡើយ ។
ពលរដ្ឋដែលមកទទួលសេវា នៅអង្គភាពច្រកចេញចូលតែមួយនៃខេត្តតាកែវ បាននិយាយថា គោលការណ៍ណែនាំរបស់រាជរដ្ឋាភិបាល ដែលបានដាក់ចេញមកប្រកាសជាសាធារណៈនោះ គឺមានគោលបំណងចង់ឲ្យបងប្អូនប្រជាពលរដ្ឋទាំងអស់គ្នា ចូលរួមជាមួយនឹងរាជរដ្ឋាភិបាល ប្រយុទ្ធប្រឆាំងនិងជំងឺឆ្លងប្រភេទថ្មីហៅថា កូវីដ១៩ កាត់បន្ថយការជួបជុំជាមួយ និងសាច់ញាតិបងប្អូនមួយរយៈសិន និងចូលរួមសម្អាតអនាម័យទាំងអស់គ្នា ដើម្បីបញ្ជៀសនៅការឆ្លងជាសហគមន៍ ដោយសារតែជំងឺកូវីដ១៩នេះ ដោយ៖ តាកែវ
