ភ្នំពេញ៖ ស្ថិតនៅក្នុងស្ថានភាពដែលប្រទេសជាតិ ក៏ដូចជាពិភពលោកទាំងមូលកំពុងទទួលនូវការទន្ទ្រាន និងរាតត្បាតជាលក្ខណៈសកលនូវមេរោគដ៏កាចសាហាវកូវីដ ១៩ (Covid-19) ការប្រើប្រាស់ផលិតផលទឹកអាល់កុល ក៏ដូចជាផលិតផលលាងសម្អាតដៃ និងផលិតផលផ្សេងៗ គឺជាវិធានការមួយក្នុងចំណោមវិធានការដ៏ចាំបាច់មួយចំនួន ដើម្បីបង្ការ និងទប់ស្កាត់នូវការឆ្លង និងរាតត្បាតនៃមេរោគកូវីដ ១៩ (Covid-19) នេះ ។
តាមការសង្កេតពិនិត្យលើទីផ្សារបច្ចុប្បន្នឃើញថាមានការផ្សព្វផ្សាយលក់និងកំពុងចរាចរលក់ផលិតផល អាល់កុល និងផលិតផលលាងសម្អាតដៃនិងផលិតផលផ្សេងទៀតសម្រាប់ការពារនិងទប់ស្កាត់នូវការឆ្លងជំងឺដ៏កាចសាហាវនេះដោយពុំមានការត្រួតពិនិត្យគុណភាពនិងគ្មានការចុះបញ្ជីផលិតផលច្បាស់លាស់។
ម្យ៉ាងវិញទៀតនាពេលថ្មីៗនេះ ក្រសួងឧស្សាហកម្មក៏បានធ្វើតេស្តលើផលិតផលមួយចំនួន (ពុំមានបញ្ជាក់លក្ខណៈគុណភាពនិងការចុះបញ្ជីផលិតផលត្រឹម ត្រូវ) កំពុងចរាចរលើទីផ្សារនោះ ជាលទ្ធផលបង្ហាញឲ្យឃើញថាផលិតផលទឹកអាល់កុលនិងផលិតផលលាងសម្អាតដៃមួយចំនួនមានបរិមាណអេតាណុល (អាល់កុល) ក្នុងកម្រិតមួយដែលមិនអាចសម្លាប់មេរោគបានឡើយ ហើយផលិតផលមួយចំនួនទៀត មានបរិមាណអេតាណុល ក្នុងកម្រិតមួយដែលអាចបង្កគ្រោះថ្នាក់ដល់សុខភាពនិងសុវត្ថិភាពផង។
ដើម្បីជៀវាងនូវការខាតបង់ថវិកានិងប៉ះពាល់ដល់សុខភាព ក៏ដូចជាសុខភាពរបស់បងប្អូនប្រជាពលរដ្ឋជាអ្នកប្រើប្រាស់គ្រប់ប្រភេទ ជាពិសេសដើម្បីចូលរួមបង្ការនិងទប់ស្កាត់ការរាតត្បាតនៃជំងឺដ៏កាចសាហាវនេះ ដែលកំពុងរីករាលដាលនៅកម្ពុជា ក្រសួងឧស្សាហកម្មសូមណែនាំដល់បងប្អូនប្រជាពលរដ្ឋទាំងអស់សូមមេត្តាយកចិត្តទុកដាក់និងពិនិត្យឱ្យបានត្រឹមត្រូវមុនពេលធ្វើការទិញនូវផលិតផលដូចដែលបានជម្រាបខាងលើយកមកប្រើប្រាស់។
ក្រសួងឧស្សាហកម្មសូមធ្វើការរំលឹកនិងណែនាំបន្ថែមទៀតថា ផលិតផលកំពុងចរាចរមួយចំនួនដែលមិនមានគុណភាពគ្រប់គ្រាន់និងមិនមានសុវត្ថិភាពក្នុងការប្រើប្រាស់គឺមានបង្ហាញនៅក្នុងរូបភាពនេះស្រាប់៕ ដោយ៖កូឡាប
យោងតាមសេចក្តីណែនាំរបស់ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ លិខិតលេខ ៨៥៣ ចុះថ្ងៃទី១៤ ខែមេសា ឆ្នាំ២០២០ បានឱ្យដឹងថា៖
