ភ្នំពេញ៖ នៅវេលាម៉ោង ៨ និង ៤៨នាទី ថ្ងៃចន្ទទី១៣ ខែមេសា ឆ្នាំ២០២០ ទេព្តាឆ្នាំជូតព្រះនាងគោរាគៈទេវី បុត្រីទី២ នៃកបិលមហាព្រហ្ម យាងមកកាន់ស្ថានកណ្តាលព្រះរាជាណាចក្រកម្ពុជា ដើម្បីប្រោះព្រំប្រទានពរជ័យ ដល់បណ្តាជនក្នុងកម្ពុជរដ្ឋ មានសិរីសួស្តីបរវៀសជៀសឆ្ងាយ ពីរឿងរ៉ាវអពមង្គលទាំងឡាយ ជាពិសេសការភ័យខ្លាច នូវការឆ្លងរោគរាតត្បាតនៃជម្ងឺ កូវីដ១៩ ដែលមានលក្ខណៈសឹងតែដល់ប្រល័យលោកទៅហើយ។
បណ្តាជនខ្មែរគ្រប់ៗគ្នាបានដឹងហើយថា ចូលឆ្នាំឆ្នាំនេះទទួលទេព្តានៅក្នុងផ្ទះ ប្រកបរបរចិញ្ចឹមជីវិតជាធម្មតា មន្ត្រីរាជការនៅតែធ្វើការជាធម្មតា បុគ្គលិកក្រុមហ៊ុនឯកជនក៏ដូច្នេះដែរ ហើយការឈប់សងវិញ នឹងត្រូវផ្តល់ជូននៅឱកាសសមស្របណាមួយ នាពេលក្រោយ។
រាជរដ្ឋាភិបាលកម្ពុជា ដែលមានសម្តេចអគ្គមហាសេនាបតីតេជោ ហ៊ុន សែន ជាប្រមុខដឹកនាំ បានធ្វើសន្និសីទកាសែតច្រើនដង ចេញបទបញ្ជា ចេញសេចក្តីសម្រេចកែសម្រួលបទបញ្ជា ហើយកំពុងតែធ្វើនូវអ្វីៗគ្រប់បែបយ៉ាង ក្នុងគោលបំណងតែមួយគត់គឺ ជួយពលរដ្ឋកម្ពុជាឱ្យជៀសផុត ពីវិបត្តិរោគឆ្លង កូវីដ១៩ ដ៏ប្រល័យនេះ ដោយបានដាក់ចេញនូវវិធានការណែនាំអប់រំ វិធានការឆ្លើយតប លើកដៃសំពះអង្វករពលរដ្ឋ គិតគូរសុខទុក្ខដល់ពលករ កម្មករដែលមានប្រាក់ចំណូលទាប គិតគូរដល់ចង្ហាន់ព្រះសង្ឃ រកទិញម៉ាសការពារ ទិញឧបករណ៍វេជ្ជសាស្ត្រ និងធ្វើចលនាឱ្យមានការស្ម័គ្រចិត្តរបស់មន្ត្រីរាជការជាន់ខ្ពស់ មធ្យម ចូលរួមបរិច្ចាគប្រាក់ខែ ដើម្បីប្រើប្រាស់សម្រាប់ប្រយុទ្ធប្រឆាំងមេរោគ កូវីដ១៩នេះ ស្របពេលដែលការធ្វើដំណើរទៅទីណាៗក៏ឮសូរតែសំឡេង “យើងទាំងអស់គ្នា ចូលរួមប្រឆាំងកូវីដ១៩ តាមការណែនាំរបស់ក្រសួងសុខាភិបាល” ។
កម្ពុជាយើងបានឆ្លងកាត់នូវបុណ្យចូលឆ្នាំ ដ៏សប្បាយរីករាយជួបជុំក្រុមគ្រួសារ បងប្អូនញាតិមិត្ត ឆ្លងកាត់បុណ្យចូលឆ្នាំខ្មែរ ក្រោមគ្រាប់កាំភ្លើងផ្លោង ការប្រយុទ្ធគ្នានាចុងសម័យលន់ នល់ ឆ្លងកាត់ការគ្មានចូលឆ្នាំ ឬបើហ៊ានប្រារព្ធពិធីបុណ្យចូលឆ្នាំ ត្រូវយកទៅសម្លាប់ចោល និងចូលឆ្នាំខ្មែរដែលប្រទេសជាតិ គ្មានប្រាក់រៀលចាយក្នុងឆ្នាំ១៩៧៩ ដែលកាលនោះ សម្តេច ហេង សំរិន ជាប្រធានក្រុមប្រឹក្សាបដិវត្តន៍ប្រជាជន (និងក្លាយជាប្រធានក្រុមប្រឹក្សារដ្ឋនៅឆ្នាំ១៩៨១) និងសម្តេច ហ៊ុន សែន ជារដ្ឋមន្ត្រីការបរទេសក្មេងជាងគេលើលោក (កាលនោះ សម្តេច ហ៊ុន សែន មានអាយុត្រឹមតែ២៧ឆ្នាំ) បានដឹកនាំការប្រារព្ធបុណ្យចូលឆ្នាំមួយ ប្រកបដោយជោគជ័យ តាមរបៀបជាក់ស្តែង នៃស្ថានភាពសង្គមកម្ពុជានាគ្រានោះ ដែលខ្មែរជាង៥លាននាក់ សល់ពីការកាប់សម្លាប់នៃរបបប៉ុលពត ក្រីក្ររហេមរហាមទាំងអស់គ្នា ពោលគឺកងទ័ព ហេង សំរិន ហ៊ុន សែន ដើរតួនាទីចែកស្បៀងអាហារ នំចំណី ឱ្យពលរដ្ឋរៀបចំទទួលទេព្តាឆ្នាំថ្មី ហើយក្រោយមកកងទ័ពនេះ ក៏ត្រូវបានអ្នកស្រុកហៅថា ជាកងទ័ពទេព្តាៗរហូតមក ដោយមានការគាំទ្រយ៉ាងស្មោះស្ម័គ្រ ពីកងទ័ពប្រជាជនវៀតណាម នាក្បែរខាងកម្ពុជា។
