ប្រធានាធិបតីអាមេរិច ដូណាល់ ត្រាំ បាននិយាយនៅថ្ងៃពុធថា រដ្ឋាភិបាលរបស់លោកកំពុងព្យាយាមធ្វើការកំណត់ថា តើវីរុសកូរ៉ូណាចេញពីមន្ទីរពិសោធន៍ក្នុងទីក្រុងវូហានឬយ៉ាងណា ចំណែករដ្ឋមន្ត្រីការបរទេសអាមេរិច លោក Mike Pompeo បាននិយាយថា ទីក្រុងប៉េកាំងត្រូវតែមានភាពស្មោះត្រង់នូវអ្វីដែលពួកគេបានដឹង។
ប្រភពនៃវីរុសកូរ៉ូណនៅតែស្ថិតក្នុងភាពអាថ៌កំបាំងនៅឡើយ។ ឧត្តមសេនីយ៍អាមេរិច Mark Milley ប្រធានសេនាធិការចម្រុះ បាននិយាយកាលពីថ្ងៃអង្គារថា ភ្នាក់ងារស៊ើបការណ៍សម្ងាត់អាមេរិចបានបញ្ជាក់ថា វីរុសនោះទំនងជាកើតឡើងដោយធម្មជាតិ ដែលផ្ទុយពីការលើកឡើងថា វាត្រូវបានបង្កើតឡើងនៅក្នុងមន្ទីរពិសោធន៍របស់ចិន ប៉ុន្តែមិនមានវិធីជាក់លាក់ណាមួយឡើយ។
ចំណែកសារពត៌មាន Fox News បានរាយការណ៍នៅថ្ងៃពុធថា វីរុសដែលមានប្រភពពីមន្ទីរពិសោធន៍វូហាន មិនមែនជាអាវុធជីវសាស្ត្រនោះទេ ប៉ុន្តែវាគឺជាផ្នែកមួយនៃកិច្ចប្រឹងប្រែងរបស់ចិន ក្នុងការបង្ហាញថា ការប្រឹងប្រែងរបស់ចិន ក្នុងការកំណត់អត្តសញ្ញាណ និងប្រយុទ្ធប្រឆាំងនឹងវីរុសគឺស្មើ ឬប្រសើរជាងសមត្ថភាពរបស់អាមេរិច។
សេចក្តីរាយការណ៍នេះ និងការរាយការណ៍ផ្សេង បានលើកឡើងថា មន្ទីរពិសោធន៍វូហាន កន្លែងដែលមានការពិសោធន៍វីរុស និងមានស្តង់ដារសុវត្ថិភាពធូររលុង បានធ្វើឲ្យមានការឆ្លងវីរុសទៅកាន់ជនណាម្នាក់ និងបានលេចឆ្លងទៅកាន់ផ្សារក្បែរនោះ ទើបធ្វើឲ្យមានការផ្ទុះវីរុសឡើង។
នៅក្នុងកិច្ចសម្ភាសន៍ជាមួយនឹង Fox News លោក Mike Pompeo បានថ្លែងថា “ពួកយើងដឹងថា វីរុសនេះមានដើមកំណើតចេញពីទីក្រុងវូហាន ហើយវិទ្យាស្ថានសិក្សាពីវិរុសស្ថិតនៅតែចំងាយប៉ុន្មានម៉ាយ៍ប៉ុណ្ណោះពីផ្សារសើម”។
លោកថ្លែងថា “ពួកយើងត្រូវការឲ្យរដ្ឋាភិបាលចិនបើកចំហរ និងជួយពន្យល់ឲ្យពិតប្រាកដថាតើវីរុសនោះផ្ទុះឡើយដោយរបៀបណា”។
“រដ្ឋាភិបាលចិនត្រូវតែមានភាពស្មោះត្រង់”។
សូមបញ្ជាក់ថា វីរុសកូរ៉ូណា ឬ COVID-19 បានផ្ទុះឡើងកាលពីចុងឆ្នាំ ២០១៩ ហើយរហូតមកដល់ពេលនេះ វាបានឆក់យកជីវិតមនុស្សជិត ១៤០.០០០នាក់ និងឆ្លងទៅកាន់មនុស្សជាង ២.០០០.០០០ទូទាំងពិភពលោក។
អាមេរិចមានអ្នកឆ្លង និងស្លាប់ច្រើនជាងគេ៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia