ភ្នំពេញ៖ ឯកឧត្តមរដ្ឋមន្ត្រីក្រសួងសុខាភិបាល បានចេញលិខិតមួយច្បាប់ ស្នើសុំឯកឧត្តមរដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈ ចាប់វិធានការចត្តាឡីស័ក រយៈពេល១៤ថ្ងៃ លើកម្មករ កម្មការិនី ដែលនឹងវិលត្រឡប់ចូលបម្រើការងារវិញ បន្ទាប់ពីពិធីបុណ្យចូលឆ្នាំខ្មែរប្រពៃណីជាតិ ដើម្បីបង្ការការចម្លងជំងឺកូវីដ១៩។
ការស្នើបែបនេះ យោងតាមចំណារឯកភាពដ៏ខ្ពង់ខ្ពស់របស់សម្តេចតេជោនាយករដ្ឋមន្ត្រី កាលពីថ្ងៃទី១៥ខែមេសាឆ្នាំ២០២០ និងសេចក្តីណែនាំចុះថ្ងៃទី១៦ខែមីនាឆ្នាំ២០២០ របស់ក្រសួងសុខាភិបាល ស្តីពីនីតិវិធីដាក់ខ្លួនឲ្យនៅដាច់ដោយឡែកក្នុងរយៈពេល១៤ថ្ងៃ ដើម្បីបង្ការនិងទប់ស្កាត់ជំងឺកូវីដ១៩ នៅតាមផ្ទះជាលក្ខណៈបុគ្គល។
លោក ម៉ម ប៊ុនហេង បានបញ្ជាក់ថា ស្ថានភាពជំងឺកូវីដ១៩ ស្ថិតនៅក្នុងដំណាក់កាលដែលយើងត្រូវតែមានការប្រុងប្រយ័ត្នខ្ពស់បំផុតដើម្បីកុំឱ្យមានការចម្លងរាតត្បាតជំងឺកូវីដ១៩ ចូលក្នុងសហគមន៍ ជាពិសេសការធ្វើដំណើរចល័តរបស់បុគ្គលពីកន្លែងមួយទៅកន្លែងមួយដែលមិនបាន គោរពតាមបទបញ្ជារបស់សម្ដេចតេជោនាយករដ្ឋមន្ត្រី នាឱកាសបុណ្យចូលឆ្នាំប្រពៃណីជាតិខ្មែរ ដែលមានការសម្រុកចេញទៅស្រុកកំណើត។ ដើម្បីបង្ការហានិភ័យនៃការចម្លងវីរុសកូវីដ១៩ ចំពោះ កម្មករ និយោជិត ដែលនឹងត្រូវវិលត្រឡប់មកកន្លែងធ្វើការនៅតាមរោងចក្រ សហគ្រាសរបស់ពួកគាត់វិញនោះ ក្រសួងសុខាភិបាល សូមស្នើក្រសួងការងារ សហការចាត់វិធានការលើបុគ្គលទាំងនោះ ដោយត្រូវដាក់ខ្លួនឱ្យនៅដាច់ដោយឡែក(ចត្តាឡីស័ក) នៅកន្លែងស្នាក់នៅរបស់បុគ្គលនោះ ក្នុងរយៈពេល១៤ថ្ងៃ ជាចាំបាច់ ព្រមទាំងមានការតាមដានក្នុងការអនុវត្តវិធានការចត្តាឡីស័កនិងត្រួតពិនិត្យតាមដានសុខភាព ពីក្រុមគ្រូពេទ្យនៃក្រសួងការងារ ហើយប្រសិនបើមានបុគ្គលណាម្នាក់មានបញ្ហាសុខភាព ដែលពាក់ព័ន្ធទៅនឹងជំងឺកូវីដ១៩ ក្រុមគ្រូពេទ្យនៃក្រសួងការងារ ត្រូវតែទំនាក់ទំនងទៅក្រសួងសុខាភិបាល ដើម្បីជួយផ្តល់អន្តរាគមន៍ក្នុងការពិនិត្យ និងធ្វើរោគវិនិច្ឆ័យបុគ្គលនោះ បានទាន់ពេលវេលា។
យោងតាមក្រសួងការងារ បានឱ្យដឹងថា ក្នុងអំឡុងពេលបុណ្យចូលឆ្នាំនេះ កម្មករ និយោជិតនៅក្នុងវិស័យវាយនភណ្ឌកាត់ដេរសម្លៀកបំពាក់ ស្បែកជើង និងកាបូប ទូទាំងប្រទេសរហូតដល់ទៅ៩៥ភាគរយបានគោរពតាមការណែនាំរបស់រាជរដ្ឋាភិបាល នៅធ្វើការងារជាធម្មតា មិនមានឈប់សម្រាកនោះទេ។
តែបើទោះបីជាយ៉ាងណា ក្នុងពេលដែលរាជរដ្ឋាភិបាល ដាក់បទបញ្ជា ០២បប ស្តីពីការដាក់កំហិតលើការធ្វើដំណើរក្នុងប្រទេស ក្នុងគោលដៅបង្ការ និងទប់ស្កាត់ ការរាតត្បាតនៃជំងឺកូវីដ១៩ គឺមានកម្មករក្នុងវិស័យសំណង់ និងវិស័យដទៃទៀត ពួកគេបានសម្រុកទៅស្រុកកំណើត មិនបាននៅបម្រើការងារនោះឡើយ ក្នុងអំឡុងពេលចូលឆ្នាំនេះ។
សូមបញ្ជាក់ថា នៅថ្ងៃទី ១៦ ខែមេសា ឆ្នាំ ២០២០ វេលាម៉ោង ៦:០០ នាទី ព្រឹក ប្រជាពលរដ្ឋកម្ពុជា អាចធ្វើដំណើរបានទូទាំងប្រទេសឡើងវិញជាធម្មតាហើយ ។ សូមបើកបរគោរពច្បាប់ចរាចរណ៍ទាំងអស់គ្នាដើម្បីសុវត្ថិភាពក្នុងក្រុមគ្រួសារ ។
រាជរដ្ឋាភិបាលបានចេញសេចក្តីសម្រេចស្តីពីការបញ្ចប់សុពលភាពបទបញ្ជាលេខ០២បប ចុះថ្ងៃទី៩ខែមេសាឆ្នាំ២០២០ ស្តីពីការដាក់កំហិតលើការធ្វើដំណើរក្នុងប្រទេស ក្នុងគោលដៅបង្ការ និងទប់ស្កាត់ ការរាតត្បាតនៃជំងឺកូវីដ១៩ នៅត្រឹមម៉ោង៦ព្រឹកថ្ងៃទី ១៦ ខែមេសា ជាកំហិត។
សម្តេចតេជោនាយករដ្ឋមន្ត្រី បានថ្លែងថា ទទួលបានសេចក្តីសម្រេចនេះ គ្រប់ក្រសួងស្ថាប័ន និងអាជ្ញាធរដែលមានសមត្ថកិច្ចពាក់ព័ន្ធត្រូវចាត់ចែងអនុវត្តជាបន្ទាន់ និងឲ្យមានប្រសិទ្ធភាពខ្ពស់៕ ដោយ៖កូឡាប
