ឪពុកម្តាយជាអ្នកមានគុណ (ព្រះរស់) មិនអាចកាត់ថ្លៃបាន សម្រាប់កូនៗគ្រប់រូប ។ ពិតណាស់ គ្រប់សកម្មភាពរបស់លោកទាំងពីរ តែងតែស្តែងឡើង ក្នុងបំណងចង់ឲ្យកូនៗមានសុខភាពល្អ និងជាពិសេស គឺចង់ឲ្យកូនធំឡើងក្លាយជាពលរដ្ឋល្អក្នុងសង្គម ចេះគោរពចាស់ទុំ និងមានចំណេះដឹងខ្ពង់ខ្ពស់ អាចរកការងារថ្លៃថ្នូរផ្តល់កិត្តិយសឲ្យគ្រួសារ នោះលោកទាំងពីរសប្បាយចិត្តណាស់ហើយ ដោយមិនដែលគិតចង់បានពីការតបស្នងសងគុណនោះឡើយ។
ដោយយល់ពីតម្លៃដ៏ធំធេងរបស់លោក បុរសជាកូនដ៏ល្អម្នាក់ដែលមានគណនីហ្វេសប៊ុកឈ្មោះ ប៉ាប៉ា ពនេចរ បានធ្វើរឿងដ៏កម្រមួយដាក់ឪពុករបស់គាត់ បានធ្វើឲ្យមនុស្សជាច្រើនឃើញហើយរំភើប និងកោតសរសើរយ៉ាងខ្លាំង ចំពោះរូបថត១សន្លឹកដ៏កតញ្ញុនេះរបស់គាត់ ។
ភ្ជាប់ជាមួយរូបថត២សន្លឹក បង្ហោះនៅលើបណ្តាញសង្គមហ្វេសប៊ុក ដោយរូបទី១-បង្ហាញរូបលោកកាលពីនៅក្មេងឪពុកជូនដើរលេង និងមួយទៀតបង្ហាញលោកបីឪពុកមានវ័យចំណាស់ដើរលែងរួច ឡើងកាំជណ្តើរទីអារាមដ៏ខ្ពស់មួយ លោកបានសរសេររៀបរាប់គួរឲ្យរំជួលចិត្តថា៖” ពុក! ខ្ញុំចង់ទៅដើរលេងជាមួយពុកដែរកាលខ្ញុំនៅតូច។ កូនហ្អា ពុកចង់ដើរលេងទៅកន្លែងព្រះច្រើន នាំពុកទៅផង ពេលនេះពុកដើរលែងរួច”៕ ដោយ៖ លឹម ហុង