ចូលឆ្នាំថ្មីនេះមានលក្ខណៈពិសេស ដែលគ្រប់ៗគ្នាបានដឹងហើយ ដោយពុំចាំបាច់រៀបរាប់ច្រើន ក្នុងសំណេរវិចារណកថានេះទេ។ យើងសូមគាំទ្រទាំងស្រុង ចំពោះបទបញ្ជារបស់រាជរដ្ឋាភិបាល យើងសូមហៅបទបញ្ជានេះថា “ឳប្រាប់កូនឱ្យនៅផ្ទះ ព្រោះនៅឯខាងក្រៅមានសត្រូវមើលមិនឃើញមុខមាត់នាំ ឱ្យឆក់យកជីវិតកូនជាទីស្រឡាញ់របស់ឳ” កូនត្រូវនៅផ្ទះដើម្បី “ឈ្នះជំងឺ និងមានអាយុវែង បានឃើញចូលឆ្នាំខ្មែរជាច្រើនដងទៀត នៅពេលខាងមុខ”។ ចូរយើងទាំងអស់គ្នា ប្រើប្រាស់បណ្តាញសង្គម Facebook និងគ្រប់មធ្យោបាយ ដែលមានចូលរួមចំណែក ប្រឆាំងកូវីដ១៩ តាមការណែនាំរបស់ក្រសួងសុខាភិបាល ហើយចូរយើងរាល់គ្នាកុំប្រើ Facebook ដើម្បីបំពុលសង្គម និយមតែប្រយោជន៍ផ្ទាល់ខ្លួន ក្នុងកាលៈទេសៈដែលប្រទេសជាតិ ត្រូវមេរោគចង្រៃឧត្បាតគំរាមកំហែង។ ចូរយើងរាល់គ្នាប្រតិបត្តិតាមអ្វី ដែលសម្តេចតេជោនាយករដ្ឋមន្ត្រី បានលើកឡើងថា “ស្រឡាញ់គ្នាក្នុងគ្រាក្រ ដឹងមិត្តល្អក្នុងគ្រាអាសន្ន”។ ចូរជួយពលរដ្ឋដែលមានចំណូលទាប តាមរយៈការបរិច្ចាគអង្ករ ម៉ាស ទឹកលាងដៃសម្លាប់មេរោគ ម្ហូបអាហារ ប្រាក់កាស ហើយពលរដ្ឋដែលក្រីក្រប្រាក់ចំណូលទាប ក៏ត្រូវមានចំណែកក្នុងការប្រយុទ្ធប្រឆាំង នឹងកូវីដ១៩នេះដែរ ឧបមាដូចជា ធ្វើអនាម័យជាប្រចាំតាមរបៀបងាយៗ មិនរំពើតរំពើនញាប់ញ័រ ស្វែងរកការសប្បាយ ព្រោះតែចង់សប្បាយ បើនិយាយឱ្យចំៗ ទៅគឺប្រពៃណីជាតិខ្មែរ មិនប្រើប្រាស់គ្រឿងស្រវឹង ក្នុងថ្ងៃចូលឆ្នាំនោះទេ។
ចូរយើងរាល់គ្នាសប្បាយរីករាយ នៅក្នុងស្មារតីប្រុងប្រយ័ត្នខ្ពស់ អនាម័យខ្ពស់ មិនប្រមូលផ្តុំគ្នាលេងបៀរ ខ្លាឃ្លោក ល្បែងស៊ីសងគ្រប់ប្រភេទ ពោលគឺសកម្មភាព ក្នុងឱកាសចូលឆ្នាំខ្មែរ ត្រូវតែគោរពបទបញ្ជា របស់រាជរដ្ឋាភិបាល គោរពសេចក្តីណែនាំ របស់ក្រសួងសុខាភិបាល ដើម្បីឆ្លងផុតគ្រោះកាចចង្រៃទាំងឡាយទាំងពួង។
ចូរយើងរាល់គ្នាថែរក្សាមនុស្សជាទីស្រឡាញ់របស់យើង តាមក្បួនខ្នាតវេជ្ជសាស្ត្រ កាត់បន្ថយការទៅមករកគ្នា ដើម្បីស្វែងរកការសប្បាយ ជល់កែវ សើចក្អាកក្អាយ ជួបជុំមិនសមហេតុផល មិនសមជាពលរដ្ឋថ្លៃថ្នូរនៃកម្ពុជា។
សូមទេព្តាឆ្នាំថ្មី បណ្តេញមេរោគចង្រៃ កូវីដ១៩ ចេញពីកម្ពុជា ចេញពីដែនដីយើងផង ប៉ុន្តែយើងទាំងអស់គ្នា ត្រូវនាំគ្នារៀបចំទទួលទេព្តា ក្នុងផ្ទះសម្បែងរៀងៗខ្លួន ដោយប្រុងប្រយ័ត្នខ្ពស់ គោរពតាមក្បួនខ្នាតវេជ្ជសាស្ត្រឱ្យបានខ្ចាប់ខ្ជួន សូមបញ្ជាក់ថា ព្រះ និងទេព្តាជួយតែពលរដ្ឋណា ដែលបានខិតខំជួយខ្លួនឯង ជាមុន ក្នុងការប្រយុទ្ធប្រឆាំង និងមេរោគកូវីដ១៩ដ៏កាចសាហាវ៕ ដោយ៖ CEN