ថៃ៖ ក្មេងស្រីម្នាក់បានបង្ហោះរូបភាពសត្វឆ្មាព្រៃ (leopard cat) ងាប់មួយក្បាល ដែលត្រូវបានចម្អិនជាអាហារ។ គេមិនច្បាស់ទេថាតើនាងបានតាមប្រមាញ់, ប្រទះឃើញ ឬទិញវាពីអ្នកលក់ផ្សេងនោះទេ ។ ទោះយ៉ាងណា អ្នកនិយមលេងអ៊ីនធឺណិតមិនយល់ស្របឡើយ ចំពោះអ្វីដែលក្មេងស្រីកំពុងបង្ហាញដល់ពិភពលោក នូវប្រភេទសត្វឆ្មាព្រៃដែលជាសត្វត្រូវបានការពារនៅក្នុងប្រទេសថៃ។
ក្មេងស្រីបានដាក់ចំណងជើងថា “អាហារពេលល្ងាចយប់នេះ…! ឆ្មាខ្លារខិនឆាគ្រឿង ឆ្ងាញ់ណាស់ណា៎!!”។ ប៉ុន្តែ បន្ទាប់ពីការបង្ហោះនេះបានរីករាលដាល សាធារណជនបានស្នើឱ្យមន្ត្រីពាក់ព័ន្ធ ប្រញាប់ចាត់វិធានការចំពោះទង្វើមួយនេះជាបន្ទាន់។
បន្ទាប់ពីការបង្ហោះនេះត្រូវបានរីករាលដាល និងទទួលរងប្រតិកម្មតបយ៉ាងខ្លាំងពីសហគមន៍អ៊ីនធឺណិត គណនីនោះបានលុបការបង្ហោះ និងសូម្បីបិទគណនីហ្វេសប៊ុករបស់ខ្លួនទៀតផង។
ទោះយ៉ាងណា ខាងនាយកដ្ឋានឧទ្យានជាតិសត្វព្រៃ និងអភិរក្សដើមឈើ (DNP) បានចាត់មន្ត្រីឲ្យពិនិត្យមើល ចំពោះករណីមានអ្នកប្រើប្រាស់ហ្វេសប៊ុកម្នាក់ បានបង្ហោះរូបភាពសត្វឆ្មាខ្លារខិនមួយក្បាល ដែលត្រូវបានគេយកទៅធ្វើជាអាហារ កាលពីថ្ងៃទី ១៣ ខែមេសាឆ្នាំ ២០២០ ។ មន្ត្រីជំនាញបានស៊ើបអង្កេត និងរកឃើញថា មានបុគ្គលចំនួន ៤ នាក់ដែលត្រូវបានគេសង្ស័យ ក្នុងករណីនេះ។ ពួកគេ ៣ នាក់មានសិទ្ធិប្រើប្រាស់គណនីហ្វេសប៊ុកដូចគ្នានិង ២ នាក់ទៀតពាក់ព័ន្ធនឹងករណីនេះ។ មន្ត្រីជំនាញបានរកឃើញឈ្មោះ និងលេខទូរស័ព្ទរបស់ជនសង្ស័យ។ ម្នាក់រស់នៅស្រុក Betong ខេត្ត Yala និងជនសង្ស័យម្នាក់ទៀត ជាសាច់ញាតិរបស់នាងដែលគ្មានអាសយដ្ឋានច្បាស់លាស់។
DNP បញ្ជាក់ថា ពួកគេអាចរក្សាទុកការផុសនេះ ហើយប្រមូលភស្តុតាង ចាំបាច់ទាំងអស់នៅក្នុងករណីនោះផងដែរ។ សកម្មភាពរបស់ពួកគេ បានធ្វើឲ្យប៉ះពាល់ដល់សហគមន៍ ហើយករណីនេះត្រូវបានបញ្ជូន ទៅប៉ូលិសយ៉ាឡារួចហើយ។ មន្ត្រីនៅនាយកដ្ឋាន DNP ក៏បានទទួលបញ្ជាឱ្យស្វែងរក និងចាប់ខ្លួនបុគ្គល ដែលពាក់ព័ន្ធផងដែរ។ នាយកដ្ឋានសូមថ្លែងអំណរគុណ ចំពោះមនុស្សគ្រប់រូប ដែលបានបញ្ជូនព័ត៌មាន អំពីករណីនេះ៕
ប្រែសម្រួល៖ លឹម ហុង (ប្រភព៖ Sanook)