លោក Thae Yong-ho បានក្លាយជាជនជាតិកូរ៉េខាងជើងដំបូងបង្អស់ ដែលបានឈ្នះកៅអ៊ីសភា នៅក្នុងការបោះឆ្នោតរបស់កូរ៉េខាងត្បូង ដែលបានធ្វើឡើងកាលពីម្សិលមិញនេះ។
លោកគឺជាអតីតអនុឯកអគ្គរដ្ឋទូត របស់កូរ៉េខាងជើង ប្រចាំចក្រភពអង់គ្លេស ប៉ុន្តែកាលពីឆ្នាំ ២០១៦ លោក និងគ្រួសារបានរត់ផ្តាច់ខ្លួនចូលមកកូរ៉េខាងត្បូង។ លោកគឺជាមន្ត្រីជាន់ខ្ពស់បំផុត របស់កូរ៉េខាងជើង ដែលបានរត់ផ្តាច់ខ្លួនចេញ។
លោកបានឈរឈ្មោះជាបេក្ខជនដ៏សំខាន់ របស់គណបក្សប្រឆាំងឈ្មោះ គណបក្សបង្រួបបង្រួមអនាគត (United Future Party) នៅក្នុងស្រុក Gangnam នៃទីក្រុងសេអ៊ូល។
លោកឈ្នះដោយទទួលបានសំឡេងគាំទ្រ ៥៨,៤ភាគរយ។ លោកយំក្តុកក្តួល ក្រោយពេលមានការប្រកាស ពីជោគជ័យរបស់គាត់។
គាត់បាននិយាយមុនពេលជ័យជម្នះថា គាត់សង្ឃឹមថា ការឈរឈ្មោះរបស់គាត់ នឹងផ្ញើសារទៅដល់វរជន នៅក្នុងប្រទេសកូរ៉េខាងជើងអំពីអ្វីដែលអាចកើតមានឡើង ប្រសិនជាពួកគេបដិសេធរបបកូរ៉េខាងជើង។
“ខ្ញុំចង់ប្រាប់ពួកគេថា មានវិថីថ្មីសម្រាប់ជីវិតរបស់ពួកគេ”។
សូមបញ្ជាក់ថា កូរ៉េខាងត្បូងបានរៀបចំការបោះឆ្នោតសភា កាលពីថ្ងៃពុធម្សិលមិញ ដោយមានអ្នកចូលរួមបោះឆ្នោតរហូតដល់ ៦៦,២ភាគរយ ទោះបីជាការបោះឆ្នោតនេះ ប្រព្រឹត្តិទៅអំឡុងពេលមានការផ្ទុះវីរុសមរណៈក៏ដោយ។
គណបក្សរបស់លោកប្រធានាធិបតី ម៉ូន ជេអ៊ីន ឈ្មោះ គណបក្សប្រជាធិបតេយ្យ ទទួលបានជោគជ័យ គួរឲ្យកត់សម្គាល់ដោយឈ្នះអសនៈចំនួន ១៦៣ក្នុងចំណោមអសនៈ ៣០០នៅក្នុងរដ្ឋសភា៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC