សេដ្ឋកិច្ចរបស់ប្រទេសចិន មានការធ្លាក់ចុះខ្លាំងបំផុតនៅក្នុងត្រីមាសទី ១ ចាប់តាំងពីឆ្នាំ ១៩៩២មក ខណៈដែលការផ្ទុះវីរុសកូរ៉ូណា បានបង្អាក់ដល់ការផលិត និងការចំណាយ ហើយវាគឺជាសម្ពាធដ៏ធ្ងន់សម្រាប់អាជ្ញាធរ ដើម្បីធ្វើកិច្ចការបន្ថែមឲ្យបានច្រើន ដើម្បីបញ្ឍប់បញ្ហាការកើនឡើងនៃការគ្មានការងារធ្វើ។
បើតាមទិន្នន័យផ្លូវការនៅថ្ងៃសុក្រនេះ បានបង្ហាញថាផលិតផលក្នុងស្រុករបស់ចិន (GDP) បានធ្លាក់ចុះ ៦,៨ភាគរយក្នុងត្រីមាសទី ១ ខែមករា ដល់មីនា ដែលតួលេខធ្លាក់ចុះនេះច្រើនជាងចំនួន ៦,៥ភាគដែលទីភ្នាក់ងារសារពត៌មាន Rueters បានធ្វើការស្ទង់មតិ។
វាគឺជាការធ្លាក់ចុះសេដ្ឋកិច្ចដ៏អាក្រក់បំផុតរបស់ចិន ចាប់តាំងពីឆ្នាំ ១៩៩២មក។ ចិនគឺជាមហាអំណាចសេដ្ឋកិច្ចទី ២លើលោក បន្ទាប់ពីអាមេរិច។
ទីក្រុងប៉េកាំងប្តេជ្ញាចាត់វិធានការបន្ថែមទៀត ដើម្បីទប់ទល់នឹងផលប៉ះពាល់ដែលកើតឡើងដោយសារការរាតត្បាតវីរុស ខណៈដែលភាពគ្មានការងារធ្វើកំពុងតែគំរាមកំហែងស្ថេរភាពសង្គម។
សូមបញ្ជាក់ថា វីរុសកូរ៉ូណា បានផ្ទុះឡើងកាលពីខែធ្នូ ឆ្នាំ ២០១៩ពីទីក្រុងវូហាន ខេត្តហូបេ។ មកដល់ពេលនេះ វីរុសមរណៈនេះ បានឆក់យកជីវិតមនុស្សជិត ១៥០.០០០នាក់ និងឆ្លងទៅកាន់មនុស្សជាង ២.០០០.០០០នាក់ទូទាំងពិភពលោក៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia