ភ្នំពេញ៖ នារីវ័យក្មេងម្នាក់ ដែលដេកស្តូកស្តឹងនៅក្បែររបងផ្លូវ ៣០ ម៉ែត្រ ក្នុងសង្កាត់ស្ទឹងមានជ័យ៣ កាលពីព្រឹកថ្ងៃទី១៦ មេសា ម្សិលមិញនេះ មិនមែនជាជនជាតិចិនទេ គឺជាជនជាតិវៀតណាម ។ ហើយនៅពេលនោះ យើងគ្រប់គ្នាក៏សង្ឃឹមថា នាងនឹងត្រឡប់មកស្ថានភាពល្អប្រសើរឡើងវិញ ក្រោយនាងងើបដឹងខ្លួន ហើយត្រូវបានអាជ្ញាធរពាក់ព័ន្ធ និងព្រមទាំងបងប្អូនអ្នកកាសែត បងប្អូនប្រជាពលរដ្ឋ បានជួយឲ្យនាងឡើងជិះកង់បីដឹកទៅផ្ទះ ។
ប៉ុន្តែ អ្វីដែលយើងគ្រប់គ្នាខ្លោចចិត្តបំផុតនោះ គឺនារីជនជាតិវៀតណាមខាងលើនេះ ពុំត្រូវបានដឹកទៅកាន់ទីកន្លែងស្នាក់នៅរបស់នាងឡើយ ដោយកង់បីបានដឹកនាងយកទៅទម្លាក់ចោលក្នុងខ្ទមអ្នកតាមុខវត្តឫស្សីសាញ់ ស្ថិតនៅសង្កាត់ព្រៃស ខណ្ឌដង្កោ រាជធានីភ្នំពេញ ទៅវិញ ដែលឃើញហើយពិតជាគួរឲ្យអាសូរខ្លាំងណាស់ ។
ក្រោយពីទទួលបានព័ត៌មាននេះភ្លាម លោកវរសេនីយ៍ឯក ជឹម ស៊ីថា អធិការនគរបាលខណ្ឌដង្កោ ក៏ចាត់កម្លាំងនគរបាលប៉ុស្តិ៍ ចុះទៅដល់កន្លែងកើតហេតុ និងបានហៅរថយន្តពេទ្យមកដឹកនារីនោះ។ ប៉ុន្តែ ដោយសារតែចាំរថយន្តពេទ្យយួរពេក លោកក៏បញ្ជាឲ្យមន្ត្រីរបស់លោក សម្រេចប្រើប្រាស់រថយន្តសារ៉ែន របស់កម្លាំងនគរបាលខណ្ឌ ដឹកនាងកាន់មន្ទីរពេទ្យបង្អែកខណ្ឌដង្កោ នៅវេលាម៉ោង២ រសៀល ថ្ងៃទី១៦ ខែមេសា ឆ្នាំ២០២០។ លោកបន្តថា បន្ទាប់ពីក្រុមគ្រូពេទ្យធ្វើការពិនិត្យ វាស់កំដៅទៅនារីជនជាតិវៀតណាមរូបនេះ មានកំដៅរហូតដល់ជាង៣៨ អង្សាសេ ក្រុមគ្រូពេទ្យខណ្ឌដង្កោ ក៏បានសម្រេចដឹកនាងបន្តទៅកាន់ពេទ្យរុស្ស៊ី តែម្តង។
លោកវរសេនីយ៍ឯកជឹម ស៊ីថា ក៏បានបញ្ជាក់ឲ្យដឹងថា នារីជនជាតិវៀតណាមនេះ បានមកលេងបងប្អូនគាត់នៅភ្នំពេញ អស់រយៈពេល១ខែមកហើយ ប៉ុន្តែ យប់មិញនេះគាត់បានវង្វេងផ្លូវ រកផ្ទះបងប្អូនមិនឃើញ ទើបកើតរឿងបែបនេះ ។ ទោះយ៉ាងណា មកទល់ពេលនេះ គេនៅមិនទាន់ដឹងពីមូលហេតុច្បាស់លាស់ ដែលនាំឲ្យនាងមកដេកដួលតាមផ្លូវបែបនេះនៅឡើយទេ៕ ដោយ៖ លឹម ហុង
