បាត់ដំបង ៖ ប្រជាពលរដ្ឋនិងពលករខ្មែរ ដែលទើបវិលត្រឡប់មកពីក្រៅប្រទេស ចំនួនជាង២៦០នាក់ បានសម្រេចដាក់ខ្លួនឯង នៅដាច់ដោយឡែកពីក្រុមគ្រួសារ និងសហគមន៍ ដោយមានការយល់ដឹង ពីការការពារទប់ស្កាត់ ការរីករាលដាលនៃជំងឺកូវីដ១៩ នៅខេត្តបាត់ដំបង។
លោក សឿម ប៊ុនរិទ្ធ អភិបាលរងខេត្ត និងជាអ្នកនាំពាក្យសាលាខេត្តបាត់ដំបង បានមានប្រសាសន៍ឲ្យដឹងថា បច្ចុប្បន្នមានពលរដ្ឋបានដាក់ឡែកនៅចត្តាឡីស័ក នៅក្នុងក្រុងបាត់ដំបង និងតាមបណ្ដាស្រុកចំនួន១២នាក់ និងដាក់ដាច់ដោយឡែកដោយខ្លួនឯង នៅតាមភូមិឃុំចំនួន ២៥១នាក់ ជាពលករខ្មែរ ខណៈពលករខ្មែរក្នុងខេត្តបាត់ដំបង ដែលទើបត្រឡប់មកពីក្រៅប្រទេស សរុបចំនួន ១៥.៦៩៩នាក់ (ស្រី ៧១៨៥នាក់)។
ចំណែកលោកវេជ្ជបណ្ឌិត ពៅ សុវណ្ណារិន ប្រធានការិយាល័យស្រុកប្រតិបត្តិស្រុកមោងឫស្សី បានមានប្រសាសន៍ឲ្យដឹងថា ការដាក់ពលរដ្ឋ ទើបមកពីក្រៅប្រទេស នៅចត្តាឡីស័កនេះ គឺត្រូវបានអនុវត្តដូចគ្នានៅទូទាំងប្រទេស តាមបទបញ្ជារបស់ក្រសួងសុខាភិបាល ដែលរួមមានទាំងការពិនិត្យសុខភាព ការផ្ដល់កន្លែងស្នាក់នៅនិងការហូបចុកជាដើម។
ពលករខ្មែរទើបត្រឡប់មកពីប្រទេសថៃ កំពុងដាក់ខ្លួនដាច់ដោយឡែក នៅចត្តាឡីស័កក្នុងខេត្តបាត់ដំបង បានប្រាប់ឲ្យដឹងថា បន្ទាប់ពីចេញមកពីប្រទេសថៃ ត្រូវបានរថយន្តកងទ័ពដឹកពួកគាត់ដល់វិទ្យាល័យព្រះមុនីវង្ស ស្ថិតក្នុងក្រុងបាត់ដំបង ដើម្បីពិនិត្យសុខភាព ទើបមានរថយន្តតាមស្រុកទៅទទួល យកមកដាក់ក្នុងចត្តាឡីស័ក ដោយការជិះរថយន្ត ការស្នាក់នៅនិងការហូបចុក ពុំមានយកថវិកានោះទេ ហើយពួកគាត់គាំទ្រនូវវិធានការ ទប់ស្កាត់ការឆ្លងរីករាលដាលនៃជំងឺកូវីដ១៩ របស់រាជរដ្ឋាភិបាល និងខិតខំអនុវត្តការការពារជំងឺនេះផងដែរ។
គួរបញ្ជាក់ផងដែរថា ចាប់ពីមានករណីផ្ទុះជំងឺកូវីក១៩ មកមន្ទីរសុខាភិបាលខេត្តបាត់ដំបង បានបញ្ជូនសំណាកចំនួន ៣៩៣សំណាក (ស្រី១៣៧សំណាក) ទៅពិនិត្យរកជំងឺកូវីដ១៩ ជាលទ្ធផលអវិជ្ជាមាន ៣៥៤សំណាក (ស្រី ១២៨សំណាក)និងលទ្ធផលវិជ្ជាមាន ចំនួន៨ករណី (ស្រី២នាក់) បានជាសះស្បើយចំនួន ៦នាក់ (ស្រី២នាក់) ៕ដោយ ៖ អ៊ុងសារុំ
