តាកែវ៖ អភិបាលខេត្តតាកែវ ឯកឧត្តម អ៊ូច ភា បានបន្តធ្វើការអំពាវនាវជាថ្មីម្តងទៀត ដល់បងប្អូន ប្រជាពលរដ្ឋទាំងអស់ មិនត្រូវភ្លេចឡើយ ក្នុងការការពារខ្លួនពីជំងឺកូវីដ១៩ ពោលគឺត្រូវពាក់ម៉ាស និងមានអនាម័យជាប់ជាប្រចាំ ព្រោះការពាក់ម៉ាស និងទម្លាប់មានអនាម័យនេះ យើងនឹងការពារខ្លួនឯងផង ក្រុមគ្រួសារផង និងការពារសង្គមជាតិទាំងមូលផង ។
ថ្លែងក្នុងពិធីចែកអំណោយជាស្បៀងអាហារ ដល់ពលរដ្ឋដែលខ្វះខាត ចំនួន៩០គ្រួសារ ដែលមកពីទូទាំងស្រុកទ្រាំង នាព្រឹកថ្ងៃពុធ ទី១៥ ខែមេសា ឆ្នាំ២០២០ ឯកឧត្តម អ៊ូច ភា អភិបាលខេត្តតាកែវ បានមានប្រសាសន៍បន្តថា ការផ្តើមការពារខ្លួន និងមានការយល់ដឹង ពីរបៀបការពារពីជំងឺកូវីដ១៩ ពីសំណាក់បងប្អូនប្រជាពលរដ្ឋម្នាក់ៗឡើងទៅ វានឹងធ្វើការសហគមន៍របស់យើង និងពីភូមិមួយ ទៅភូមិមួយ នឹងពីស្រុកទៅខេត្តរហូតទូទាំងប្រទេស មិនមានការរីករាលដាលជំងឺកូវីដ១៩នេះទេ ព្រោះតែពលរដ្ឋម្នាក់ៗ មានការយល់ដឹងកាន់តែទូលាយ អំពីវិធានការនៃការពារខ្លួន ។
ឯកឧត្តម អ៊ូច ភា បន្ថែមទៀតថា ការធ្វើអនាម័យជាប្រចាំ ដោយលាងដៃនឹងសាប៊ូ ឬអាល់កុលឲ្យបានញឹកញាប់ នឹងត្រូវពាក់ម៉ាស ឬប្រើប្រាស់កន្សែងជាប្រចាំ សូមបងប្អូនអនុវត្តឲ្យបានជាប់ជារៀងរហូត អនុវត្តមិនចំពោះតែជំងឺកូវីដ១៩នោះទេ តែជាការទម្លាប់ឲ្យបងប្អូនប្រជាពលរដ្ឋមានអនាម័យ ការមានអនាម័យទប់ស្កាត់ មិនឲ្យយើងមានជំងឺផ្សេងៗទៀតបាន ។
ឯកឧត្តមអភិបាលខេត្ត បញ្ជាក់ថា ប្រសិនបងប្អូនទាំងអស់ មានសាច់ញាតិទើបត្រឡប់មកពីក្រៅប្រទេស ក្នុងនាមជាអណាព្យបាលត្រូវធ្វើការពន្យល់ និងអប់រំពួកគាត់ ត្រូវធ្វើការដាក់ខ្លួនដាច់ដោយឡែក រយៈពេល១៤ថ្ងៃសិន ចាំចូលមកស្និទ្ធស្នាល ជាមួយជាមួយសាច់ញាតិក្រុមគ្រួសារ ឬបងប្អូននៅមូលដ្ឋាន ដើម្បីជៀសវាងការឆ្លងរីករាលដាល នៃមេរោគកូវីដ១៩ នៅសហគមន៍ ប្រសិនមានអាការសង្ស័យណាមួយ ត្រូវប្រញាប់ទាក់ទងមកមណ្ឌលសុខភាព មន្ទីរពេទ្យបង្អែកស្រុក ឬទំនាក់ទំនងសាកសួរព័ត៌មានបន្ថែមលេខ ១១៥៕ដោយ៖តាកែវ