ខេត្តស្វាយរៀងៈ អភិបាលខេត្តស្វាយរៀង បានថ្លែងថា នៅតាមទីអារាមនានា និងបន្តចូលរួមក្នុងយុទ្ធនាការផ្សព្វផ្សាយ ដើម្បីរួមចំណែកធ្វើឲ្យកិច្ចការបង្ការ ទប់ស្កាត់ការឆ្លងរាលដាលនៃជំងឺកូវីដ១៩ នៅក្នុងខេត្តស្វាយរៀង ហើយឯកឧត្តម បានថ្លែងនូវអំណរព្រះគុណ និងកោតសរសើរនូ វទឹកព្រះទ័យរបស់ព្រះធម្មកិច្ចមុនី រស់ ឌី ព្រះរាជាគណៈថ្នាក់កិត្តិយស ព្រះបាឡាត់គណខេត្ត និងជាព្រះអនុគណស្រុករមាសហែក ព្រមទាំងព្រះគ្រូចៅអធិការទាំង៥២វត្ត ក្នុងស្រុករមាសហែក ដែលបានចូលរួមបរិច្ចាគ នូវថវិកាដល់រដ្ឋបាលខេត្ត សម្រាប់គាំទ្រការងារប្រយុទ្ធប្រឆាំង នឹងការរីករាលដាលនៃជំងឺកូវីដ១៩។
លោក ម៉ែន វិបុល អភិបាលខេត្តស្វាយរៀង បានអញ្ជើញទទួលយកអំណោយ និងថវិកា ចំនួន ៤.០០០.០០០រៀល ពីព្រះធម្មកិច្ចមុនី រស់ ឌី ព្រះរាជាគណៈថ្នាក់កិត្តិយស ព្រះបាឡាត់គណខេត្ត និងជាព្រះអនុគណស្រុករមាសហែក ព្រមទាំងព្រះគ្រូចៅអធិការទាំង៥២វត្ត ក្នុងស្រុករមាសហែក បានផ្ដល់ជូនរដ្ឋបាលខេត្តសម្រាប់ប្រើប្រាស់ក្នុងយុទ្ធនាការប្រយុទ្ធប្រឆាំងនឹងជំងឺកូវីដ១៩ ។ ពិធីនេះបានប្រព្រឹត្តទៅនៅសាលប្រជុំរំដួល សាលាខេត្ត នាព្រឹកថ្ងៃទី១៧ ខែមេសា ឆ្នាំ២០២០នេះ។
ក្នុងឱកាសនោះឯកឧត្តមអភិបាលខេត្ត បានថ្លែងថា ព្រះទ័យរបស់ព្រះធម្មកិច្ចមុនី រស់ ឌី ព្រះរាជាគណៈថ្នាក់កិត្តិយស ព្រះបាឡាត់គណខេត្ត និងជាព្រះអនុគណស្រុករមាសហែក ព្រមទាំងព្រះគ្រូចៅអធិការទាំង៥២វត្ត ក្នុងស្រុករមាសហែក ដែលបានចូលរួមបរិច្ចាគនូវថវិកាដល់រដ្ឋបាលខេត្ត សម្រាប់គាំទ្រការងារប្រយុទ្ធប្រឆាំងនឹងការរីករាលដាលនៃជំងឺកូវីដ១៩ ដែលសបញ្ជាក់ឲ្យឃើញពីកាយវិការ ប្រកបដោយសប្បុរស និងជាវប្បធម៌ នៃការចែករំលែក ជួយគ្នាក្នុងគ្រាលំបាក ហើយថវិកានេះ រដ្ឋបាលខេត្តនឹងយកទៅប្រើប្រាស់បម្រើឲ្យសកម្មភាពនានានៅមូលដ្ឋាន ទាំងការងារផ្សព្វផ្សាយអប់រំពីវិធានការបង្ការ ទប់ស្កាត់ការឆ្លងរាលដាលនៃជំងឺកូវីដ១៩ និងការងារសង្គម ជួយឧបត្ថម្ភដល់ប្រជាពលរដ្ឋដែលទទួលរងនូវផលប៉ះពាល់នៅមូលដ្ឋាន ។
ឯកឧត្តមអភិបាលខេត្ត បានបញ្ជាក់ថា ថវិកា និងសម្ភារ របស់ព្រះសង្ឃគ្រប់ព្រះអង្គបានបរិច្ចាគ នូវថ្ងៃនេះពិតជាបាន រួមចំណែកយ៉ាងសកម្មជាមួយរដ្ឋបាលខេត្ត ក្នុងការបំពេញបេកកម្មប្រចាំការតាមគោលដៅនានា ដើម្បីពិនិត្យ និងតាមដានសុខភាពប្រជាពលរដ្ឋ និងបងប្អូនពលករ កម្មករ មកពីក្រៅប្រទស និងក្រៅខេត្ត ដែលធ្វើដំណើរត្រឡប់មកស្រុកកំណើតក្នុងខេត្តស្វាយរៀង និងត្រូវបានដាក់ឲ្យនៅមណ្ឌលចត្តាឡីស័ក មណ្ឌលត្រួតពិនិត្យសុខភាព និងដាក់ឲ្យនៅដាច់ដោយឡែកនៅតាមផ្ទះរៀងៗខ្លួន ដែលការលះបង់ទាំងនេះ គឺជាវីរភាពមួយគួរឲ្យកោតសរសើរ និងស្ងប់ស្ងែង ហើយឯកឧត្តមអភិបាលខេត្ត សង្ឃឹមថា នៅតាមទីអារាមនានា និងបន្តចូលរួមក្នុងយុទ្ធនាការផ្សព្វផ្សាយ ដើម្បីរួមចំណែកធ្វើឲ្យកិច្ចការបង្ការ ទប់ស្កាត់ការឆ្លងរាលដាលនៃជំងឺកូវីដ១៩ នៅក្នុងខេត្តស្វាយរៀង កាន់តែទទួលបានជោគជ័យ និងទប់ស្កាត់បានជាបន្ត បន្ទាប់ទៀតមិនឲ្យមានប្រជាពលរដ្ឋឆ្លងនូវជំងឺរាតត្បាតនេះ ៕ ដោយ៖ វ៉ៃកូ
