អភិបាលបាលក្រុងមួយក្នុងរដ្ឋ Victoria ប្រទេសអូស្ត្រាលី រងការផាកពិន័យ ដោយសារតែរំលោភបម្រាមដើម្បីទប់ស្កាត់វីរុសកូរ៉ូណា បន្ទាប់ពីគេថតរូបភាពលោកបាន កំពុងផឹកស្រាបៀរនៅតាមដងផ្លូវ។
លោក Tony Herbert អភិបាលក្រុង Warrnambool ត្រូវបានគេថតជាប់ឃើញឈរនៅលើដងផ្លូវ ក្រៅសណ្ឋាគារមួយជាមួយនឹងមនុស្ស ៣នាក់។
រូបភាពរបស់គាត់ ត្រូវបានថតដោយអ្នកដំណើរកាលពីថ្ងៃទី ៧ខែមេសា។ ក្នុងរូបភាព គាត់បានលើកកែវស្រាមកផឹក នៅក្បែរឡានរបស់គាត់។
មុនពេលមានការផឹកស្រាបៀរជុំគ្នាប៉ុន្មានម៉ោង ក្រុមប្រឹក្សាក្រុងបានចែករំលែកវីដេអូ របស់លោកអភិបាលក្រុងរូបនោះ ដែលបានជំរុញឲ្យប្រជាពលរដ្ឋទាំងអស់ស្នាក់នៅផ្ទះ។
នៅថ្ងៃព្រហស្បតិ៍ម្សិលមិញនេះ ប៉ូលិសក្នុងរដ្ឋ Victoria បានធ្វើការផាកពិន័យអភិបាលក្រុងខាងលើ នូវទឹកប្រាក់ចំនួន ជាង១.០០០ដុល្លារ ដោយសារតែមិនបានអនុវត្តតាមច្បាប់គម្លាតសង្គម ដើម្បីទប់ស្កាត់ការឆ្លងរាលដាលវីរុសកូរ៉ូណា។
លោក Tony Herbert បានចេញមុខសុំទោសចំពោះទង្វើរបស់កាត់ និងបានទទួលស្គាល់កំហុស។ លោកនិយាយថា គាត់បានជជែកគ្នាជាមួយនឹងអ្នកជំនួយក្នុងតួនាទីជាអភិបាលក្រុង ដែលលោកជឿជាក់ថា វាស្ថិតក្នុងព្រំដែននៃច្បាប់។
លោកថ្លែងថា “ខ្ញុំបានដឹងថា ខ្ញុំបានរំលោភបំពានច្បាប់ថ្មីដែលធ្វើឲ្យសហគមន៍មានសុវត្ថិភាព។ ខ្ញុំពិតជាសុំទោសចំពោះកំហុសរបស់ខ្ញុំ”។
ប៉ូលិសបញ្ជាក់ថា មនុស្ស ៣នាក់ផ្សេងទៀតក៏រងការផាកពិន័យ ជាមួយនឹងលោកអភិបាលក្រុងផងដែរ ដោយសារតែល្មើសនឹងច្បាប់ ដែលដាក់ចេញដោយអាជ្ញាធរវេជ្ជសាស្ត្រ។
សូមបញ្ជាក់ថា នៅក្នុងប្រទេសអូស្ត្រាលីមានអ្នកឆ្លងវីរុសកូរ៉ូណា ឬ COVID-19 ជាង ៦.៥០០នាក់ និងមានអ្នកស្លាប់ចំនួន ៦៣នាក់៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC