ភ្នំពេញ៖ បច្ចុប្បន្នសេវាកម្មដឹកជញ្ជូនទំនិញ និងអាហារ នៅក្នុងរាជធានីភ្នំពេញ បានកើតឡើងជាបន្តបន្ទាប់ នៅក្នុងអំឡុងនៃស្ថានការណ៍បម្រាមមិនឲ្យចេញពីផ្ទះ ដើម្បីទប់ស្កាត់ការរីករាលដាលនៃជំងឺកូវីដ១៩។
នៅក្នុងពេលនេះ មនុស្សកាន់តែមានភាពងាយស្រួល ដោយការការវិវឌ្ឍទៅតាមបច្ចេកវិទ្យា និងរស់នៅប្រចាំថ្ងៃ ហើយអ្វីដែលសំខាន់បំផុតនោះ គឺសម្លៀកបំពាក់ និងម្ហូបអាហារដើម្បីញាំប្រចាំថ្ងៃ។
សេវាកម្មដឹកជញ្ជូននេះ ប្រើបច្ចេកវិទ្យាហៅបម្រើសេវាតាមរយៈ App។ នៅភ្នំពេញ សេវាកម្មដឹកជញ្ជូនអាហារ និងទំនិញ មានដូចជា ញុំា២៤(Nham24) ផេនដា (Penda) អ៊ីហ្គេត (E- Gets) និងជូនណាក់ឌីលីវើរី (Joonaak Delivery) ជាដើម។
ញុំា២៤ (Nham24) ជាសេវាកម្មដឹកជញ្ចូនអាហារមួយ ក្នុងចំណោមសេវាកម្មជាច្រើន ដែលកំពុងប្រគួតប្រជែងនៅក្នុងទីផ្សារ Delivery។ អាជីវកម្មដឹកជញ្ជូនម្ហូបអាហារមួយនេះ បានសហការជាមួយភោជនីយដ្ឋាន និងហាងកាហ្វេជាង ៣០០កន្លែង នៅទូទាំងរាជធានីភ្នំពេញ ដោយប្រើ App សម្រាប់ ធ្វើការ order នៅមុខម្ហូបទាំងឡាយណា ដែលអតិថិជនចង់បាន។ តម្លៃនៃការដឹកជញ្ជូន ក៏បានកើនឡើងខ្ពស់ នៅក្នុងអំឡុងជំងឺកូវីដ១៩នេះ។
ម្ចាស់អាជីវកម្មលក់ទំនិញ និងអាហារតាមប្រព័ន្ធអនឡាញមួយរូប បានឲ្យដឹងថា ការដឹកជញ្ជូនបានកើនឡើងខ្ពស់ នាពេលបច្ចុប្បន្ន បើប្រៀបធៀបតម្លៃសេវាដឹកជញ្ជូនពីមុន។ តម្លៃសេវាកម្មដឹកជញ្ជូនទំនិញ និងអាហារនាពេលនេះ បានគិតថ្លៃពីម្ចាស់ទំនិញ ចន្លោះពី១០ ទៅ ១៥% នៃតម្លៃសរុប ក្នុងការដឹកមួយជើង និងបានគិតពីអតិថិជនថែមទៀត ពីសេវាដឹកជញ្ជូន ចន្លោះពី ១ដុល្លារ ទៅ ៣ដុល្លារ ក្នុងមួយជើង អាស្រ័យទៅតាមទីកន្លែងជាក់ស្តែង៕ដោយ៖សម្ផស្ស