អគ្គលេខាធិការអង្គការសហប្រជាជាតិ លោក Antonio Guterres បាននិយាយកាលពីថ្ងៃពុធថា មានតែវ៉ាក់សាំង COVID-19 ប៉ុណ្ណោះដែលអាចធ្វើឲ្យពិភពលោកវិលត្រឡប់ទៅរកភាពធម្មតាវិញ។
លោកថ្លែងថា “វ៉ាក់សាំងដែលមានប្រសិទ្ធិភាព និងសុវត្ថិភាព គឺជាឧបករណ៍តែមួយគត់ដែលអាចធ្វើឲ្យពិភពលោកត្រឡប់ទៅរកភាពធម្មតាវិញ និងជួយសង្គ្រោះជីវិតមនុស្សរាប់លាននាក់ និងលុយរាប់លានលានដុល្លា”។
លោកបានអំពាវនាវឲ្យមានការអភិវឌ្ឍន៍វ៉ាក់សាំងឲ្យបានលឿន និងឲ្យមានការប្រើប្រាស់សម្រាប់មនុស្សទាំងអស់ និងត្រូវមានផលប្រយោជន៍ជាសកល និងធ្វើឲ្យយើងអាចគ្រប់គ្រងការរាតត្បាតបាន។
លោកនិយាយទៀតថា ការអំពាវនាវរបស់លោកកាលពីថ្ងៃទី ២៥ ខែមីនា ដើម្បីឲ្យមានការបរិច្ចាកទឹកប្រាក់ ២ពាន់លានដុល្លា សម្រាប់ការឆ្លើយតបរបស់អង្គការសហប្រជាជាតិទៅនឹងការរាតត្បាត រហូតមកដល់ពេលនេះ ទទួលបានការបរិច្ចាកប្រហែល ២០ភាគរយហើយ។
សូមបញ្ជាក់ថា វីរុសកូរ៉ូណា ឬ COVID-19 បានផ្ទុះឡើងកាលពីចុងឆ្នាំ ២០១៩ ហើយរហូតមកដល់ពេលនេះ វាបានឆក់យកជីវិតមនុស្សជិត ១៤០.០០០នាក់ និងឆ្លងទៅកាន់មនុស្សជាង ២.០០០.០០០ទូទាំងពិភពលោក។
អាមេរិចកំពុងធ្វើការស៊ើបអង្កេតដើម្បីកំណត់ថាតើ វីរុសមរណៈនោះផ្ទុះចេញពីមន្ទីរពិសោធន៍វូហានរបស់ចិនឬយ៉ាងណា ខណៈដែលអាមេរិចជាប្រទេសដែលរងគ្រោះខ្លាំងជាងគេ ដោយមានអ្នកឆ្លង និងស្លាប់ច្រើនជាងគេ៕
អត្ថបទប្រែសម្រួលដោយ៖ សុភ័ក្រ
ប្រភព៖ CNA