ភ្នំពេញ ៖ មិនមែនមានន័យថា ប្រទេសត្រូវបានដាក់ស្ថិតក្នុងភាពអាសន្ន ក្រោយពេលមានព្រះរាជក្រម ប្រកាសឲ្យប្រើប្រាស់ច្បាប់ ស្តីពីការគ្រប់គ្រងប្រទេសជាតិស្ថិតក្នុងភាពអាសន្ននោះទេ ។ ការដាក់ប្រទេសជាតិស្ថិតក្នុងភាពអាសន្ន នៅពេលណានោះ គឺប្រកាសដោយព្រះមហាក្សត្រ ព្រះរាជក្រឹត្យ ក្រោយពីបានមតិឯកភាពពីនាយករដ្ឋមន្ត្រី ប្រធានរដ្ឋសភា និងប្រធានព្រឹទ្ធសភា។
ឯកឧត្តម គឹម សន្តិភាព អ្នកនាំពាក្យនិងជារដ្ឋលេខាធិការក្រសួងយុត្តិធម៌ បានសរសេរសារនៅលើហ្វេសប៊ុកផ្លូវការ កាលពីថ្ងៃទី១៦ខែមេសាឆ្នាំ២០២០នេះថា សូមជម្រាបជូនថា៖ មិនមែនមានន័យថាប្រទេសត្រូវបានដាក់ស្ថិតក្នុងភាពអាសន្ន ក្រោយពេលមានព្រះរាជក្រមប្រកាសអោយប្រើប្រាស់ច្បាប់ស្តីពីការគ្រប់គ្រងប្រទេសជាតិស្ថិតក្នុងភាពអាសន្ននោះទេ។
អ្នកនាំពាក្យ បានលើកឡើងទៀតថា ការដាក់ប្រទេសជាតិស្ថិតក្នុងភាពអាសន្ននៅពេលណានោះ គឺប្រកាសដោយព្រះមហាក្សត្រ (ព្រះរាជក្រឹត្យ) ក្រោយពីបានមតិឯកភាពពីនាយករដ្ឋមន្ត្រី ប្រធានរដ្ឋសភា និងប្រធានព្រឹទ្ធសភា ស្របតាមមាត្រា២២ថ្មី នៃរដ្ឋធម្មនុញ្ញ។
“ជារួមមានន័យថា ច្បាប់ស្តីពីការគ្រប់គ្រងប្រទេសជាតិស្ថិតក្នុងភាពអាសន្ន នឹងយកមកអនុវត្ត ក្រោយពេលមានការប្រកាស ដាក់ប្រទេសជាតិស្ថិតក្នុងភាពអាសន្ន!” ឯកឧត្តម គឹម សន្តិភាព បញ្ជាក់បន្ថែមដូច្នេះ៕ដោយ៖កូឡាប