ព្រះសីហនុ ៖ ករណីជនជាតិចិនប្រុសស្រីចំនួន៤នាក់រងរបួស ដែលសមត្ថកិច្ចដាក់ការសង្ស័យជំហានដំបូងថា អាចជាជម្លោះហឹង្សាចាក់សម្លាប់គ្នា កាលពីម៉ោងជាង១០ព្រឹកថ្ងៃទី១៥ ខែមេសា ឆ្នាំ២០២០ នៅអគារមួយកន្លែងតាមផ្លូវ ចុះពីកែងមហោស្រពចាស់ (ជិតម្តុំភ្នំខៀវ) ក្នុងសង្កាត់លេខ២ ក្រុងព្រះសីហនុ រហូតមកដល់ពេលរសៀលថ្ងៃដដែលនេះ មានជនរងគ្រោះម្នាក់បានស្លាប់ហើយនិង៣នាក់ទៀតរងរបួសធ្ងន់ កំពុងព្យាបាលនៅមន្ទីរពេទ្យបង្អែកខេត្តព្រះសីហនុ។
សមត្ថកិច្ចមូលដ្ឋានឲ្យដឹងថា ជនរងគ្រោះដែលស្លាប់ហើយនោះឈ្មោះឈូ ហ័រសាំង ភេទប្រុសអាយុ៣២ឆ្នាំ មុខរបរថៅកែហាងនំស្នាក់នៅកន្លែងកើតហេតុ ។ ចំណែកអ្នករងរបួសកំពុងព្យាបាលរួមមាន៖
១-ឈ្មោះ ចាង ឃុន ភេទប្រុស អាយុ២០ឆ្នាំ មុខរបរ បុគ្គលិកហាងនំ ស្នាក់នៅកន្លែងកើតហេតុ ។
២-ឈ្មោះ លាំង ជិនឆាវ ភេទប្រុស អាយុ៣៣ឆ្នាំ មុខរបរបុគ្គលិកហាងនំ ស្នាក់នៅកន្លែងកើតហេតុ ។
៣-ឈ្មោះ លី ជៀនយាន ភេទស្រី អាយុ៣០ឆ្នាំ ស្នាក់នៅកន្លែងកើតហេតុ ។
សមត្ថកិច្ចនៅមិនទាន់មានរបាយការណ៍ពីដើមហេតុថាយ៉ាងណានៅឡើយ ដោយបញ្ជាក់ថាកម្លាំងជំនាញកំពុងស្រាវស្រាវបន្ត៕
ដោយ៖បញ្ញាស័ក្តិ