ភ្នំពេញ៖ បើទោះបីជាស្ថិតនៅក្នុងកាលៈទេសៈនៃវិបត្តិជំងឺ Covid-19 យ៉ាងណាក្តី សម្រាប់កំពង់ផែស្វយ័តក្រុងភ្នំពេញ នៅតែអាចរកចំណូលបានពីសេវាកម្ម លើកដាក់ទំនិញផ្សេងៗ ជាង៧ លានដុល្លារអាមេរិក ដែលចំនួននេះ មានកំណើនខ្ពស់នៅត្រីមាសទី១ ឆ្នាំនេះ បើធៀបនឹងរយៈពេលដូចគ្នាកាលពីឆ្នាំទៅ។
សេចក្ដីប្រកាសព័ត៌មាន របស់កំពង់ផែស្វយ័តក្រុងភ្នំពេញ បានឲ្យដឹងថា នៅក្នុងត្រីមាសទី១ ដើមឆ្នាំ២០២០នេះ កំពង់ផែស្វយ័តភ្នំពេញ រកប្រាក់ចំណូលសរុបបានជាង៧,៦ លានដុល្លារ ខណៈដែលចំណូលបានមកពីការលើកដាក់ ក្រោមដងយោងមានជាង២,៧លានដុល្លារ និងចំណូលលើកដាក់នៅលើទីលាន មានជាង២,៤លានដុល្លារ រួមជាមួយនឹងចំណូលបានពីសេវាកម្មផ្សេងៗមួយចំនួនទៀត។
សេចក្ដីប្រកាសនេះ បានបញ្ជាក់ទៀតថា លទ្ធផលការងារអាជីវកម្ម និងសេវាកម្មនៅត្រីមាសទី១ ឆ្នាំ២០២០នេះ គឺទំនិញជាប្រេងឥន្ធនៈ មានជាង ៩៣ម៉ឺនតោន កើនឡើង ៣ភាគរយ នាវាផ្ទុកទំនិញឆ្លងកាត់ ៦២៥គ្រឿង កើនឡើង ១៤ភាគរយ នាវាទេសចរណ៍មាន ១២៦ជើង ធ្លាក់ចុះ ៧ភាគរយ បរិមាណកុងតឺន័រមាន ៧៤.៣៣៣ ធីអ៊ីយូរ កើនឡើង ២៦ភាគរយ និងបរិមាណអ្នកដំណើរមានជាង ៩០០០នាក់ ធ្លាក់ចុះប្រមាណ ២២ភាគរយ បើធៀបនឹងរយៈពេលដូចគ្នាកាលពីឆ្នាំទៅ៕ដោយ៖សម្ផស្ស